• مجموعة أنت تسأل وقداسة البابا شنوده الثالث يجيب +

1. أنت تسأل وقداسة البابا شنوده الثالث يجيب ج1: الحياة بالروح، لا تطفئوا الروح 20، 27/11/1985
2. أنت تسأل وقداسة البابا شنوده الثالث يجيب ج2: لا تحزنوا الروح، الشركة مع الروح 04، 11/12/1985
3. أنت تسأل وقداسة البابا شنوده الثالث يجيب ج3: ثمار شركة الروح فى حياتنا، رأس السنة (السنة الجديدة) 18، 25/12/1985
4. أنت تسأل وقداسة البابا شنوده الثالث يجيب ج4: التجربة على الجبل ج1، ج2 19، 26/03/1986 – التجربة على الجبل ج3، ج4 02، 09/04/1986
5. أنت تسأل وقداسة البابا شنوده الثالث يجيب ج6: الخطية الثانية، الاستعداد لأسبوع الآلام 16، 23/04/1986
6. أنت تسأل وقداسة البابا شنوده الثالث يجيب ج7: ؟ 1986 (05/1986)
7. أنت تسأل وقداسة البابا شنوده الثالث يجيب ج8: تعالوا إلىّ يا جميع المتعبين، شبه الشر 15، 22/10/1986
8. أنت تسأل وقداسة البابا شنوده الثالث يجيب ج؟: كونوا كاملين، العمل الروحى فى الخفاء 18، 25/03/1987
9. أنت تسأل وقداسة البابا شنوده الثالث يجيب ج19: لا تكنزوا لكم كنوزاً، تأملوا طيور السماء 29/04، 06/05/1987
10. أنت تسأل وقداسة البابا شنوده الثالث يجيب ج20: لا تدينوا 13/05/1987، الإكليريكية 12/05/1987. 12، 13/05/1987
11. أنت تسأل وقداسة البابا شنوده الثالث يجيب ج؟: أدخلوا من الباب الضيق، أحترزوا من الأنبياء الكذبة 10، 17/06/1987 (ج24)
12. أنت تسأل وقداسة البابا شنوده الثالث يجيب ج25: من ثمارهم تعرفونـهم، البيت المبنى على الصخر 01، 08/07/1987
13. أنت تسأل وقداسة البابا شنوده الثالث يجيب ج26: الإيمان، الجدية فى الحياة الروحية ج1، حياة التدقيق 15، 22/07 – 12/08/1987
14. أنت تسأل وقداسة البابا شنوده الثالث يجيب ج؟: الجدية فى الحياة الروحية ج2 – حياة التدقيق، إن عشنا للرب نعيش 29/07 – 12، 26/08/1987
15. أنت تسأل وقداسة البابا شنوده الثالث يجيب ج؟: كونوا قديسين، حياة الإنتصار وكيف تكون ؟ 02، 09/09/1987
16. أنت تسأل وقداسة البابا شنوده الثالث يجيب ج؟: عمل الله معنا، انتظار الرب، الباب المفتوح فى السماء، اهتمام الله بالصغار 16، 23، 30/09/1987 – 07/10/1987
17. أنت تسأل وقداسة البابا شنوده الثالث يجيب ج43: صعب عليك أن ترفس مناخس، الصعود 11، 18/05/1988 – الإكليريكية 17/05/1988
18. أنت تسأل وقداسة البابا شنوده الثالث يجيب ج48: تأثير البيئة، الضمير 30/11، 07/12/1988
19. أنت تسأل وقداسة البابا شنوده الثالث يجيب ج؟: الكبرياء والعظمة، فضيلة ضبط النفس 01، 08/02/1989
20. أنت تسأل وقداسة البابا شنوده الثالث يجيب ج؟: الثنائية، التجديد، عندى عليك أنك تركت ج2 15/02 – 08، 22/03/1989
21. أنت تسأل وقداسة البابا شنوده الثالث يجيب ج؟: وإذ لم يكن له أصل جف، الروحانية 22/02، 01/03/1989
22. أنت تسأل وقداسة البابا شنوده الثالث يجيب ج؟: الأكاليل، التسيب، ضعف الطبيعة البشرية 05، 12، 19/04/1989
23. أنت تسأل وقداسة البابا شنوده الثالث يجيب ج؟: القيامة، نـهاية أمر خير من بدايته 10، 17/05/1989
24. أنت تسأل وقداسة البابا شنوده الثالث يجيب ج؟: الأكاليل … الخدمة بمناسبة صوم الرسل 05، 12، 19/04 – 28/06/1989
25. أنت تسأل وقداسة البابا شنوده الثالث يجيب ج؟: طرق تبدو مستقيمة، لكل أمر تحت السموات وقت 24، 31/05/1989

1. أنت تسأل وقداسة البابا شنوده الثالث يجيب ج5: القيامة، الإكليريكية ؟ 1986
2. أنت تسأل وقداسة البابا شنوده الثالث يجيب ج13: (الإكليريكية – بدون تاريخ) ؟ 1986
3. أنت تسأل وقداسة البابا شنوده الثالث يجيب ج؟: (الإكليريكية) 21/02/1989
4. أنت تسأل وقداسة البابا شنوده الثالث يجيب ج؟: أقوال الآباء، … الإكليريكية 18/04/1989 – 23/05/1989

• مجموعة سنوات مع أسئلة الناس:

1. سنوات مع أسئلة الناس ج1: فى بداية العام الجديد، تأملات فى الغطاس، كيف نعرف الله ج1 01، 15، 22/01/1992
2. سنوات مع أسئلة الناس ج2: كيف نعرف الله ج1، كيف نعرف الله ج2، خطية القسوة 22، 29/01 – 12/02/1992
3. سنوات مع أسئلة الناس ج3: خطية القسوة، يونان النبى، أنا هو الأول والآخر، الوداعة ج1 12، 19/02 – 18، 25/03/1992
4. سنوات مع أسئلة الناس ج4: الوداعة ج1، الوداعة ج2، حتى المسيح كان له مقاومون 25/03 – 01، 08/04/1992

أنت تسأل وقداسة البابا شنوده الثالث يجيب ج1

أنت تسأل وقداسة البابا شنوده الثالث يجيب ج2

أنت تسأل وقداسة البابا شنوده الثالث يجيب ج3

أنت تسأل وقداسة البابا شنوده الثالث يجيب ج4

أنت تسأل وقداسة البابا شنوده الثالث يجيب ج6

أنت تسأل وقداسة البابا شنوده الثالث يجيب ج7

أنت تسأل وقداسة البابا شنوده الثالث يجيب ج11

أنت تسأل وقداسة البابا شنوده الثالث يجيب ج13

أنت تسأل وقداسة البابا شنوده الثالث يجيب ج19

أنت تسأل وقداسة البابا شنوده الثالث يجيب ج20

أنت تسأل وقداسة البابا شنوده الثالث يجيب ج22

أنت تسأل وقداسة البابا شنوده الثالث يجيب ج24

أنت تسأل وقداسة البابا شنوده الثالث يجيب ج26

أنت تسأل وقداسة البابا شنوده الثالث يجيب ج27

أنت تسأل وقداسة البابا شنوده الثالث يجيب ج28

أنت تسأل وقداسة البابا شنوده الثالث يجيب ج29

أنت تسأل وقداسة البابا شنوده الثالث يجيب ج30

سنوات مع أسئلة الناس

سنوات مع أسئلة الناس ج1 01.01.1992

سنوات مع أسئلة الناس ج2 25.03 – 08.04.1992

سنوات مع أسئلة الناس ج3 12.02 – 25.03.1992

سنوات مع أسئلة الناس ج4 25.03 – 08.04.1992

خرج من جنبه دم وماء إثبات للمعمودية

س: واحد بيتكلم على طعن السيد المسيح على الصليب وخرج من جنبه دم وماء فى يوحنا 19: 24. بيقول لماذا خرج من جنبه دم وماء ؟ وما الحكمة اللاهوتية من خروج الدم والماء ؟

ج: هو الدم والماء أثبات الحياة فإزاى بعد ما أتصفى دمه خالص يخرج منه دم وماء لدرجة إن آمن قائد المئة بـهذا. معجزة تثبت إن المسيح حى أو فية حياة.

لكن يعنى إحنا بناخدها بمعنى تانى فى إثبات المعمودية. لأن فى رسالة يوحنا الأولى فى الأصحاح الخامس آية 8 بيقول الذين يشهدون على الأرض ثلاثة الروح والماء والدم فقلنا إن الفداء … الفداء الذى تم بالدم ننالة بالماء والروح. يعنى خرج دم وماء، الدم عمل المسيح على الصليب لكن ننال مفعول الدم فى المعمودية بالماء والروح (قيامة المسيح 17/04/1996).

التجارب نافعة وضرورية

س: سؤال هل التجارب ضرورية لنمو حياتنا الروحية، وما هى فوائد التجارب بالنسبة للمؤمنين ؟ وما سر نصرة يوسف الشاب فى تجربته ؟  

ج: التجارب نافعة وضرورية لحياة المؤمنين وخصوصاً الذين لهم مواهب على رأى أحد القديسين يقول إذا أُعطيت موهبة فأطلب من الله أن يعطيك تجارب لأن التجارب تحفظ المواهب. التجارب تولد الإتضاع والإتضاع يحفظ المواهب … التجارب تولد الإتضاع والإتضاع يحفظ المواهب. من أهمية التجارب إن السيد المسيح لم يمنع نفسه عن التجارب فقيل عنه أنه كان مجرباً مثلنا فى كل شئ ما عدا الخطية. وقيل عنه أنه فيما كان مجرباً قادر أن يعين المجربين.

