نصائح للمذاكرة

س: فيه ناس كتير باعتين لى نصائح عن المذاكرة بمناسبة بداية العام الدراسى ؟

ج: أول نصيحة لا تتركوا الدروس إلى آخر العام وتتراكم عليكم فى آخر السنة أبتدوا يوم بيوم من أول السنة. فيه بعض تلامذة بيسبقوا المدرسين بيذاكروا الدرس قبل ما ياخدوه ويبقى فى الحصة يسألوا فيه ويراجعوا.

على أى الحالات إنت مفروض تذاكر يوم بيوم وتدى نفسك فرصة للمراجعة، تذاكر وتراجع. اللى يذاكر ممكن ينسى لكن لما بيراجع بيثبت المعلومات. وجايز يثبت المعلومات وينسى البعض، لما يراجع مراجعة تانية تتأكد أكتر. فدايماً ذاكر وراجع وعيد المراجعة.

 تالت حاجة: المذاكرة تكون بفهم مش بصم. يعنى إذا حفظت أحفظ شئ مفهوم. أنا فاكر وإحنا صغيّرين زيكم لما كنا بنذاكر كان الواحد يقرا والحاجة المهمة يحط تحتيها خط، والحاجات المتعددة يرقمها دى واحد وأتنين وتلاتة، وفى الهامش يحط عناوين، والصفحة كلها تتلخص بحاجة فوق أو حاجة تحت، وإذا جات صفحة تانية فيها مقارنة معلومات يعمل جدول ويقارن ديا بديا ولا يمكن أبداً شئ يتحفظ إلا لو كان مهضوم هضماً  كاملاً بحيث إن الواحد يذاكر المعلومات ويرتبها بالطريقة اللى تخش مخه هو … يوضبها ويفهرسها ويرقمها ويقارنـها ويدخّلها فى مخه مفهومة جاهزة … ويراجع عليها. وتكون موضع أسئلة بينه وبين زملائه وبينه وبين الأساتذة.

     أعتبر إن حياتك الدراسية جزء من روحياتك. يعنى فيه ناس بيفتكروا إن الروحيات مجرد الصلاة والصوم والتأمل ويسيب المذاكرة. المذاكرة جزء من روحياتك. ليه ؟ لأن ربنا بيقول لك: كنت أميناً فى القليل فسأقيمك على الكثير. مفروض إنك إنت تكون أمين فى عملك وأمين فى دروسك وأمين فى مذاكرتك وأمين فى واجباتك وأمين بالنسبة لمستقبلك وأمين بالنسبة للمصروفات اللى بيدفعها لك والدك أو أى حد آخر من اسرتك. وأمين لسمعة المدرسة اللى إنت فيها لأن النتيجة بتاعتها بترفع قيمة المدرسة أو تخفّضها. والكتاب بيقول: كونوا كاملين. ما دام تكون كامل إذن تكون كامل فى صلواتك وكامل فى مذاكرتك وكامل فى معاملتك للناس وكامل فى حياتك كلها. فالمذاكرة جزء من روحياتك. وإذا قصّرت فى المذاكرة مفروض تعترف بيها على أب أعترافك زى أى خطية لأن خطية دي … قله المذاكرة دى خطية. وكل أسبوع تعمل لنفسك يوم تراجع فيه على دروس الأسبوع كلها. وبالشكل دا تمشى كويس.

فيه ناس آباؤهم وأمهاتـهم بيمنعوهم عن الخدمة وعن الكنيسة وعن الاجتماعات بسبب الدروس، لكن لو إنتوا كنتوا مخلصين للمذاكرة طول الأسبوع مش معقول أبداً ها يمنعوكم عن الكنيسة أو عن الاجتماع لأنـهم شايفينكم طول الأسبوع بتذاكروا ولما تذاكروا طول الأسبوع ها يسمحوا لكم آخر الأسبوع تروحوا زى ما أنتوا عايزين. أخلصوا للمذاكرة بتاعتكم وللكهنة ولكل حاجة … ويفتكروا إن الواحد لما يتدين يفشل و … يكونوا كاملين وربنا يساعدكم.

