س: هل الصلاة على الموتى عادة فرعونية أو تقليد كنسى؟ وهل يوجد ما يؤيد ذلك من الانجيل؟ والشاهد لكل آية ؟ لأن أخ بروتستنتى فتح معايا الموضوع.. إلى آخره. وقال لى إن الصلاة على الموتى عادة فرعونية لا يوجد ما يؤيدها من الانجيل ؟

ج: شوفوا ها أقول لكم حاجة يعنى مهمة خالص، لما نتكلم عن الإيمان ما نتكلمش عليه فى مصر فقط.. ما نتكلمش عليه إيه.. فى مصر فقط، ونقول إن الأقباط دول مصريين أخدوا الصلاة على الموتى من الفراعنة. طب ما رأيكم فى الكاثوليك فى كل أرجاء العالم وكل قاراته ويؤمنون بالصلاة على الموتى، دول خدوها من الفراعنة روخرين ؟! فى كل قارة من القارات الستة بيصلّوا على الموتى، الروم الأرثوذكس اللى هى كنائس روسيا ورومانيا وبلجاريا وقبرص واليونان والقسطنطينية.. إلى آخره يعنى، كلهم  بيصلّوا على الموتى فهل دول روخرين خدوها من الفراعنة ؟! حكاية الفراعنة دى تقولوها على مصر بس، لكن إذا كانت مسألة موجودة فى العالم كله ما نقدرش نقول إن ديا حاجة خاصة بالفراعنة. دخول الميت للكنيسة.. حتى عند البروتستانت بيدخّلوه الكنيسة، بس يدخّلوه الكنيسة ويقروا عظة، يقولوا أى كلام.. لكن كلمة يا رب أرحمه ما تطلعش من بقّهم.. ما تتقالش أبداً، مجرد كلمة يا رب أرحمه. لا تقال فى صلاة ولا فى عظة.

+  أحنا بنصلّى كلنا من أجل بعض، ولا فرق عندنا بين حى وميت لأن الله ليس إله أموات بل إله أحياء كما قال الكتاب. فبنصلّى أحياء من أجل أحياء، وأحياء من أجل موتى وموتى من أجل أحياء. يعنى اللى ماتوا بيصلّوا عننّا.. بيشفعوا فينا وأحنا بنصلّى من أجلهم.

+ وحكايه الصلاة على الموتى موضوع طويل لكن يكفى أن أقول من الإنجيل قول بولس الرسول إنه يطلب الرحمة لأنيسافورس بعد ما مات.

+  ولما واحد يصلّى من أجل ميت يعنى ها يخسر إيه بس أنا مش عارف.. طب ما يتخانقوا على حاجه ليها أهمية.. يعنى حاجة تتعب الضمير. لكن لو واحد أبوه مات ولا حاجه وقال يا رب أفتح له ملكوت السموات يقول وقعت فى خطية مميتة ؟! كلام ما لهوش معنى. أسأل الراجل دا قول له أبوك عايش ولا ميت.. ما يهمش أبوه.. عمّه.. خاله.. أى حد.. إن قال لك مات قول له يعنى ما تقدرش فى يوم من الأيام تقول يا رب أرحمه.. لو قلتها ضميرك يوبّخك ؟! (أنت تسأل وقداسة البابا شنوده الثالث يجيب ج6 13، 26/04/1986).