ونجد أن الله لم يمنع التجارب عن أحد من قديسيه تاريخ القديسين كله مليان بالتجارب. السيدة العذراء نفسها أكبر قديسة فى العالم عاشت فى تجارب صعبة من صغرها وبعد ولادتـها المسيح. والقديسين فى البرارى تعرضوا للتجارب والشهداء تعرضوا للتجارب والآباء البطاركة والأساقفة عُرّضوا للتجارب ويندر أن نجد قديساً بلا تجربة. والكتاب يقول أحسبوه كل فرح يا أخوتى حينما تقعون فى تجارب متنوعة … أحسبوه كل فرح حينما تقعون فى تجارب متنوعة.

أيوب الصديق مثال للتجربة التى تصيب الأبرار. ابراهيم أب الآباء جُرّب فى ابنه. داود النبى. دانيال النبى كله تجارب. فالتجارب ضرورية ونافعة.

التجارب مدرسة للصلاة … مدرسة للصلاة لأن كل ما الإنسان تشتد حوله الضيقة يرفع قلبه إلى الله لكى ينقذه من التجربة. أكتر أشخاص عندهم حرارة فى الصلاة هم الأشخاص المجربون … أكتر أشخاص عندهم حرارة فى الصلاة هم الأشخاص المجربون، التجارب مدرسة للصلاة.

فى التجربة يحتاج الإنسان إلى معونة وفى إحتياجه يلجأ إلى الله.

ثانياً التجارب مدرسة للإتضاع لما الإنسان ينسحق فى التجربة بيتضع قلبه.

ثالثاً التجارب مدرسة للحكمة والمعرفة … التجارب مدرسة للحكمة والمعرفة الإنسان الذى لم يُجرب تكون خبرتة ناقصة ومعرفته قليلة، الحكماء هم أهل التجربة وأهل الخبرة وأهل الحكمة.

بالتجارب أيضاً الإنسان بيزداد صلابة وقوة يعنى عوده يشتد ويصبح أكثر قوة. جايز أول تجربة الإنسان يتزعزع فيها لكن كل ما تيجى له تجارب كل ما يشتد، ما يتعبش بعد كدا بتعطى قوة فى الشخصية.

والتجارب أيضاً تعطى تعاطفاً بين الناس إنسان يحن على زميله ويساعده ويقف إلى جواره فتظهر فيها روح الأخوة والتعاون والمحبة.

وليست كل التجارب متشابـهه فيه تجارب مادية تختص بالحياة الإجتماعية والمال والوظيفة …

… كانت من الشيطان لهدم حياته الروحية من الداخل وهذا أصعب نوع من التجارب … دا أصعب نوع من التجارب، التجارب التى تـهز النفس زى الشكوك وتجارب الخطية زى تجربة يوسف الصديق كانت تـهز حياته كلها بس ربنا ساعده فلم يسقط.

سواء التجارب المادية أو التجارب الروحية ممكن إن الإنسان يخرج منها أكثر قوة … أكثر قوة، داود جُرّب تجربة روحية وسقط ولكنه قام أكثر قوة أخذ نقاوة أخذ دموع أخذ انسحاق أخذ توبة أخذ أتضاع، كثيرة هى البركات التى أخذها داود من التجربة التى وقع فيها.

الإنسان الصالح يستفيد من التجارب والإنسان الضعيف يتذمر على التجارب، ييجى له دجر وتذمر وصغر نفس ويأس وتعب وإضطراب وقلق وجايز استسلام. زى ما بيقول المثل إن الريح … الريح لما تـهب جايز تنزع العشبة الصغيرة لكنها لا تنزع السنديانة الضخمة بل تثبتها فى الأرض وتتعمق جزورها ويشتد ساقها. التجربة بتتعب الضعفاء ولكنها تقوّى الأقوياء، وإذا الضعفاء استفادوا منها يصيرون أقوياء.

بيقول ما هى سر نصرة يوسف الشاب فى تجربته ؟ سر نصرة يوسف إنه كان واضع أمامه ربنا باستمرار. بيقول كيف أخطئ وأفعل هذا الشر العظيم أمام الله. واضع ربنا أمامه. ربنا شايف وربنا واخد باله ودا اللى كان مدى يوسف النجاح فى التجربة إن واخد باله إن ربنا شايفة. طبعاً فيه أسباب أخرى ترجع إلى نقاوة قلبه وإلى عفته وإلى أمانته نحو مخدومه … إلى آخره (الخطية وتطورها، تأمل فى القطعة الثانية من صلاة الغروب (أسرع لى) ؟ 04/10/1974).

عدم إيقاد البخور أو شرب الأباركة فى المنزل

س: أرجو يا سيدنا أن توضح لنا معنى عدم إيقاد البخور فى المنزل لأن فيه خادم كبير وخريج الكلية الإكليريكية قال إن إيقاد البخور ولو بغرض عمل رائحة ذكية فى المنزل حرام ؟

ج: البخور دا تلاقوه دايماً فى السعودية … صحيح يعملوا بخور باستمرار ويبخروا كل حاجة، يبخروا الأوانى كلها والكباية والقلة والمواعين … كله كله كله يتبخر. أنا عايزكم تاخدوا بالكم من حاجة مهمة جداً وهى إن لازم الواحد يشعر إنه لما بيروح الكنيسة بيخش فى جو تانى إلاهى. لما الجو دا يكون هو بتاع البيت ما بيشعرش فى الكنيسة إن أتغيرت الحالة … ما بيشعرش. علشان كدا فى خروج إصحاح 30 لما أتكلّم على البخور ما قالشى إنه يستخدم فى البيوت، ها أقول لكم الكلام اللى فيه لأنه كلام مهم. ربنا شرح لموسى فى خروج 30 الحاجات اللى يعملها فى البخور. وبعدين قال خروج 30 من آية 37: والبخور الذى تصنعه على مقاديره لا تصنعوه لأنفسكم يكون عندك مقدساً للرب. كل من يصنع مثله ليشمه يقطع من شعبه. أظن باين كلام يعنى واضح. وهكذا أيضاً زيت المسحة فى نفس الإصحاح فى الخروج إصحاح 30 من آية 32: على جسد إنسان لا يسكب وعلى مقاديره لا تصنعوا مثله مقدس هو ويكون مقدساً عندكم كل من ركّب مثله ومن جعل منه على أجنبى يقطع من شعبه.

فيه حاجات لازم إنك إنت تخلّيها للكنيسة فقط. يعنى ما تحاولشى إنك إنت تعملها فى البيت. يعنى مثلاً الأباركة أديك بتاخد منها فى جسد ربنا ودمه لما تتعودها فى البيت ما تشعرش بقيمتها فى التناول … لما تشربـها فى البيت ما تشعرش  بقيمتها فى التناول. فإنتوا عايزين تخلّوا البيت كله بخور لما تروح الكنيسة مش ها تشعر بإنك إنت فى جو مختلف (الأمور المختصة بملكوت الله 21/05/1997).  

هل هذا أخطأ أم أبواه ؟

س: قال التلاميذ للمسيح عن المولود أعمى هل هذا الرجل أخطأ أم أبواه ليولد أعمى ؟ فقال لهم المسيح له المجد لا هذا أخطأ ولا أبواه، أرجو من قداستم توضيح كيف يخطئ الإنسان وهو لم يولد بعد ؟

ج: الناس بتوع عودة التجسد اللى يسموها (Reincarnation) اللى بيؤمنوا أن الروح ترجع تانى وتخش فى جسد تانى، الناس بتوع عودة التجسد يقولوا لازم المولود أعمى دا كان له حياة سابقة أخطأ فيها فأتولد أعمى. يعنى العقائد الوثنية ديا يريدون أن يقنعوا بـها المسيحية بأن يجيبوا آيات من الكتاب تثبت هذا الكلام. وللأسف بعض المعلمين عندنا فى الكنيسة القبطية بياخدوا نفس الآية دى ويقولوا أمّال لازم فيه حياة سابقة أخطأ فيها المولود أعمى … أمّال الآية دى جات إزاى ؟! ها أقول لكم الآية دى جات إزاى. كانت هناك علاقات تجارية بين بلاد فلسطين وبين البلاد المجاورة، وكثيراً ما كانت تأتى قوافل تجارية من بلاد الهند ومن بلاد الشرق وتصل إلى بلاد فلسطين … طب وهو المجوس دول جم منين !! ما جم من الشرق وعدّوا … فبعض الأفكار الخاطئة كانت موجودة فى وسط الشعب نتيجة الاعتقادات اللى بتيجى من البلاد الشرقية عن طريق التجارة، عن طريق الرحلات، عن طريق الزيارة، عن أى طريق … فبعض هذه المعتقدات الخاطئة كانوا بيعرضوها على المسيح … فيصحح لهم. من ضمن هذه العقائد الخاطئة مسائل تقمص الأرواح وعودة التجسد وأن الأرواح تلف من جسد لجسد، كل دى عقائد من بلاد الشرق القديمة. زى مثلاً لما المسيح بيقول لهم ماذا يقول الناس عنىّ إنى أنا ؟ قالوا له ناس بيقولوا أنك أنت إيليا وناس بيقولوا أنك أنت إرميا وناس بيقولوا أنك أنت واحد من الأنبياء … أهو كلام خاطئ … وصل،كلام خاطئ إيه … وصل. أكمن دا موجود فى الانجيل ناخده ونقول دا يدل على عودة التجسد !! دى الأفكار الخاطئة اللى موجوده فى الجو اليهودى نتيجة زيارات ورحلات من التجارة من غيره من بلاد الشرق ووصّلوا الأفكار ديا، وإلا ما كانوش يقولوا بيقولوا عليك أنك أنت إيليا أو إرميا أو واحد من الأنبياء … موجوده فى متى16. وبعدين المسيح قال لهم وأنتوا بتقولوا إيه ؟ فبطرس قال له أنت هو المسيح ابن الله الحى. فالأفكار الخاطئة ديا سألوا فيها المسيح قالوا له دا أخطأ أم أبواه ؟ قال لهم لا هو ولا أبواه … بس. لكن ديا تدل على حاجة ؟! أفكار خاطئة دخلت عند اليهود من بلاد الشرق اللى موجود فيها عودة التجسد واللى موجود فيها التقمص … إلى آخره وأترد عليها، دى ما تزعلش أبداً (عناية الله وحفظه 26/06/1991).