وإذا زهقتوا من درس أمسكوا درس تانى، زهقتوا من علم أمسكوا علم تانى.

ولما تقعدوا تذاكروا إثبتوا ما تتنططّوش. فيه واحد يقعد 5 دقايق 10 دقايق يلاقى نفسه طلع كدا قام من على الكرسى بلا مناسبة وخرج، يسلم على واحد من أهل البيت، يتكلم مع واحد، يفتح الشباك، يبص، يقابل … ما عندهوش تقل على الكرسى. لازم يكون عندكم تقل على الكراسى تقعدوا ما تقوموش بسرعة. لأن القلق وعدم الثبات دا مش كويس. والإنسان اللى يذاكر 10 دقايق ويمشى و5 دقايق ويمشى مذاكرته ما بتكونش مركّزة. لتكن لكم المذاكرة المركزة الثابتة التى لا تُحارب بالقلق ولا الملل ولا الضجر ولا الزهقان. وكلما تحارب بالزهقان إثبت أكتر. وفيه واحد يذاكر ويبقى عنيه فى الكراس وودانه بره الأودة، وسامع إيه اللى بيجرى فى البيت وإيه المناقشات وعقله مش فيه. طبعاً دى مش طريقة مذاكرة … مش طريقة مذاكرة. وفيه واحد يذاكر ويسرح ودى برضه مش طريقة مذاكرة.

حاولوا انكم تركزوا. وقولوا لنفسكم إن حياتنا ومستقبلنا بتتوقف على هذه المذاكرة. ياما فيه ناس مساكين فى الثانوية العامة على نمرة واحدة ولا نص نمرة أتغير مستقبلهم كله … على نمرة ولا نص نمرة. فما دام نمرة ولا نص نمرة تضيّع الواحد أهتموا انتوا بحياتكم الدراسة … وربنا يساعدكم.

والحاجة اللى ما تعرفوهاش حاولوا إنكوا تكدوا زهنكم لغاية ما توصلوا. فيه إنسان إذا ما عرفش حاجة عايز درس خصوصى، وكل حاجة يجيب لها درس خصوصى ويبقى دا زى العربية اللى ما تمشيش إلا بالزّق. مش عارف … من نفسه مش ماشى. حاولوا إنكم تفهموا، شغلوا زهنكم. الذكاء … فيه ذكاء فطرى وفيه ذكاء مكتسب. والذكاء الفطرى أيضاً بالتمرين بيزداد والمكتسب بالإهمال بيضعف. حتى الذكاء الفطرى بالإهمال بيضعف. فإنتوا نمّوا التفكير، موهبة التفكير دى حاجة جميلة جداً. كلما تنمّوا التفكير عندكوا كلما تزدادوا عقلاً وذكاءً وفكراً والمواهب بتاعتكم تثقل (الخلاص وكيف يكون ؟ 07/10/1977).

هل تفيد النغمة فى القداس ؟

س: لماذا يصلّى أبونا القداس بالنغمة ؟ وهل تفيد النغمة فى القداس لأن غير المسيحيين يقولون إن إحنا نغنى ؟

ج: لا يا حبيبى الموسيقى الدينية موجودة فى كل دين على الأرض، الموسيقى الدينية. تجد حاجات مرتلة وملحنة حاجات كتيرة جداً يعنى … فمش المسيحيين بس اللى بيستخدموا الموسيقى، الموسيقى موجودة فى كل دين من الأديان. حتى مزامير داود كانت بالموسيقى فى العهد القديم. والتراتيل فى كل دين فيه تراتيل بتكون موسيقى. فالموسيقى بتعطى تأثير فى النفس وساعات فيه ناس حتى فى صلواتـهم الخاصة يقولوها بغمة بتعطيه هو نفسه تعزية خاصة يعنى وإلا بتتكلم على القداس ليه ؟ طب ما التراتيل نلغيها ؟! الألحان نلغيها ؟! حتى فى داود المزمور لما بيقول سبحوا للرب تسبيحاً جديداً فيه بعض الناس بيترجموها غنوا للرب أغنية جديدة.

