أصل كلمة كريسماس

… قلت لهم مثلاً أنتوا كمان شويه ها تحتفلوا بعيد الكريسماس، طب الكريسماس دى جات منين ؟ عايزين يعنى نعمل Analyzing  للـ

Construction بتاعت الكلمة بتاعت كريسماس دى … جات منين ؟ كريسماس دى عبارة عن إتحاد كلمتين، كرستوس باليونانى يعنى المسيح، منها كرايس. وماس. طب ماس دى جات من أى لغة ؟ حاولوا تشوفوها بالإنجليزى بالفرن

ساوى بالتليانى مش ممكن. دى هى قبطية مصرية. يعنى مثلاً تحت ماس: يعنى المولود من تحوت ما هو ماس جاية من كدا. بالقبطى ميسى يعنى يلد. ماس يعنىى مولود أو ميسيس يعنى مولود. مثلاً تقول رمسيس: راع مسيس … يعنى المولود من رع. تحتماس .. المولود من تحوت. وإلا هاتولى فى أى لغة ماس دى جات منين ؟ كلكم بتحتفلوا بالكريسماس والكريسماس دا إحنا إللى مركبين الكلمة بتاعته (تعليق قداسة البابا على الرحلة إلى أمريكا 13/12/1989).

الخلاف فى الصوم مع البروتستانت والرد عليه

س: واحد بيسأل عن الصوم والخلاف بيننا وبين البروتستانت فى الصوم، وإيه الرد عليه ؟

ج: البروتستانت ما عندهمش صيام منظّم، يعنى ممكن أى واحد يصوم أى يوم يعجبه فى منتهى الحرية وممكن يصوم ينقطع عن الطعام بالنهار وباليل ياكل له فرخة فرختين زى ما يحب … يعنى ما يهمّش نوعية الطعام. فما عندهمشى الصيام الجماعى وما عندهمش الصيام النباتى، وما عندهمش الإرتباط بمواعيد معينة زى مثلاً إحنا نقول صوم الميلاد من كذا لكذا من 25 نوفمبر لـ 7 يناير، صوم العدرا من 7 أغسطس لحد 22 … إلى آخره. الصوم الكبير 7 أسابيع والتامن أسبوع الآلام، ما عندهمش الحاجات دى. فإحنا ممكن نرد على الكام نقطة دول بسرعة وبعدين نخش فى موضوعنا:

أول حاجة: البروتستانت يقول الصوم بيكون فى الخفاء فإنت لما تصوم الأربع والجمعة معناها إن معروف إنك صايم، والمسيح بيقول إذا صمت روح أدهن رأسك بالزيت ولا تبدوا صائماً وأبوك الذى يرى فى الخفاء يجازيك علانية.

+ فى دى إحنا نرد ونقول المسيح بيتكلم عن العبادة الشخصية وليس عن العبادة العامة. زى ما بيقول إذا صليت أدخل مخدعك وأغلق بابك دى الصلاة الفردية وليس الصلاة العامة. لا يمنع إطلاقاً إن الناس يروحوا الكنيسة يصلّوا وإلا نقول لإخوتنا البروتستانت لما إنتوا تروحوا الكنيسة وتصلّوا وكل واحد يشوفه الباقيين بيصلّى يبقى أنكر الآية اللى بتقول أدخل إلى مخدعك وأغلق بابك. ولما يقف يرتل بكل حماس ومبسوط فى الكنيسة نقول له لأ روح رتّل فى الخفاء وأغلق بابك ؟! دا حتى لو غلق بابه ورتّل بصوت عالى الجيران ها يسمعوا. العبادة الجمهورية، العبادة العامة غير العبادة الفردية.