الفيلوكاليا

س: واحد بيقول ما هى الفيلوكاليا ؟

ج: كلمة فيلو يعنى محب، وكاليا يعنى الخيرات. كلمة كالوس يعنى كويس، حاجه كويسه، خير يعنى. اليونان لما ييجوا يقولوا مثلاً صباح الخير أو مساء الخير يقولوا كالاميرا وكالاستيرا. فكالوا جايه من خير يعنى. يعنى Good day and Good night يعنى. لما أحنا بنقول فى التسبحة حسنٌ مجيئك إلينا بنقول: كالوس بيك جين إى .. يعنى كويس مجيئك إلينا. فكاليا يعنى الخيرات. فيلوكاليا يعنى محب الخيرات.أو محبو الخيرات.

+ أول من استخدم هذا الاسم القديس باسيليوس الكبير عمل جمعية اسمها جمعية الفيلوكاليا لخدمة الفقراء والمحتاجين والخدمة الاجتماعية وحاجات زى دى.

+ وبعدين كلمة الفيلوكاليا دلوقتى بتستخدم فى مجموعة من الكتب، مجموعة من الكتب اسمها فيلوكاليا بيجيبوا فيها أقوال الآباء والحاجات دى وبيشرف عليها أخواتنا الـ Greek Orthodox اليونان الأرثوذكس (التساهل مع الخطية 29/08/1990).

مفهوم وحدود الحياة الاجتماعية فى المسيحية

س: ما مفهوم الحياة الاجتماعية من الناحية المسيحية وهل يحق لنا أن نساير العصر بكل تصرفاته ؟ وما هى حدود الحياة الاجتماعية من الناحية المسيحية ؟

ج: الحياة الاجتماعية من الناحية المسيحية إنك تعيش فى المجتمع تتعاون معه وتخدم هذا المجتمع وتكون قدوة لهذا المجتمع، تعاون وخدمة وقدوة. وتحب الناس ولا تصطدم بأحد على قدر الإمكان. أما أن تساير الناس فهذه ليست حياة اجتماعية، دى اسمها ضياع. لأن الكتاب المقدس بيقول فى رومية 12: لا تشاكلوا هذا الدهر. لا تشاكلوه يعنى ما تبقوش شكله، ما تبقوش زيّه يعنى. لا تشاكلوا هذا الدهر بل تغيّروا عن شكلكم بتجديد أذهانكم.

كمان المزمور الأول بيقول: طوبى للإنسان الذى لم يسلك فى مشورة الأشرار وفى طريق الخطاة لم يقف وفى مجلس المستهزئين لم يجلس.

وأيضاً الكتاب بيقول: المعاشرات الردية تفسد الأخلاق الجيدة.

وأيضاً فى 1كو إصحاح 6 ذكر مجموعة كبيرة من الخطاه وقال إنكوا أنتو لا تخالطوا هؤلاء الناس. لأن مخالطة الناس الخطاة ممكن تتلف الإنسان. ولذلك لما سكن لوط فى أرض سادوم عيلته أخطأت ومراته تلفت وماتت وبناته أخطأوا وهو نفسه يقول عنه القديس بطرس الرسول فى رسالته بيقول: كان البار يعذّب نفسه يوم بيوم بمناظر الناس الأشرار. فليست الحياة الاجتماعية أن تندمج مع الخطاة الذين فى المجتمع، إنما الحياة الاجتماعية أن يكون لك تأثير إيجابى مقدس طيب فى المجتمع وأن تختار أصدقاءك من الأشخاص الذين لا يعرقلون حياتك الروحية، ما يتعبوش حياتك الروحية، دا المجتمع. ولما يكون ليك حياة اجتماعية يعنى حياة مع كل أفراد المجتمع ؟! لأ. يكون لك مجتمع خاص تعيش فيه من ناس أبرار. وإذا أختلطّ بالضرورة بحكم الوظيفة، بحكم العمل بحكم الدراسة بناس أخلاقهم ليست طيبة ضع حدوداً لهذه الخلطة. زى واحد يقول دى صلة عمل وبس ولا تجعلها تزداد وتتسيب. وماذا ينتفع الإنسان لو ربح العلم كله وخسر نفسه. الحياة الاجتماعية ليست معناها ضياع الإنسان فى فساد المجتمع … ليس معناها هكذا (فضائل روحية لكنها لا تكفى 04/12/1991).

لماذا ولد السيد المسيح على صورة رجل ؟

لماذا يكون الملائكة رجالاً ؟

 ولماذا لا نحب الشيطان ؟

س: لماذا ولد المسيح أو المسيا المنتظر على صورة رجل ؟ ولماذا رجل بالذات ؟ وهل توجد شواهد أو براهين تقول إن يجب أن يأتى المسيا على صورة رجل. مع العلم إن المرأة كذا … كذا ؟ لازم بعتاه امرأة يعنى …

ج: فى الحقيقة النساء زودوها قوى يعنى. يعنى ليه المسيح أتى كرجل وهل فيه شواهد.. فيه طبعاً نبوة موجودة فى اشعياء النبى عن ميلاد المسيح بيقول فى أشعياء 9: 6 لأنه يولد لنا ولد ونُعطى إبناً وتكون الرئاسة على كتفه ويدعى اسمه عجيباً مشيراً إلاهاً قديراً أباً أبدياً رئيس السلام. أهى شواهد.

كمان الرجل رأس المرأة. فلو ولد المسيح ليس رجلاً يبقى يحتاج لحد يبقى رأسه. الحكاية دى مش أصول نتكلم فيها.

+ دا الناس اللى فى الغرب بيكتّروها جدا لدرجة يقولوا ليه نقول أبانا الذى فى السموات وليه يكون الله أب ما يكونش أم ؟ بقول لكم زودوها بشكل وحش يعنى حقوق المرأة دلوقتى عايزه تخش فى حقوق الألوهية وحقوق المسيح. كل شئ بإعتدال يكون كويس لكن … ما تجيش بالشكل دا. لدرجة دلوقتى بدأوا يحطوا تعبير متوسط بدال ما يقول Our Mother Who Are In Heaven مش مبلوعه يقولوا Our Parent لأن كلمة Parent  تنفع للأتنين. لازم المرأة تخليها معقوله وما تزودهاش.

+ زى سؤال برضه سؤلته برضه فى بلاد المهجر لأن عندهم الأفكار دى موجودة. قالوا لماذا يكون الملائكة رجالاً مثل ميخائيل وغبريال وروفائيل ليه ما فيش ملائكة نساء. طبعاً قولت لهم الملائكة لا يوجد عندهم الجنس فلا يوجد ذكر وأنثى بين الملائكة. ولا يوجد رجل وامرأة بين الملائكة ولا يتزوجون ولا يزوجون. لكن بقى عايزين ملاك يبقى اسمه حنونة ولا دميانة … حاجة مش معقولة صدقونى. لكن لازم الواحد يناقش هذه الآراء الغريبة.

+ فاكر مرة من المرات وكنت فى رومانيا وكان لينا قعدات طويلة مع بطريرك رومانيا ومطارنته وكان حاضر أيضاً البطريرك بارثينوس بطريرك الأسكندرية للروم الأرثوذكس كنا بنقعد قعدات طويلة بنسهر مع بعض. فمرة سأل البعض وقال المفروض إن إحنا نحب الكل ولا يوجد فى قلبنا شئ ضد أحد فلماذا لا نحب الشيطان أيضاً ؟ ومش صح إن إحنا نكره الشيطان …

1. قلت لهم طبعاً كل محبة نحبها لابد أن تكون داخل محبة الله فلا نحب محبة خارج محبة الله ولا ضد محبة الله. دى شروط المحبة. وربنا بيقول من أحب أباً أو أماً أكثر منّى فلا يستحقنى. ومن أحب إبناً أو إبنة أكثر منّى فلا يستحقنى.

فإذا كان البشر والمحبة الطبيعية زى البنوة والأبوة والأمومة ما نحبهاش أكتر من ربنا فكيف نحب الشيطان ؟!

2. كذلك لابد أن نفرّق بين العدو الشخصى وعدو الله. أعداؤنا على الأرض من البشر نحبّهم ونطلب لهم الهداية لكن الشيطان وهو عدو الله لا نستطيع أن نحبه.
3. وأيضاً لأننا قبل المعمودية بنجحد الشيطان وبنقول نجحدك أيها الشيطان وكل أعمالك الشريرة وكل جندك وكل قواتك وكل حيلك … إلى آخره. فإزاى نجحد الشيطان ونحبه ؟!
4. أيضاً لأن الشيطان مصيره معروف فى رؤيا 20: 10 بيقول إن رئيس الملائكة ميخائيل أخده وألقاه فى البحيرة التقدة بالنار والكبريت.
5. وأيضاً المسيح بيقول أبصرت الشيطان ساقطاً مثل البرق من السماء. فنهايته معروفة … فإزاى تحبه ؟!
6. كذلك الشيطان يمثل للشر فالذى يحبه يبقى بيحب الشر. والشيطان ضد مملكة الله فكيف نحب تحطيم مملكة الله.
7. إلى جوار إن الصورة الطقسية اللى موجودة فى الكنيسة الملاك ميخائيل وهو بيطعن الشيطان بالحربة فكأنك لما تقول ليه ما نحبّش الشيطان يبقى تشيل صورة الملاك ميخائيل من كل الكنايس … أفكار كتيرة يمكن اللى موجودة بره غير اللى موجودة جوه (رحلة قداسة البابا إلى أمريكا 19/01/1994).