سفر نشيد الأناشيد أهو نشيد وبيسموها Song Of Song يعنى أغنية الأغنيات يعنى برضه أهه أغانى.

والكتاب بيقول: بتراتيل وتسابيح وأغانى روحية مترنمين فى قلوبكم للرب. فهى مش مسألة واحد بيغنى دا بيغنى لربنا. طب ياريت إنت تغنى لربنا. الإنسان يحب الموسيقى، فالموسيقى لما تخش فى النواحى الدينية مش غلط. وخصوصاً إن الموسيقى الدينية تتصف بالروحانية ونغماتـها نغمات مقدسة وتختلف عن نغمات العالم. وإلا سندين الموسيقى عموماً وطبعاً كل ناس عندهم موسيقى مش إحنا بس دا حتى الموسيقى الدينية كانت موجودة فى مصر الفرعونية حتى من زمان والألحان الجنائزية … موجودة الألحان فى كل دين من الأديان (ما هى الفضيلة ج2 23/10/1991).

صدقة قدام الناس

س: واحد بيقول مكتوب كل من سألك فأعطيه صدقة، وحاجة تانى أحذروا من أن تصنعوا صدقتكم قدام الناس. فكيف أُعطى المحتاج قدام الناس وقد حذّرنا المسيح ؟

ج: ما تاخدش نص الآية وتسيب النص التانى. هو بيقول أحذروا أنكوا تصنعوا صدقتكم قدام الناس لكى ينظروكم. يعنى الغلطة إنك بتدّى لكى ينظروكم، علشان الناس التانيين ينظروكم. فإذا كنت إنت بتعطى فقير وليس قصدك إطلاقاً أن ينظرك الناس يبقى ما أخطيتش. هى الغلطة كلها فى عبارة لكى ينظروكم. يعنى اللى هدفه إن الناس تشوفه وهو بيعطى. فإذا أعطيت شفقةً، وعطفاً، وحباً حتى لو نظرك الناس … مش خطأ. ما الناس بيشوفوك داخل الكنيسة وبتصلّى، هل ما تصليش أحسن يشوفوك ؟! لكن مش هدفك إنت إنك بتخش علشان يشوفوك. والناس بيشوفوك إنك بتتناول، فهل ما تتناولش أحسن شافوك ؟! مش هدفك من المناولة إنـهم يشوفوك. لكن إذا كان هدفك إن الناس يشوفوك يبقى هنا الغلطة مش الغلطة فى الصدقة، الغلطة رغبتك فى إنـهم يشوفوك (شبه الشر 22/10/1986).

هل الأكل الكتير خطية ؟

س: واحد بيسأل بيقول هل الأكل الكتير خطية ؟

ج: لأ طبعاً. الأكل الكتير مش خطية إذا كان جسم الإنسان يحتاج إلى هذا الأكل، لأن فيه إنسان صحته تحتاج إلى تغذية وتحتاج لأكل. لكن الخطأ هوّ شهوة الأكل. فيه فرق بين الأكل وشهوة الأكل. شهوة الأكل هىّ اللى غلط. حتى لو كانت لأكل قليل لكن فيه شهوة. كمان الأكل الكتير جايز يتعب المعدة ويتعب الأمعاء ويتعب أجهزة الهضم كلها ويسبب أنواعاً من السمنة ومن الترّهل ومن إيه تانى … وجايز يعمل تخمة. فكل على قدّك وياريت ما تملاهاش على الأخر يعنى. يعنى أترك فراغاً فى معدتك وليس فراغ فى الأطباق بتاعت الأكل. ولما إنت تقع فى شهوة الأكل جايز شهوة الأكل تقودك إلى شهوات أخرى من شهوات الجسد. كل شئ بإعتدال كويس، كل شئ بإعتدال كويس حتى فى الروحيات. الإعتدال كويس لأن لما واحد بياخد فوق طاقته الروحية جايز بيقع فى أخطاء وفى بر ذاتى (تعالوا إلىّ وأنا أريحكم 15/10/1986، أنت تسأل وقداسة البابا شنوده الثالث يجيب 15، 22/10/1986).