+ إنت بتعطى الصدقة فى الخفاء لكن لا مانع إن فى وقت من الأوقات الكنيسة كلها بتجمع تبرعات وبتدفع فى الوسط، زى ما جه داود يبنى الهيكل، أو يجهّز لبناء الهيكل الناس أنتدبوا يعنى تبرعوا، كل واحد بقى يدفع … بقى يدفع … بيقى يدفع. ومثل الناس اللى كانوا بيحطّوا فى الصندوق والمسيح شاف الأرملة اللى وضعت فلسين. ففيه عطاء فى الخفاء وعطاء عبادة عامة للناس كلها. وفيه صوم فى الخفاء وصوم عام، وفيه صلاة فى الخفاء وفيه صلاة مع الناس كلهم، المجمع كله بيصلّى، زى ما التلاميذ أجتمعوا كلهم وصلّوا بنفسٍ واحدة، هل كون إن كلهم صلّوا بنفس واحدة معناها كسروا وصية المسيح اللى بيقول خش وأغلق بابك ؟! لأ. دا شئ ودا شئ. فخلط بين هذا وذاك. كمان ديا تخش فى هل مثلاً فى المسيحية أو فى الكتاب المقدس فيه أصوام عامة ولا كله فى الخفاء ؟ لأ فيه أصوام عامة. خذوا مثلاً الصوم الذى فرضته الملكة أستير على الشعب كله، كان كل الشعب صايم. كله مع بعض يصوم، مافيش مانع إن الكل يصوم. خدوا مثلاً الصوم اللى تكلم عنه يوئيل النبى فى سفر يوئيل وقال: قدسوا صوماً نادوا بإعتكاف العريس يخرج من حجلته وكذلك العروس والكهنة يبكوا فى المذبح وكل دا صيام عام بيصومه الناس كلهم، فمافيش مانع أبداً إن يوجد صوم عام. والرسل ما صاموا صوماً عاماً، المسيح قال: حينما يرفع عنهم العريس حينئذٍ يصومون، كلهم صاموا. وفى أعمال 13 يقول: فيما يخدمون الرب ويصومون قال الروح القدس أفرزوا لى برنابا وشاول. وبولس الرسول صام هو وأهل السفينه كلهم. الصوم الجماعى دا ممكن. وفى الكتاب أيضاً من أمثلة الصوم الجماعى فى العهد القديم صوم أهل نينوى الكل صام، وكان صوماً مقبولاً. مش بس الواحد يخش ويغلق بابه … لأ الكل صاموا وربنا قبل صومهم وأستجاب لصلواتـهم. فممكن وليس فى الصوم الجماعى رياء وليس فى الصوم الجماعى خطية والكنيسة مارست هذا الصوم الجماعى.

طب إيه حكاية المواعيد … وهل الكتاب يمنع مواعيد للصوم ؟ لا أبداً. ربنا كان بيوصّى الناس على هذه المواعيد كما ورد فى سفر زكريا النبى إصحاح 8 بيقول يتكلم عن وكان إلىّ كلام رب الجنود قائلاً هكذا قال رب الجنود إن صوم الشهر الرابع وصوم الخامس وصوم السابع وصوم العاشر يكون لبيت يهوذا … إلى آخره. إذن فيه أصوام محددة فى الكتاب ولا يوجد ما يمنع هذا. وأيضاً الصوم الجماعى والصوم المحدد لا يمنع إطلاقاً إن الواحد فى أى وقت يحب يصوم ممكن يصوم (أنت تسأل وقداسة البابا شنوده الثالث يجيب 15، 22/07 ـ 12/08/1987).