لماذا نقدس يوم الأحد ؟

س: واحد بيقول قال رب المجد لموسى النبى فى سفر الخروج إصحاح 20 عدد 8 أذكر يوم السبت لتقدسه. فلماذا نقدس نحن يوم الأحد ؟

ج: صحيح فى سفر الخروج إصحاح 20 قال اذكر يوم السبت لتقدسه، ونفس الكلام فى سفر التثنية إصحاح 5 نفس الوصايا العشر. ولكن أيضاً فى كولوسى 2: 16 بيقول لا يحكم عليكم أحد فى أكل أو شرب أو من جهة هلال أو عيد أو سبت … أو سبت التى هى ظل الأمور العتيدة. يعنى السبت كان رمز لحاجة تاني جايه فيما بعد. أنا عايزكوا تاخدوا المسألة على رواقة كدا … بعمق.

كلمة سبت فى العبرانيه سبت يعنى … يعنى راحة … معناها راحة. يوم السبت يعنى يوم الراحة. ربنا أستراح فى السبت  أستراح خالقاً، لكن فضلت الخطية موجودة تحتاج إلى راحة، إن ربنا يستريح من خطية الناس دول، والناس يستريحوا من الخطية. كفّر عن هذه الخطية بصلبه وبقى الموت، فأنتصر على الموت فى يوم الحد، وهكذا استراح الله فى يوم الأحد. أستراح من الخطية والموت اللى همّا أصعب من حكاية الخلق. وبقى يوم السبت يرمز إلى يوم الأحد. وحتى هذا اليوم السابع لم ينتهى. فى كل يوم من أيام الخليقة كان بيقول وكان مساء وكان صباح يوماً واحداً، يوماً ثانياً، يوماً ثالثاً … إلى آخره. لكن ما قالش الكتاب وكان صباح وكان مساء يوماً سابعاً … فنحن لانزال نعيش فى اليوم السابع. وهذا اليوم السابع يرمز إلى الأحد الكبير، يرمز إلى السبت الكبير … إلى الراحة الكبيرة فى الأبدية. وإنشاء الله فى الأبدية ها يستريّح كل حد ويبقى هو يوم السبت الكبير الذى نستريح فيه. ومع ذلك إحنا بنقدس يوم الأحد وفى نفس الوقت يوم السبت بنعطي له مقامه بحيث ما بنصومش فيه إنقطاعى، ما بنضربش فيه مطانيات، يعنى برضه بنعمل له مقامه (مفهوم الحرية 21/07/1993).

تخلّي من الله بسبب الخطية

س: ما هو علاج الإحساس القوي بالفشل والإحباط وإن الله قد تخلّي عن الإنسان بسبب الخطية ؟

ج: مش كل فشل نتيجة خطية، جايز له أسباب معينة الواحد يدرسها ويتفاداها يعني تلميذ يسقط في إمتحان جايز السبب إنه ما ذاكرش، جايز الإمتحان صعب، جايز معقّد … إلي آخره. طبعاً عدم المذاكرة خطية، بس أنا قصدي أقول إن ربما فيه أسباب للفشل يبعد عنها نصيحتي لك إذا فشلت إنك تعمل الآتي:

أول حاجة: لا تعتبر إن الفشل فشل دائم في حياتك إنما اعتبره فشل خاص بالنقطة ديا لوحدها، لإنك جايز تكون فشلت في حاجة وتكون ناجح في حاجات تانيه كتير، فعيب الإنسان إن لما ييجي له فشل يقول خلاص أنا ضعت ويعتبر حياته كلها فشل فلا تجعل المسألة تشمل الحياة كلها بصفة عامة إنما نقطة معينة.

تاني حاجة: ابحث عن السبب وإذا عرفت سبب أبعد عنه. خد فائدة روحية من كل فشل. إن كان فيه سبب طبيعي ابعد عنه. إن كان تخلّي من الله كما تفتكر بسبب خطيتك ابعـد عن الخطية وتفادي هذا التخلّي علشان ما تفشلش في المستقبل واستفيد، وياما ناس فشلوا مرة ورجعوا نجحوا جداً جداً فيما بعد، مش مسألة عمومية يعني. وإذا اعتبرت الله بيتخلّي، هل الله بيتخلّي بصفة دائمة ؟! جايز لو وجد تخلّي يكون مؤقت لكي تشعر بالخطأ وتستفيد لكن الله لا يتخلّي تخلياً  كاملاً أبداً إلا لو الإنسان هو اللي تخلّي عن ربنا (لك القوة والمجد 15/04/1992).

 مرض الوسوسة

س: هل شراء الكتب القديمة من سور الأزبكية مثلاً حرام لأن هناك أحتمال إنـها مسروقة ؟

ج: شوف إذا كنت متأكد إن الكتاب مسروق ما تشتريهوش … إذا كنت متأكد إن الكتاب مسروق ما تشتريهوش. وإذا كان عندك شك كبير، إذا كان عندك شك وضميرك تاعبك إنه مسروق برضه ما تشتريهوش. يعنى مثلاً جايز كتاب تلاقى مختوم بختم مكتبة من المكاتب المشهورة، تعرف قطعاً إنه مسروق. مكتوب عليه مكتبة كلية الآداب يبقى واحد خده وباعه. فما تشتريش كتاب مختوم بختم. ولكن ما تقدرش تعيش بالوسوسة ديا، إنت لا تضمن أى حاجة فى السوق بتشتريها مسروقة ولا مش مسروقة. يعنى لو مشيت بالفكرة دى تتهوس، يحصل لك وش فى مخّك … على طول صحيح. إيه اللى عرفّك يا إبنى ؟ إيه اللى عرّفك إن أى تاجر من التجّار ما سرقش الفلوس اللى أشترى بيها البضاعة ؟ إيه اللى عرّفك. ومش بس فى البضاعة وفى الكتب فى اللحمة اللى بتاكلها وفى الطعام وفى العيش وفى كله. اللى عايز أقوله لك إنك لو عشت فى جو من الشك تعذّب نفسك … لو عشت فى جو من الشك تعذّب نفسك. ممكن إنك تشك فى كل حاجة … ممكن إنك تشك فى كل حاجة. بولس الرسول تعرض لهذا الموضوع فى الذبائح التى ذبحت للأوثان. فقال لما واحد يشترى لحمة من السوق منين يضمن إنـها ذُبحت الأوثان ولا لأ ؟ قال اللى تجدوه فى الملحمة كلوه ببساطة من أجل الإيمان، لكن إذا كانت حاجة تسبب عثرة بلاش تاكل. لكن عيش فى حياة البساطة ولا تحيا فى الشك الذى يقتل نفسك. كتير من الناس الكتب اللى مستغنين عنها بيبيعوها وبتوصل لسور الأزبكية فإنت ليه تشك بـهذا الشك ؟ ليه تشك ؟ الشك صعب يا إبنى. ولو الشك عاش معاك ها يخش الشك فى حياة الأسرة بتاعتك ويخش فى معاملاتك مع الناس وتلاقيك عشت فى تعب مرير فى الشك. فإنقذ نفسك من هذه الشكوك أفضل. لكن إذا كنت متأكد إن حاجة مسروقة ما تشتريهاش (معرفة الله والعلاقة معه، السماء 02، 16/02/1973).

مرض الكآبة

س: واحد بيقول ما رأى قداستكم فى إنسان عنده أحساس أن مكانه ليس فى البيت الذى يعيش فيه ولا فى الكلية التى يدرس فيها ولا فى الكنيسة التى يذهب إليها. ماذا يفعل حتى يستطيع تحديد مكانه ؟

ج: بتمر على الإنسان أوقات يكون زهقان فيها من كل حاجة. فالتعب ساعات ما يكونش فى البيت ولا فى الكلية ولا فى الكنيسة إنما التعب جواه. واحد زهقان، كل حاجة شايفها … زهقان منها. فياريت تفكّر فى الموضوع دا هل أنت من هذا النوع ولا لأ ؟ يعنى عملية زهق من كل حاجة. وما تمشيش بالأحساسات … ما تمشيش بالأحساسات.

وأحب أقول لك ملاحظتين أساسيتين فى كل هذه الأمور. لنفرض أن واحد حاسس أن البيت دا ما لهوش مكانه فيه.

+ أول ملاحظة: هل تسند هذا الأحساس أسباب يقينية عقلية ثابتة ؟ ولا مجرد أحساس وبس ومافيش أى سبب يقينى يدعو إليه ؟ دى أول نقطة بينك وبين نفسك.

+ تانى نقطة: أفرض أن البيت دا مش عاجبك، هل عندك بيت أفضل منه تروح له ؟! ولا تخرج من البيت إلى فراغ وإلى المجهول ؟! دى نقطة لازم تكون فى مخك.

زى واحد يقول  أنا مش عاجبنى الشغل اللى أنا فيه … أستقيل منه. نقول له طب يا حبيبى قبل ما تستقيل، هل لقيت شغل أحسن منه ولا تستقيل وتقف فى فراغ تبحث عن المجهول ؟! النقطة دى لازم تكون ثابتة فى ذهنكم. ناس كتير بيزهقوا من الوضع اللى هما فيه ومافيش فى أيديهم ما هو أفضل. يعنى زى صاحب السؤال دا … زهقان من الكلية، هل فى أيدك كليه أفضل ؟ زهقان من البيت، هل فى أيدك بيت أفضل ؟ مش بيت أفضل فى الخيال ولا كليه أفضل فى الخيال يعنى حاجة ممكنة وعملية وتقدر تخرج من هنا تروح على هنا. واحد مرة جانى قال لى أستقلت من شغلى … طب يا أبنى لقيت شغل تانى ؟ لسه ما لقيتش. طب مش كنت تدوّر وبعد ما تستلم شغل تانى تبقى تستقيل !! أهو قاعد فى الشارع. دوّر باستمرار على البديل الأفضل قبل ما تزهق.