السرقة

س: واحد بيسأل على حكاية الشخص اللى كان بتاع الشربات دا … وأنقذه من الفضيحة الأنبا رويس وبيقول القصة فيها سرقة ؟

ج: طبعاً فيها سرقة ما نقدرش نقول حاجة، والراجل كان غلطان. لكن هدف القديسين أنـهم ينقذوا الشخص لكى يتوب ويرجع إلى الله. إذا كان حتى فى العقوبات اللى موجودة فى الدولة بالنسبة للسجن بيسمو السجن تـهذيب وتأديب وأصلاح. فإذا كان أخر عقوبة ياخدها السارق إنه ياخد إلى هذا التهذيب والتأديب والإصلاح. فالأنبا رويس بالطريقة دى قاد هؤلاء الناس إلى التوبة. وفعلاً هذا الشخص تحول إلى رجل مبارك. محبة الأنبا رويس عملت فيه كثيراً وتاب. وطبعاً التوبة بتستلزم أرجاع الأشياء اللى بيكون ظلم فيها غيره. لكنه أصلح نفسية هذا الإنسان بالحب وبالانقاذ من الفضيحة. لأن طريقة القديسين مش إنـهم يفضحوا الخاطى، علشان بالفضيحة ياخد عقوبة. طريقة القديسين هى أنقاذ الخاطئ علشان يُعطى فرصة إنه يمشى صح، لأن فيه كتير من الناس لما يتفضحوا خالص ما يقدروش يقوموا تانى، الدنيا تظلم أمامهم وما يقدروش يقوموا ويظل ماضيهم يطاردهم إلى الأبد. بينما لو ربنا ستر عليهم وخباهم بتُعطى ليهم فرصة للتوبة فى أنـهم ما يكونوش مفضوحين أمام الناس. وأحنا بنشكر الله لأنه سترنا … أول حاجة بنقولها لأنه سترنا. ربنا بيستر وما بيفضحشى زى البشر، البشر غاويين يفضحوا غيرهم لكن ربنا بيستر وبيخبى.

أنتوا عارفين قصه الأنبا مقاريوس الكبير لما قال له: طوباك يا أنبا مقاريوس لأنك غطيت الخطية بالزبدية … القصة دى معروفه ليكم كلكم تجدوها فى بستان الرهبان، وقيل له إنك إنت تشبهت بخالقك الذى إيه … يستر الناس ويخفى خطاياهم. والكتاب بيقول: المحبة تستر كثرة من الخطايا. والناس كلها بتطلب من ربنا الستر مش الفضيحة. وممكن إن الخاطئ يُصلح (فى ذكرى الأنبا رويس، كيف نحب الناس 30/10/؟ ؟ 19).

بيع السجائر

س: هل بيع السجاير حرام. علماً بأني لا أدخن ؟

ج: يعني إنت لا تدخن وتحب الناس يدخّنوا. السجاير مضرّة، مضرّة بالصحة حتى إن الصحة العالمية بتكتب اعلان مع كل بتوع السجاير يكتبوا (التدخين مضر بالصحة) وساعات بتتسبب في سرطانات وبتتعب التنفس وبتتعب الصدر وساعات لو خدوا صورة للصدر يلاقوها سوداء من الدخان اللي موجود. فالسجاير مضرّة بالصحة ومضرّة بالفلوس أيضاً زي واحد معاه فلوس بيحرقها بنار وفيه غيره أولي بيها، ومضرّة بالإرادة. فالسجاير بتضيّع صحتك بتضيّع فلوسك بتضيّع إرادتك ولما تبيع سجاير يبقي كأنك بتدعوا الناس إلي هذا الضرر.

أنا من رأيي بالنسبة لصاحب السؤال يدوّر علي حاجة تاني يبيعها، يعني فيه حاجات كتير، خردوات مثلاً، أدوات مدرسية … (مثل العشر عذارى 21/10/1998).

