New Comers 09/16/17 St. George and St. Shenouda Coptic Orthodox Church

الهجرة لأمريكا

س: واحده بتقول لقد جاءتنا الهجرة إلى أمريكا ونحن هنا مستوانا كويس جداً مادياً وزوجى فى وظيفه عالية فها نترك كل شئ ونسافر ونبدأ من جديد وأنا مش عارفه دى مشيئة ربنا فى الهجرة ولما أسافر ها نشتغل إيه … إلى آخره ؟

ج: نصيحتى إن زوجك ياخد إجازة … ولو إجازة بدون مرتب ويسافر ويشوف يلاقى شغله ولا لأ ؟ يلاقى سكن ولا لأ. لأن دا ها يبتدى من جديد وجايز يبتدى من الصفر … دى نقطة.

وتانى نقطة: يشوف الشهادة بتاعته معتمده هناك ولا لأ. لأن فيه ناس بيتخرّجوا من الجامعة عندنا وشهاداتـهم لا تعتمد فى الخارج. يعنى يكون طبيب وما يعتمدهوش كطبيب لازم يعملوا له امتحان خاص فى الطب ينجح فيه أو ما ينجحش. وساعات مثلاً يعملوا له أكثر من امتحان يعنى طبيب يعملوا له امتحان لأمريكا فإذا راح كاليفورنيا مثلاً يعملوا له امتحان تانى خاص بكاليفورنيا. في استراليا يعملوا لهم امتحان برضه. وساعات يتقدم 100 واحد ما ينجحش غير واحد أو أتنين ويكونوا أطباء ناجحين جداً فى بلادهم. لأن ساعات أهل  البلد يقول لك دول ها ييجوا لنا ناس منافسين لينا من بلاد غريبه فيعقّدوا لهم الموضوع. أنا فاكر فى استراليا قالبت رئيس الوزراء الفدرالى ورئيس الوزراء المحلّى كل ولايه ليها رئيس وزراء وقابلت وزير التعليم وقلت لهم سهلوا للناس مش معقول الكلام دا بيعملوا لهم امتحان كدا أكاديمك صعب جداً. وزير التعليم كان لطيف قوى. قلت له بيعملوا امتحان أكاديمى صعب التلامذة ما بينجحوش فيه. قال لى ولا المدرسّين بينجحوا … يعنى معترف بكدا. فهمّا عايزين يمشوهم. المحامين بيعملوا لهم امتحان مهم اسموه (البار) مين اللى ينجح فيه دا الأخر صعب. وساعات اللى يتخرّج من كليه الحقوق هناك يخش فى امتحان البار برضه. يعنى لازم الواحد يشوف هو رايح فين على رأى المثل اللى بيقول قدّر لرجلك قبل الخطو موضعها. يعنى قبل ما تخطو خطوه شوف رجلك دى رايحه فين. أنا مش عايز أيأسكم جايز أنتو فرحانين بإن جالكم تصريح بالهجرة بس كنصيحه جوزك ياخد إجازة ولو بدون مرتب ويشوف الجو هناك إن لقى الجو مظبوط يبعت لك ويقولك تعالى وإن كنتى خايفه عليه يروح وما يرجعش ليكى رجلك على رجله روحوا أنتوا الأتنين وشوفوا ها تعملوا إيه … ولو إجازة ولو إيه … إجازة. إن نفعت الحكاية إديكوا قعدتوا. ما نفعتش آدى بيتكم قاعد لكم والشقة بتاعتكم قاعده لكم والوظيفة بتاعتكم قاعده لكم يعنى مش تروحوا تبتدوا من جديد وأنتوا نـهيتوا كله … لا. قبل ما الواحد يترك اللى هو فيه يضمن اللى ها يروح له. وربنا يساعدكم ويختار لكم الصالح (ينبغى أن أكون فيما لأبى 04/03/1998).