وجايز الشيطان يحارب الإنسان بالملل.. الملل والدجر والكآبة وعدم الرضى والحزن. فيه شيطان بيحارب بكدا. فإنت ما تخضعش للحاجات دى.

س: ماذا يفعل حتى يستطيع أن يحدد مكانه ؟

ج: برضه زى ما بأقول لك فكّر هل فيه وضع أفضل ولا لأ ؟ وقارن بين الأتنين. مش بس أفضل.. أفضل وممكن وعملى. زى اللى ما يعجبهاش جوزها وتسيبه وهى مش عارفه تروح فين، وبعدين تخرج وما تلاقيش زوج غيره. دايماً الواحد يفكّر إيه اللى بعد كدا. فى كل خطوة تخطوها فكّر إيه اللى بعد كدا … إيه اللى بعد كدا. لأن ناس كتير بيخطوا خطوة لبره ومش عارفين بعد كدا يجرى إيه. فكّر إيه اللى بعد كدا (الإرادة كيف تقوى وكيف تضعف 20/10/1978).

أنبياء العهد القديم والحروب

س: كيف يقوم بعض أنبياء العهد القديم بالحروب والقتل مع إن القتل يتعارض مع تعاليم الله ؟

ج: ليس من حق إنسان أن ينهى حياة إنسان آخر بإرادته. لكن إذا أراد الله إن ينهى حياة إنسان بأى طريقة، الموت والحياة فى أيد ربنا. فإذا أمر الله أمر يبقى فى هذه الحالة لا تكون جريمة قتل، لأن الله الذى يملك الحياة قد أمر بنهايتها، ويقدر ربنا ينهى الحياة بأى طريقة، بسكتة، بمرض، بقتل بأى حاجة، بحادثة، بطوفان، بنار سدوم وعمورة. ربنا بينهى الحياة بالطريقة اللى هو عايزها. فالأنبياء كانوا ينفّذون أمر الله. مش بس الأنبياء خدوا الملاك المهلك، الملاك المهلك الذى أمر بإهلاك كل أبكار مصر أيام فرعون، دا ملاك … ملاك وأهلك جميع الأبكار. هل نقول الملاك أرتكب جريمة قتل ؟! الملاك نفّذ أمر الله الذى بيده الحياة والموت. ملاك آخر فى قصة خطية داود أهلك 30,000. ملاك آخر أهلك 180,000 من جيش سنحاريب، ملاك لكن ما أرتكبش جريمة قتل. لأن ربنا بيستطيع ينهى الحياة بأى طريقة. ربنا أنـهى حياة العالم كله بالطوفان. هو حر فى أيده الحياة والموت. فإذا كان الإنسان قد أُمر أمراً من الله لا تكون جريمة قتل. لأن الله الذى بيده حق الحياة والموت هو الذى أمر (معرفة الله والعلاقة معه، السماء 26/01، 02/02/1973).

الإنتحار جريمة قتل

س: لماذا يعتبر الانتحار جُرماً يعاقب الله عليه بالرغم من أن المنتحر في لحظة الانتحار لا يكون في كامل وعيه ويصيبه مس من الجنون وهذا ما اثبت علمياً ؟

ج: إذا كان المنتحر في وقت انتحاره مجنوناً فعلاً لا تكون هناك مسئولية عليه، المجنون لا مسئولية عليه في أفعاله وهو مجنون، لكن عليه مسئولية في التصرفات التي أدت به إلى الجنون، يعني جائز تفكر في الانتحار وما تكونش مجنون ساعتها، وأثناء التنفيذ تبقي مش في عقلك لكن كنت في عقلك في أول تفكيرك، كما إن حكاية مجنون المسئولية على المجنون على حسب درجة جنونه، فإذا كان جنوناً مطبقاً يعني جنوناً  كاملاً يبقي مافيش مسئولية، لكن ساعات المجنون بيكون مجنون في نقطة واحدة وفي بقية الأمور عاقل 100 % يعني مش كل جنون بيكون جنون كامل، دا فيه نقطة واحدة بتبقي مهوية عنده، برج كدا طاير لكن بقية الأبراج جايز تكون سليمة.

لماذا يعتبر الانتحار جرماً ؟

أولاً:الشخص المنتحر لا يوجد عنده إيمان في الحياة الأخرى بيظن إنه بإنتهاءه من متاعب الحياة انتهي كل شئ، فلو آمن بالحياة الأبدية وآمن إن فيه حياة بعد الموت، وآمن إن فيه محاكمة جايز بعد الانتحار يروح إلى الجحيم ويبقي حالة أسوأ من متاعبه على الأرض، على الأقل متاعبه على الأرض جايز تتصّلح لكن وهو في الجحيم ها تتصّلح إزاي دي انتهت ؟! فالشخص المنتحر لا يؤمن تماماً بالحياة الأخرى ولا يؤمن بأنه في لحظة موته لا تنتهي حياته وإنما تبدأ حياة أخرى.

تاني حاجة: المنتحر لا رجاء له في أن ربنا بيصلح له أموره.

تالت حاجة: المنتحر يرتكب جريمة قتل لم يتب عنها بعد، يعني أي جريمة ممكن يتوب عليها لكن جريمة قتل النفس ديا بعد ما تموت نفسك ها تتوب إمتى ؟ إمتى ها تتوب عنها، كل خطية عندك فرصة تتوب ما عدا الانتحار ديا إمتى ها تتوب وهي جريمة قتل. ولازم المنتحر يعرف إنه ليس ملكاً لنفسه الكتاب بيقول: اشتريتم بدم، اشتريتم بثمن فلم تعودوا ملكاً لأنفسكم لكن ملك للذي اشتراكم بدمه، فإنت مش ملك نفسك علشان تموّت روحك.

+ فالانتحار جريمة قتل

+ الانتحار جريمة لا توبة بعدها

+ الانتحار جريمة ضد الإيمان

+ الانتحار جريمة ضد الرجاء

+ الانتحار ضد وصية الباب الضيق لأن الكتاب بيقول: في العالم يكون لكم ضيق. فالمنتحر بيتمرد على هذا الضيق ولا يرضي بيه وليس له حياة التسليم وليس له حياة القناعة ولا ينفذ وصية لتكن مشيئتك لو بيقول له يا رب لتكن مشيئتك ما يموّتش روحه (لتكن مشيئتك 11/06/1981).

عدد السموات

س: واحد بيقول ما هو سبب العدد سبعة فى السموات وحتى فى الأرض يقولوا سابع أرض وإن كنا نعلم أن أحد الرسل رأى السماء الثالثة وعرفنا أن عدد السموات سبعة ؟

ج: فى المسيحية ما بنقولش أن عدد السموات سبعة.. إطلاقاً. العبارة دى تلاقيك سمعتها من حتة تانى. فى المسيحية ورد ذكر السماء الثالثة التى صعد إليها بولس الرسول. لعل السماء الأولى هى سماء الطيور والطائرات اللى بتسبح فيها الطائرات والطيور، والسماء الثانية هى الفلك اللى موجود فيه الشمس والكواكب، والسماء الثالثة هى الفردوس اللى صعد إليها بولس الرسول. لكن الكتاب المقدس قال لنا حاجة اسمها سماء السموات … سماء السموات يعنى لو كل السموات ديا المادية أعتبرت كأنـها أرض يبقى دي السما بتاعتهم. وهى السماء اللى قال عنها السيد المسيح فى العظة على الجبل لا تحلفوا بالسماء لأنـها كرسى الله. وهى السماء اللى ورد عنها فى يوحنا 3: 13 فى كلام المسيح مع نيقوديموس ليس أحد صعد إلى السماء إلا الذى نزل من السماء إبن الإنسان الذى هو فى السماء. فدى ما حدش طلع ليها أبداً ولا إيليا ولا أخنوخ ولا حد أبداً، دى اللى إسمها سماء السموات. لكن أزيد من كدا ما جاتش سيرته أبداً فى الكتاب المقدس. لكن العدد سبعة بيرمز للكمال وبيستخدم فى أشياء كثيرة خاصة بالكمال، وأنا كلمتكم كتير عن الرقم سبعة ونشرت لكم مقالات عن العدد سبعة مافيش داعى نكرر هذا الكلام. أما حكاية مثلاً يخفس بيه سابع أرض دا كلام عوام لكن مافيش سابع أرض يعنى … دا كلام عوام. ما فيش حاجة اسمها سابع أرض دى.. يعنى يقصد غويط قوى واصل لتحت يعنى لكن مافيش سابع أرض (شروط الخدمة الناجحة 01/07/1992).

مريم المجدلية والشك … لا تلمسينى

س: واحد بيقول لماذا سمح السيد المسيح لتوما أن يلمسه ولم يسمح لمريم المجدلية أن تلمسه ـ يعنى فاكرين أن فيه تعصّب أو تمايز عنصرى بين الراجل والمرأة ؟

ج: هو فى الحقيقة السيد المسيح كما سمح لتوما أن يلمسه فى إنجيل يوحنا إصحاح 20 سمح أيضاً لمريم المجدلية ومريم الأخرى إنـهم يلمسوه فى متى إصحاح 28. فى متى إصحاح 28 ذهبت مريم المجدلية ومريم الأخرى للقبر وبعدين ظهر لهم السيد المسيح وكلمهم فبيقول الكتاب إنـهم وقعتا عند قدميه وأمسكتا بقدميه وسجدتا له. أمسكتا بقدميه وسجدتا له. ما دام مسكوا قدميه يبقوا لمسوه فمافيش تعصّب ولا حاجة. دا على الأقل المسيح يعنى لما سمح لتوما إنه يلمسه سمح لتوما إنه يلمسه ووبّخه. فحكاية مريم المجدلية لا تلمسينى لأنـها شكّت فيه قبل كدا. زى ما بطرس الرسول أنكر المسيح 3 مرات مريم المجدلية من خوفها وإضطرابـها أنكرت قيامة جسد المسيح 3 مرات فى إصحاح واحد فى يوحنا 20. راحت لبطرس ويوحنا وقالت لهم أخذوا سيدى ولست أعلم أين وضعوه وبعدين لما راح يوحنا وبطرس وآمنوا والملاك كلمها قال لها ليه بتبكى ؟ قالت له أخذوا سيدى ولست أعلم أين وضعوه أخذوا سيدى يعنى ما قامش. ولما المسيح ظهر لها وظنته البستانى قالت له يا سيد إن كنت قد أخذته فقل لى أين وضعته يبقى أنكرت للمرة التالتة. عيله صغيرة وأضطربت والشكوك كانت ماليه البلد والإشاعات اللى قالوها رؤساء الكهنة والكلام الغلط اللى قالوه الجنود فبعد ما شافت المسيح أضطربت. فوبخها لكن لمسته لمسته ما تزعلوش (الروح القدس فى العهد الجديد ج2 21/06/1989).