الزواج العرفى زنا رسمى

س: واحد بيقول رجل مسيحى متزوج ومعه طفل ثم تزوج من امرأة أخرى وأنجب منها طفل وعندما علمت زوجته الأولى قال لها أنه متزوج من الأخرى زواج عرفى. فهل يوجد هذا فى شرعنا ؟

ج: طبعاً لأ. الزواج العرفى فى شرعنا هو زنا رسمى، والزواج المدنى زنا رسمى. لا عندنا لا عرفى ولا مدنى. ما دام مش سر من أسرار الكنيسة يبقى زنا رسمى.

س: فما هو الحل وصاحبة المشكلة تطلب من قداستكم المقابلة ؟

ج: قولوا لها الحل إنـها تقنع زوجها أن يسيب الزوجة التانية ويتوب ويرجع لعقله. وأن ما تابش من حقّها إنـها تطلّقه بسبب الزنا ويبقى يطابق كلام الكتاب المقدس. دا تنازل منها أنـها تغفر ليه (شبه الشر 22/10/1986).

الزواج على الورق بالخارج هل هو خطية ؟

س: واحد بيقول ما رأى قداستكم فى الزواج على الورق فى البلاد الأجنبية، هل هو خطية ؟ وهل فيه مشاكل ؟

ج: طبعاً هو لجوء لأسلوب بشرى، وطبعاً ها يجوّز وها يطلّق وهو ما عاشش مع مراته. نوع من الخداع يعنى … نوع من الخداع للوصول إلى إنه ياخد إقامة. حالياً دلوقتى فى أمريكا لأنـهم عرفوا اللعبة ديا، بيحاولوا يفتشوا عليهم فى البيت. فلو راحوا فتشوا وما لاقوش الراجل مع مراته يعرفوا أنـها لعبة على الورق. فيعملوا له Deportation يعنى يوديه للمطار ويقول له أتفضل روّح بيتكم وما ليكش حاجة، يعنى يرحّلوه … يرحّلوه. لكن كون ياخدها معاه فى البيت ما دى حكاية أصعب يبقى بقت زواج فعلى ما بقاش زواج على الورق. نوع من الخداع بيخدع بيه الحكومة (مثل الزارع 28/10/1998).

فى حكم الميت أو المفقود

س: واحد بيقول سمعنا من بعض الكهنة فى مكان ما أنه ممكن للمسيحى أن يطلق زوجته بعد مضى 3 سنوات من الزواج … إلى آخره ؟

ج: بولس الرسول بيقول إن بشرناكم نحن أو ملاك من السماء بغير ما بشرناكم به فليكن أناثيما، فليكن محروماً. يعنى لو جالك ملاك من السما مش قسيس، لو جالك ملاك من السما وبشّرك بشئ  ضد الانجيل … فليكن محروماً ولا تسمع كلامه. الكتاب المقدس شرح هذه النقطة شرحاً وافياً لا طلاق إلا لعلة الزنا، دا مش تعليم مننا، دا تعليم الكتاب المقدس. فإذا كان واحد يتكلم ضد وصايا الانجيل لا نقبل منه، مهما كانت وظيفته الكهنوتية، ربنا فوق الكل. ينبغى أن يطاع الله أكثر من الناس. وكل الناس اللى بينفذوا الحاجات دى بيخالفوا ضميرهم. طب واحد يجيب لى آية … على إن بعد 3 سنوات دى.

+ حكاية 3 سنوات دى جات منين ؟ كان زمان فى الحروب فيه ناس بيفقدوا فى الحروب ويدوّروا عليهم ما يلاقهومش، فطلع من أيام جوستنيان وغيره إن الشخص اللى يغيب بعد الحرب 3 سنوات أو 5 يعتبر فى حكم الميت أو المفقود وممكن مراته تتجوز، يعنى مش يطلّقوا … تعتبر كأنـها أرملة (نشيد الأناشيد: فى الليل على فراشى

10/10/1975).