الجحيم الأول هو الذاكرة

فية حاجة مهمة خالص هنا أصعب شئ بعد الموت قبل حكم الدينونة هو الذاكرة … خلى بالكم من الكلام دا يعنى إية أصعب حاجة هو الذاكرة ؟ الإنسان أول ما يموت يبص يلاقى روحه وهى طالعة من الجسد بدأت تتذكر كل شئ تتذكر جميع خطاياه، تتذكر جميع سقطاته، تتذكر جميع نجاساته، تتذكر جميع ضعفاته كل ديا تبقى أمامه يحاول يطلّعها من ذهنه لا يستطيع. ذاكرة أوسع بكثير من ذاكرته على الأرض، على الأرض جايز ينسى لكن أصعب حاجة إنه يبص يلاقى زى فيلم قصاده يعنى إية ؟ يعنى ذاكرة أسرع فى التذكر بسرعة يجد أنه تذكر كل حاجة، ذاكرة شاملة تتذكر كل حاجة من أول ما أتولد لغاية اللحظة ديا، تذكرة تذكّر بالحادث وبالصورة وبالكلام وبكله. ذاكرة بغير إرادته يعنى مش هو عايز يتذكّر دا عصب عنه تتحط قصاده ويتذكر كل اللى عمله حادثة حادثة وخطية خطية وسقطة سقطة … ذاكرة. وذاكرة دائمة وذاكرة شاملة يحاول أن ينسى فلا يستطيع فتصبح ذاكرتة هى جحيم … جحيم له قبل أن يدخل إلى الجحيم. كما قال ذلك الشاعر كجحيم ذلك الماضى كشيطان مريع قائماً ضدى فى صحوى وأيضاً فى هجوعى … جحيم. يعنى الغنى دا مافيش شك تذكّر كل ترفه والمسكين اللى جنبه، تذكّر الغلبان بقروحه، وتذكّر إنه ما عملش ليه حاجة وتذكّر إنه بيمر عليه كل يوم ولا يأبه ولا يعبأ و … كله كله كله كله كله ذاكرة. على رأى اللى قال الجحيم الأول هو الذاكرة … الجحيم الأول هو إيه ؟ هو الذاكرة. يتذكر خطاياه التى كان يلتذ بـها والآن أولاً لا يجدها. ثانياً لا يلتذ بـها بل يتعذب بـها. قال له تذكّر يا إبنى … أتذكّر أنت كنت ماشى إزاى فى الدنيا ؟! إنت نسيت ولا إيه ؟! وييجى الإنسان يقول أين أهرب من هذا الجحيم … الجحيم اللى جوايا فى ذاكرتى فى عقلى قائم ضدى فى صحوى وأيضاً فى هجوعى. كل ما تعمله يحفر فى ذاكرتك ويطبع فى ذاكرتك كشريط يعبر أمامك بعد الموت كله مرة واحدة. عارفين يعنى إيه كله مرة واحدة الذاكرة الشاملة ديا ؟ زى واحد مثلاً يقف فوق جبل يبص يلاقى السهل كله عينه تستطيع أن ترى الدائرة كلها مش حاجة واحدة كله كله مرة واحدة، يعمل إيه فى دى ؟! مافيش شك أن الغنى يعنى شاف كلة. قال له تذكّر يا إبنى. أيضاً تذكّر العز الذى كان يعيش فية والغلب اللى هو دلوقتى موجود فية. على رأى أيوب الصديق لما قال فى أيوب 29: ليتنى كنت كما فى الأيام السالفة حين رضى القدير على خيمتى والصخر سكب لى جداول زيت رآنى الأطفال فأختبأوا والأشياخ قاموا ووقفوا لأن العين طوبتنى … طب وفين دلوقتى ؟! هو الآن فى عذاب عذاب من تعب نفسه، عذاب من المقارنة بين حياته فى العالم وحياته دلوقتى والمقارنة بينه وبين لعازر، عذاب من جهة أخوتة، عذاب من جهة ذاكرته، عذاب من جهة غضب الله علية، عذاب لأنه بدأ يحصد ما قد زرعه (مثل الغنى ولعازر 03/03/1999).

يسلّم مثل هذا للشيطان … (1كو5: 5)

س: نرجو توضيح معنى الآية التى تقول أن يسلّم مثل هذا للشيطان لإهلاك الجسد لكى تخلص الروح فى يوم الرب. فكيف يسلّم الشخص للشيطان ؟ وتخلص الروح ؟    

ج:  يعنى إن ربنا يسمح للشيطان أن يضرب هذا الإنسان فى الجسد كما سمح للشيطان فى قصة أيوب، ضربه فى الجسد بقرح ردئ بأمراض أتعبته جداً فيبقى كأنه سلم للشيطان يعنى أُعطى الشيطان تصريحاً أو سماحاً بأنه يتعبه بالجسد. لكى تخلص الروح يعنى لما الجسد يبتدى يتعب يندم على خطيته ويتوب وتخلص الروح. لأن كثير من الآلام إذا أستغلت حسناً تكون لفائدة الإنسان. آدى الحكاية بتاعت يسلّم للشيطان يعنى يُعطى سماح للشيطان. لأن الشيطان من تلقاء نفسه ما بيقدرش يضر. دا فى قصة أيوب أخد إذن فى الأول فما عندهوش قدرة (البابا شنوده الثالث. محاضرة: فليضئ نوركم قدام الناس 24/12/1986).