يحمل صليبه كل يوم ويتبعنى

س: قال المسيح من يريد أن يتبعنى يحمل صليبه كل يوم ويتبعنى. بيسأل يعنى إيه صليبه ؟

ج: يحمل صليبه يعنى يحتمل من أجل السيد المسيح، يتعب من أجل السيد المسيح. يشقى ويحتمل الضيق من أجل السيد المسيح آدى كلمة يحمل صليبه. وقال فى العالم يكون لكم ضيق. وقال أدخلوا من الباب الضيق. فمفروض يحمل صليبه يعنى يحتمل من أجل الرب (المثاليات فى حياة السيد المسيح ج1 10/11/1972).

مشكلتى هى الكذب

س: واحد بيقول أنا شاب فى سن الـ 19 ومشكلتى الوحيدة هى الكدب فما هو الحل بعد أن فشلت محاولات كثيرة وهذه هى أكبر كدبة يعنى، إن فشلت محاولات كثيرة، وهى إن كان عندى ملاحق فى الصف الثانى الثانوى وأخفيت على أبى وأمى هذا حتى أمتحنت ونجحت ؟

ج: شوف يا إبنى الكدب بالذات بيخلّى الناس يفقدوا الثقة بالشخص. يعنى إنت لما تكدب بتفقد ثقه الناس فيك، ولما تفقد ثقتهم مش ها يصدقوك حتى لو قلت كلام صح. وتفقد أحترام الناس ليك، وحاول إنك إنت تبطّل الكدب. غير إن أحياناً ـ  مش أحياناً هو غالباً وربما على طول ـ بتكون خطية الكدب هى خطية ثانية تسبقها خطية أولى. يعنى فيه خطية سابقة بتخلّى الواحد يكدب. إما خطية إنك إنت سقط وعايز تدارى السقوط بالكدب … يبقى خطية بتغطى خطية أخرى. أو جايز واحد يكدب كنوع من إنه يصل إلى غرض من الأغراض ورغبته فى الغرض دى تكون خطية. أو واحد يكدب رغبة فى إنه يضحك على واحد أو يتّريق عليه فيكدب له كدبة ويشوفه يعمل إيه … برضه خطية سببها الكدب. فشوف إيه الخطية الأولى اللى بتخليك تكدب وبطّل الخطية الأولى تلاقى خطية الكدب أتبطّلت لوحديها. كمان الكدب معناها إنك إنت ما بتتحمّلش مسئولية أعمالك. لو تكون راجل جد من النوع اللى يتحمّل مسئوليه أعماله.. يعمل حاجة يقول أيوه عمّلت، يقول كلمة يقول أيوه قلت. فيه جايز واحد يقول أنا بأكدب علشان أغطى على غيرى.. ممكن تـهرب من الإجابة بدال ما تكدب، والإمتناع عن الإجابة ليس كدب. واحد يقول لك فلان عمل كذا ولا كذا قول له أنا ما أحبّش أخش فى تصرفات الناس أسألنى عن نفسى … بقوة كدا … مش تكدب وتقول ما أعرفشى وإنت عارف. خلّى عندك شخصية قوية. ومع ذلك فى كتاب الوصايا العشر تلاقى فيه جزء عن الكدب حاول تقراه (أحبوا أعدائكم 11/03/1987).

المجموع الجبرى بين الخطايا والفضائل

س: هل محاسبة الله لنا فى القيامة ستكون مجموع جبرى بين الخطايا والفضائل ؟

ج: سيحاسبنا على ما وصلنا إليه، لكن واحد يوزن يشوف أعماله الحسنة والسيئة، دا فيه خطية واحدة لو حطيت قصادها ميه (100) من الفضائل ما توزنش قصادها. الإنسان دخوله الملكوت لازم يكون حياة الإنتصار على الخطية. لكن واحد مثلاً يكون بيصوم ويصلّى ويدفع صدقة ويكذب … نقول يخلص وإن الصوم والصلاة يضيّعوا الكدب … مستحيل … لأن الكدابيين ما يدخلوش ملكوت السموات. واحد يكون بيقرأ الكتاب وبيروح الكنيسة وبيخدم وبيصلّى وبيشتم، يقول لا شتامون يدخلون ملكوت السموات … ما ينفعش. لازم الإنسان علشان يخش ملكوت السموات يكون بار ونقى ولا توجد خطية تمنع الملكوت عنه، لأن ممكن خطية واحدة تمنع الملكوت. على رأى القديس باسيليوس الكبير قال ماذا أستفيد لو فعلت كل البر وقلت لأخى يا أحمق وأكون مستحق نار جهنم. لأن الكتاب بيقول من قال لأخيه يا أحمق يكون مستوجب نار جهنم. يبقى مش معناها إنك تعمل خير يضيّع شر … ما دام فيك شر يبقى مش بتاع الملكوت. تقول أمّال كلهم ها يبقوا زى بعض ؟ لأ … الناس فى الملكوت اللى بيعملوا الخير برضه درجات، واللى بيعملوا الشر درجات.

فعلى حسب ما تنتهى … إذا فضلت ماشى صح كويس وجيت فى الآخر جدّفت على ربنا فى أيامك الأخيرة يبقى ضاعت كل أشياءك الأولى بالتجديف الأخير. وإذا إنت مشيت غلط وتبت أخيراً … ربنا يقبل توبتك، تقول لى طب أستنى فى الآخر وأتوب، ما تضمنش جايز تموت النهار دا … إيه اللى عرفنا ؟! ربنا يديك طولة العمر طبعاً، لكن الواحد ما يضمنش عمره. كمان اللى يمشى فى الخطية جايز يتشعلق بيها ولما ييجى يحب يسيبها فى الآخر ما يعرفش … يكون قلبه أستعبد ليها.

كمان مش بس الخطية دا المفروض إن إحنا نترك الخطية دى من الناحية السلبية، ومن الناحية الإيجابية ننموا فى البر. فمش إنك إنت ما تعملش خطايا دا لازم تعمل البر، وتنموا فى حياة البر وتتطور من أفضل إلى أفضل إلى أفضل ساعياً نحو الكمال (أنا مجّدتك على الأرض 29/01/1986).

المقدّر والمكتوب

س: هل يوجد ما يُسمى المقدّر والمكتوب ؟

ج: عندنا ما فيش لا مقدّر ولا مكتوب. صحيح فيه علم الله السابق، يعنى ربنا عارف إيه اللى يجرى، لكن لا يقدّر الله لكل واحد كل حياته. وإلا الشخص اللى ها يعيش فى الخطية ويموت فى الخطية ويروح جهنم.. يبقى ربنا مقدّر له وكاتب له إنه يعمل الخطية ويروح جهنم، طب وذنبه إيه فى الحالة دى ؟! معرفة الله السابقة لا تعنى إن الله يقدّر للإنسان حياة معينة وإلا يبقوا الخطاه ما ذنبهم وما مصيرهم وكيف يمكن إن الخطاه ربنا يقدّر ليهم الشر ؟ دا هذا الأمر لا يتفق مع صلاح الله ولا مع قداسة الله. أما كون إن فيه أحداث تكون معروفة فى حياة الإنسان عند ربنا … ممكن بس دى ما لهاش دعوة بمصيره الأبدى، أحداث معينة ممكن. لكن إذا كانت الأحداث دى فيها خطية يبقى ربنا برضه مش هوّ اللى كاتبها. يعنى مثال لكدا: يوسف الصدّيق صار عبداً وسُجن، فمعروف عند ربنا إنه ها يبقى عبد وسُجن … لكن صار عبداً بخيانة وخطية من أخوته. يبقى لا يمكن ربنا يقدّر إن أخوته يخطوا ويبيعوا أخوهم، من ناحية أخوات يوسف مش ممكن ربنا يقدّر كدا، وإلا يبقى ربنا إذا كان كاتب لهم إنـهم يعملوا كدا يبقى ربنا مشترك معاهم فى العملية … ودى حاشا لربنا. كمان أترمى فى السجن بخطية امرأة فوطيفار، لا يمكن ربنا يقدّر إن امرأة فوطيفار تُغرى وتُخطئ وتكدب وتودى السجن.. مش ممكن. ربنا ما يشتركش فى أعمال زى دى. لكن فيه حاجة نسميها علم الله السابق، وعلم الله السابق شئ وكلمة المقدّر والمكتوب شئ آخر (أنت تسأل وقداسة البابا شنوده الثالث يجيب ج7 1986).