قدسية الأرامل (القديسه حنة النبية)

     النهار دا عشية 6 بابه لعيد القديسة حنة النبية.حنة النبية ديا هى التى عاصرت ميلاد السيد المسيح لما جه للهيكل. هى تدينا فكرة لطيفة عن قدسية الأرامل. يعنى كثير من الناس بيفتكروا أن القداسة محصورة فى الرهبان أو فى البتوليين، لكن الأرامل تمثلهم القديسة حنة النبية.

+ اتجوزت وبعد 7سنوات ترملت، وقضت فى ترملها 84 سنة، 84 سنة فى ترملها عابدة بأصوام وطلبات وسبّحت الرب فى ميلاده كما سبّح أيضاً سمعان الشيخ. تمثل الشيخوخة المقدسة وتمثل الترمل المقدس وتمثل حياة الوحدة. لأن قيل عنها فى لوقا إصحاح2: أنـها لم تفارق الهيكل فى الـ 84 سنة. لم تفارق الهيكل عابدة بأصوام وطلبات.

أنا فاكر لما وضعت الترتيلة أو المديحة بتاعت القديس الأنبا أنطونيوس قلت فيها 3 تشبيهات: أُعطيت روح إيليا وحنة النبية ويوحنا بن زكريا … بنيوت آفا انطونيوس. فيعنى اتوصفت فى المديحة ديا … مثلاً للناس اللى عاشوا حياة الوحدة والصلاة. يوحنا بن زكريا هو يوحنا المعمدان، وإيليا النبى وحنة النبية … بركة صلواتـهم تكون معنا.

+ هى أيضاً تعطينا فكرة عن قداسة المرأة، فى شهر أكتوبر عندنا قديسات كثيرات:

 فى يوم 9  أكتوبر تذكار شهادة القديسة اربسيما.

وفى يوم 11 اكتوبر شهادة القديسة انسطاسيا.

ويوم 16 أكتوبر ـ اللى هو بكرة ـ القديسة حنة النبية.

ويوم 21 أكتوبر نياحة القديسة بيلاجية التائبة.

بركة صلوات هؤلاء النساء القديسات تكون معنا آمين (مذاقة الملكوت 15/10/1997).

أقرباء الراهبات

س: هل من حق رئيسة الدير أن تمنع زيارة أقرباء الراهبات ؟     

ج: آه من حقها. من حقها طبعاً وخصوصاً إذا كان أقارب الراهبات بيخشوا يقابلوا الراهبة ويملوا عقلها بأخبار وأفكار يمكن تعكنن عليها طول الأسبوع. يعنى تصوروا مثلاً واحدة تركت العالم وراحت تترهبن وبعدت عن العالم وأخباره وأفكاره ومشاكله ومتاعبه وبعدين تيجى لها واحدة من قرايبها تزورها مش تكلمها كلام روحى تجيب لها أخبار أمها وأبوها وخالتها وعمتها والمشاكل اللى فى البيت والمشاكل اللى فى المدرسة واللى المشاكل اللى فى الأهالى وتملى عقلها بكلام تعكنن عليها طول الأسبوع، ويدوبك على بال ما أمنا الريسة تعالج هذه الحالة وترجّع البنت لحالتها الأولى تيجى زيارة تانى تكمّل عليها.

كتير منكم لا يحسنون طريقة الزيارة فى الدير، إن راهبة سلكت فى نسك شوية وقرايبها دخلوا ولقوها رفعت شوية … يا عينى يا أختى يا مسكينة، ياللى كنتى فى البيت متعززة دلوقتى ذلوكى فى الدير، نجيب لك أكل، نجيب لك لبس، نجيب لك تقوية، نجيب لك كذا. دا إنت عيانة، دا دمك مخطوف، دا وشك أصفر لغاية لما يعييوا البنت. الـ … دا مش تمام وبعد كدا يزعلوا ويقولوا هل من حق الريسة تمنع القرايب ؟ طبعاً من حقها لأن حياة الراهبة دى أمانة فى إيديها … أمانة فى إيديها. أما الأقارب القديسين اللى كل ما يزوروا الدير يملوه نعمة ويزودوا روحياته فا مش ممكن أبداً الريسة ها تمنعهم عن مقابلة قرايبهم (محاضرة الخلاص وكيف يكون 07/10/1977).