أعانى من مشكلة الفراغ

س: أنا شاب فى الـ 20 من عمرى وأعانى من مشكلة الفراغ، فماذا أفعل ؟

ج: أستفيد من الوقت بدال ما الوقت يضيّعك خلّى الوقت يفيدك. أستفيد من الوقت إما فى إنك تعمل عمل خير، لإما إنك إنت تبنى نفسك من جهة المعرفة والعبادة. يعنى وقت للقراءة وللإستفادة من المعرفة روحياً وعلمياً ومن كل ناحية، ووقت للصلاة وللتأمل، وممكن يكون عندك وقت للحفظ إحفظ حاجات من الكتاب المقدس أحفظ آيات، أحفظ تراتيل، أحفظ ألحان، خد وقت تتعلم فيه الألحان الكنسية، يبقى عندك وقت للدراسة والمعرفة، وعندك وقت للصلاة والعبادة والتأمل والحفظ والألحان، وممكن يكون فيه وقت للخدمة. تحاول تخدم الناس على قدر ما تستطيع، تعالى أحضر فصول إعداد الخدمة ما دام عندك فراغ. جايز ربنا يملئ قلبك بمحبته وتنضم للفصول ديا. ما تسيبش نفسك فى الفراغ. ممكن أى عمل يدوى أيضاً يعمل فيه الإنسان. ممكن تشترك فى خدمة أى كنيسة من الكنائس. حاجات كتيرة يقدر بيها الإنسان يستفيد من وقته وأنا برضه بمناسبة الصيف ها أتفاهم مع الآباء الكهنة ومع أُمناء التربية الكنسية فى برامج لشغل الوقت فى الصيف … (من هو الله بالنسبة إلينا ؟ 19/07/1989).

ما رأيكم فى استعمال السحر فى عمل الخير ؟

س: ما رأيكم فى استعمال السحر فى عمل الخير ؟ فأنا شاب استعمله ـ دا إنت تخوف يا إبنى … صاحب السؤال دا بيقول بيستخدم السحر ـ وما رأى المسيح فى هذا ؟

ج: عمل الخير لابد أن تكون الوسيلة الموصلة إليه خير. فعمل الخير خير فى ذاته وخير فى وسيلته ونحن لا نستخدم الشيطان ليعمل لنا الخير. مفروض الخير يعمله ربنا فينا. مفروض الخير اللى نعمله يعمله الروح القدس فينا لكن مش نجيب الشيطان يساعدنا فى عمل الخير. دا ما يبقاش خير أبداً وما يبقاش بتاع ربنا. فإنت تسيب السحر. وحكاية تستعمله فى الخير دى خديعة من  الشيطان بيلعب بيك بيها. ما الشيطان علشان يلعب بيك يقول لك لأ بتستخدمه فى الخير. الخير هو أن تترك السحر. دا الكلام دا لو كنت إنت تفهم فى السحر بصحيح. الخير هو أن تترك السحر ولا تستخدمه لأن السحر عبارة عن شركة مع الشيطان. دا الكتاب المقدس بيقول: لا تدع ساحرة تعيش يعنى كان بيأمر الملوك والأنبياء زمان إنـهم يقتلوا السحرة. فإنت تسيب اللى إنت فيه يا إبنى، سيب اللى إنت فيه. أنا أفتكر مرة من المرات كنت راهب فى دير السريان ربما قبل ما أبقى قسيس حتى خالص وكنت ماسك مكتبة الدير. فكان لما راهب يتوفى الكتب بتاعته يحوّلوها على المكتبة فبصيت فى الكتب لقيت دلال المزامير ودلال الدلال وشوية كتب من إياها دى اللى هى استخدام المزامير فى السحر. جايز الكتب جابـها الراهب من أجل المعرفة يعنى أو من أجل المعلومات ما أظنش من أجل الإستخدام. المهم أدونى الكتب لمكتبة الدير وما أسهل إنى كنت أحتفظ بيها فى المكتبة لأجل المعرفة. حرقتها. قلت لا يصلح لهذه الكتب إلا الحريق. قريت كدا صفحة أو صفحتين وما رضيتش اقرأ الباقى. قلت مش عايز أعرف الحاجات دى. دا يقول لك إذا أردت إنك إنت تنتقم من عدوك  تجيب له مزمور: قاتل يا رب الذين يقاتلونى ومش عارف المزمور تقرأه 3 مرات على شوية زيت ولا إيه ولا شوية ميه وبعدين ترشهم فيكون هلاكه بإذن الله … هلاكه بإذن الله !! وإحنا نـهلك الناس بإذن الله. فيه حاجات كثيرة تخريف من هذا النوع لا يصلح لها إلا الحرق. ولما تقرأ اصحاح 19 من سفر أعمال الرسل تلاقى السحرة الذين دخلوا فى الإيمان كانوا يأتون بكتب السحر بتاعتهم ويحرقونـها. يعنى يجيبوا الكتب ويحرقوها … يحرقوها حرق. فإذا كان عندك كتب سحر ما تبيتهاش الليلة دى فى بيتكم. يعنى أول ما تروّح قبل ما تنام تمسك الكتب دى وتحرقها أو تقرر إنك إنت تأخذها وتحرقها. لئلا اللى فيها يطلع لك بالليل ولا يجرى لك حاجة. واللى بيشتغل بالسحر ما تفتكروش بينفد منه. دا ممكن الشيطان اللى يساعده لما يحاول يخرج من إيديه يإذيه. لكن إنت ما تخافش.  لما تتكل على ربنا وتحرق الكتب زى الناس بتوع سفر أعمال الرسل حرقوا الكتب. لكن كل ما تخش فى زوارق الشيطان دا يسيطر عليك شوية بشوية. ولا تظن إن الشيطان يقدم مساعدةً مجاناً هو يعنى مش خيّر ولا متبرع كريم زى المتبرعين الكرماء، دا كل حاجة بثمن. يعنى إن أعطاك معونة ياخذ فى مقابلها نفسك أو روحك أو فكرك أو أبديتك لكن لا يمكن يعطيك حاجة مجاناً أبداً. فبطّل يا إبنى حكاية السحر دى. لحسن يقولوا فيه ناس من اللى بيروحوا اجتماع الجمعة بيستخدموا السحر تعمل لنا سمعه. تروح تحرقهم. جايز إنت راجل مبتدأ وداخل أول يوم (الشك 17/06/1977).

  عائد البنوك

س: عائد البنوك هل هو حرام أم حلال. علماً بأنى أخرج منه العشور إلى الكنائس وأخوة الرب ؟

ج: إحنا ها نشوف حلال ولا حرام ما لناش دعوة بتدى منه عشور ولا لأ، مش اكمنك بتدى عشور نقول حلال، لأ. الربح الذى يأتي من البنوك حلال. لماذا ؟

لأن البنوك بتاخد المال اللى بيوضع فيها وبتستغله فى أعمال استثمارية وبييجى لها ربح منه فانتوا لما بتاخدوا من ربح البنوك كأنكم شركاء فى رأس المال اللى البنك بيستثمره. فالبنك بيربح من المال دا وبيدى لكم النصيب بتاعكم من الربح. وعلشان ما يبقاش هذا النصيب كل مرة مختلف عن الأخرى حددوا سعر معين إن زاد فى سنة وقل فى السنة التانية البنك بيوضب حكايته، لكن يعتبر الإنسان شريك فى رأس المال الذى بيستثمره البنك.

إنـهوا الربا الحرام، الربا الحرام لما تسلّف واحد فلوس وهو محتاج وتاخد منه ربا، يبقى كأنك بتقطّع من لحمه ودا حرام، لأن هو ما بيستثمرهوش دا راجل غلبان ومعزور، فلما تسلّف واحد فلوس ما تاخدش منه عائد.

لكن إذا إديت للبنك، البنك بيستثمره، وإلا يبقى إنت بتتبرع بـهذا العائد للبنك لأن البنك فقير محتاج وغلبان ومش قادر يسدد أجور الموظفين.

أما كون إنك تعطى العشور منه فكل إيراد ييجى لك مفروض تعطى العشور منه. كل إيراد حلال. لكن الكنيسة ترفض أن تأخد من المال الحرام، يعنى لو واحد بيكسب مال حرام ويدى الكنيسة، الكنيسة ترفضه. الكتاب بيقول: زيت الخاطئ لا يدهن رأسى (الحق والإدانة 05/11/1986).

عماد الطفل المريض

س: هل ممكن أن يُعمّد الابن المولود بعد ميلاده بعشرين يوم إذا كان مريضاً ؟

ج: ممكن الطفل يُعمّد ولو بعد ميلاده بيوم واحد، حكاية 40 يوم و 80 يوم دي خاصة بتطهير المرأة النفساء ـ يعني المرأة اللي ولدت ابن وفي فترة النفاس ـ فبنستني لغاية لما تخلّص فترة النفاس بتاعتها وتيجي تشيل ابنها وتقدمه للمعمودية. وكمان يكون الولد يعني يحتمل يغطس في الميه … ويطلع … ما يتعبش.

لكن إذا كان الولد في خطر الموت ولو ابن يوم واحد نعمده، ما لهوش دعوة بأمه ممكن أي حد ييجي يقدمه للعماد (القوة الحقيقة 14/02/1990).

موقف الطفل غير المعمّد

س: واحد بيقول المولود اللى عمره 20 يوم وتوفى بدون عماد أين يذهب ؟

ج: هو الكنيسة بتقول تعمد الولد، أو الفكرة اللى متاخدة إن بعد 40 يوم، دى فكرة غلط. لأن الولد ممكن يتعمد ولو فى يوم. هى أمه ما بيسمحش ليها إنـها تخش الكنيسة إلا بعد 40 يوم. لكن الولد فى أى وقت ممكن نعمده. فإذا شعرتم إن أى طفل ولو عمره أسبوع أو أقل محتاج لعماد عمّدوه، ما تنتظروش عليه 20 يوم. والطفل اللى مات بدون عماد، 20 يوم لا يذهب إلى مكان عذاب لأنه لم يقترف خطية. وأيضاً لا يتمتع بأماكن القديسين لأن الكتاب بيقول: من آمن وأعتمد خلص. يكون فى مكان كدا وسط لا فيه عذاب ولا فيه متعة (هوذا أنا عتيد أن اقف أمام الديان العادل 29/09/1978).

بحسب تعبه

س: أنا طالب امتحنت هذا العام إمتحان الثانوية العامة وأنتظر النتيجة ويعلم الله كم أنا تعبت هذا العام في الدراسة. لكن أود أن أعرف هل الله سيحاسبني في الثانوية العامة علي قدر تعبي أم أن خطيتي بحكم إني شاب في مرحلة المرأهقه سيحاسبني عليها ؟

ج: اللي ها يحاسبك هما المصححين. يعني شوفوا إيه ما تفتكرش إن مسألة النجاح والتصحيح والتفوق والدرجات ونسبتها خاصة بالخطايا، أو ربنا ها ينتهزها فرصة يعاقبك. ربنا حتى الناس الملحدين أعطاهم العقلية اللي يطلّعوا بيها طيارات تروح القمر، يعني ربنا لا ينتقم حتى من الملحدين، كل واحد مذاكر كويس ويستحق النجاح ويستحق التفوق ها ينجح حتى لو كان عابد وثن، ربنا ما بيضطهدش ناس يكونوا مذاكرين، وبيقول كل واحد بيأخذ أجرته بحسب تعبه، فأجرتك في المذاكرة ها تاخدها بحسب تعبك في المذاكرة لكن خطاياك الأخري ديا ليها عقاب في حته تاني إن ما تبتش، بس ما يخلطش ربنا الإمتحان بالخطايا. لكن دائماً الواحد ييجي ساعة الإمتحان ويبتدي يعمل صلح مع ربنا، ما فيش مانع بس علي شرط يكون صلح دائم مش زي ما بيقول الشاعر صلّي وصام لأجل أمر كان يطلبه فلما انقضي الأمر ما صلّي ولا صام. فإنت إن كنت عايز رحمة ربنا قبل ظهور النتيجة يعني تتفق معاه اتفاق دائم يعني، مش تستني لغاية لما تظهر النتيجة وبعدين ترجع في كلامك (المحبة تحتمل كل شئ 05/08/1992).

زيارة القبر

س: منذ ثلاثة أشهر أنتقل أبى إلى المجد وشكراً للرب أنه أنتقل فى الإيمان وترك لنا محبة المسيح، كما أن تعزيات السماء والروح القدس تملأ قلوبنا جميعاً. فهل يليق بنا كأولاد للمسيح أن نذهب إلى القبور فى وقفة العيد المقبل لنبكى على ما تبقى من تراب. حيث إنى معارض والدتى فى هذه البدعة ووالدتى توافقنى لكنها تخشى كلام الناس ومصرّة على الذهاب فى هذه المرة فقط. فهل أستمر فى المعارضة أم أوافق هذا العام فقط ؟ وما رأى الكنيسة ؟

ج: شوف يا حبيبى أنا عايزك يبقى قلبك حنين وخصوصاً على النفوس الحزينة اللى جُرحت فى أنتقال أحبائها. ممكن تروحوا المقابر لكى تصلّوا هناك وليس لكى تبكوا.. ممكن تروحوا المقابر علشان تصلّوا هناك وليس لكى تبكوا. تذكر إن أخت لعازر راحت عند القبر تبكى. والسيد المسيح ما زعلش منّها، راح أيضاً وبكى معاها. لما تلاقى حد تعبان وبيبكى صلّى من أجله لكن ما تقدرش تقول له ما تبكيش. السيد المسيح ما قالش لمريم ومرثا ما تبكوش بالعكس بكى معاهم. لا نستطيع أن نجرّد الإنسان من إنسانيته. الإنسان برضه مجموعة عواطف وإنفعالات وممكن إنه يتأثر. كمان عايز أقول لك لما إنت بتروح عند القبر مش بتروح تبكى على شوية تراب، إنت بتتذكر الشخص اللى مات ليك وإلا كنا لا نزور القبور إطلاقاً. لما بنيجى عند أجساد القديسين وبنسجد ما بنسجدش عند شوية تراب إنما بنتذكر القديس وروح هذا القديس وأعمال هذا القديس. لما بنزور أى مكان مقدس من الأمكنة التى دفن فيها الشهداء لا نذهب ونسجد عند شوية تراب إنما بنتذكّر القديس والشهيد والحاجات اللى حصلت. فما تقولش مجرد شوية تراب برضه خلّى قلبك حنين شوية. دايماً الناس بيتذكروا الأماكن اللى بيوجد فيها أحباءهم. طبعاً والدتك مش ها تذهب للفردوس علشان تصلّى على والدك هناك … روحه هناك لكن ها تذهب إلى القبر … دا وضع طبيعى … وضع طبيعى وخليك حنين على أمك.

رأيى كحل وسط قول لها نروح نصلّى لكن ما نروحش نبكى … نروح نصلّى لكن ما نروحش نبكى. نروح نصلّى ونطلب إن الكهنة يصلّوا وندّى عطايا للفقرا على روح الميت وفى يوم وقفة العيد نعمل قداس أو نطلب إذا عملوا قداس عمومى إنـهم يذكروه على المذبح ويبقى أفتكرنا الميت وصلّينا من أجله وقدمنا صداقات من أجله. لكن لا نذهب ونحزن ونبكى كالباقين الذين لا رجاء لهم. وإذا حصل ووالدتك بكت ما تتضايقش فيه عواطف بشرية لا يستطيع الإنسان أن يقاومها.. لا يستطيع. إحنا نفسنا اللى بنعزى الناس أحياناً ما بنقدرش نضبط عواطفنا. طبيعة الإنسان كدا … طبيعة الإنسان كدا. فخليك حنين على الناس اللى بيذكروا موتاهم. والدتك لما بتبكى على والدك مش بتبكى لأنه ذهب للسما لأ طبعاً دى حاجة مفرحة، ومش بتبكى كالباقين الذين لا رجاء لهم لأن من كلامك يدل على إنـها إنسانة مؤمنة ومتعزية، لكن بتبكى وفاءً وهى تذكر عِشرة السنوات الطويلة التى قضتها من أبيك فى محبة ومودة وعشرة طيبة. دا لما إنسان بيكون عنده قط فى البيت وبيموت بيزعل عليه.. قط بيزعل عليه. لما إنسان بيكون ليه صديق مجرد صديق وسافر بيزعل عليه. لما إنسان بيكون عنده صورة ورق وأتقطّعت ولا راحت بيزعل عليها. لا تجرّد الإنسان من إنسانيته. حسناً إن المسيح بكى على أليعازر وبكى على أورشليم. لكن لا نبكى كالباقين الذين لا رجاء لهم. القلب بيتأثر لكن الروح تمتلئ بالعزاء. لو قدرت تقول لها أنكوا تروحوا فى يوم قبليها علشان ما تبقوش فى زحمة الناس وتروحوا تصلّوا هناك وترجعوا يبقى أفضل (حتى متى تعرّجون بين الفرقتين 26/03/1976).

عذاب القبر

س: هل يوجد عذاب فى القبر أم لا ؟ وهل تبقي روح المنتقل تشعر بعمل الآخرين الأحياء ؟

ج:  إحنا لا نؤمن بحاجة اسمها عذاب فى القبر على الأقل للسبب الآتى: القبر لا يوجد فيه إلا جسد الميت وجسد الميت لا يشعر بشئ بعد موتـه. ما دام الإنسان مات يبقى جسده إيه ما يشعرش بحاجة.. ميّت. اللى تشعر بعذاب … الروح، والروح مش ها تكون موجودة فى القبر. الروح فارقت الجسد وذهبت إلي حيث تستحق. دى عقيدة غير مسيحية … عذاب القبر دا (الإهتمام بالنفس الواحدة 04/10/2000).

 الشمّاسية ليست فقط لخدمة المذبح

س: واحد بيقول أنا طالب جامعى قد نلت رتبة الشموسية منذ طفولتى ـ على فكرة اسمها رتبة الشمّاسية، الشموس هو الجموح فى اللغة، ساعات كتيرة قوى ييجى يقول لك تـهنئة برتبة الشموسية، ما فيش حاجة اسمها شموسية، اسمها رتبة الشمّاسية ـ منذ طفولتى وظننت إنـها مجرد لقب والآن لا أستطيع الحضور والإنتظام فى الألحان فماذا أفعل حتى أنال بركة هذه الرتبة ؟

ج: الشماسية ليست فقط لخدمة المذبح ليها عمل فى خدمة التعليم وعمل فى الخدمة الاجتماعية وحاجات زى دى. اسطفانوس أول الشمامسة كان بيخدم فى خدمة التعليم وفى الخدمة الاجتماعية. فيعنى إن ما كنتش تقدر تبقى تشتغل فى نواحى أخرى من خدمة الشماسية زى التعليم أو الخدمة الاجتماعية أو حاجات زى دى. ومع ذلك ليه ما تتعلّمش ألحان ؟ طب الكنيسة  كلها بترد مردات أثناء القداس مش بس الشمامسة ولا المعلّم.. الكنيسة كلها بترد فهل إنت ما بتردّش خالص فى الكنيسة ؟! لأ أتعلّم شويه. ولا صوتك يعنى مش ملائم ؟ جرّب وها تلاقى إنـها سهلة … جرّب وتلاقى إنـها سهلة. أنا كنت زيك برضه وكنت أتكسف أرفع صوتى فى الكنيسة … خالص. فى أيامنا كانوا الشمامسة دول لوحديهم وبتوع مدارس الأحد لوحديهم. وبعدين شويه بشويه أبتدينا نتعلّم ألحان. أتذكر أول مرة خدمت فيها شماس كان بعد ما أترهبنت وما كانوش لاقيين حد يرد فقالوا لى رد وزى ما تطلع … شويه بشويه لقيتنى قدرت أتمرن على الألحان وعلى الأبصلمودية وعلى القداس … يعنى.. ممكن (خطية القسوة 12/02/1992).