أسقيط

س: واحد بيقول ما معنى كلمة أسقيط الواردة فى بستان الرهبان ؟

ج: أسقيط يعنى مكان النُسك. مكان النسك حتى بالإنجليزى Asetic life يعنى الحياة النسكية. Asetic جايه من أسقيط A S T  يعنى اللى عايز ينطقها بالألف والسين والقاف ممكن. يعنى مكان النسك (الشك 15/08/1990).

 ما هى شروط الرهبنة لفتاة 16 سنة

س: سؤال من بنت بتقول عمرها 16 سنة وأربعة أشهر و 10 أيام بتقول كيف نشأت الرهبنة ؟ وما هى شروطها لفتاة تبلغ من العمر 16 سنة وأربعة شهور و 10 أيام ؟

ج: هو طبعاً عايزين الرهبنة عندك ما تكونش مجرد أنفعال وإنما تكون يقين وثبات وأعتقاد وحب جارف. والبنت بيختبر حبها لربنا لما تعرض عليها زيجات كويسه وتفضّل ربنا عليها. وفيه بنات دخلوا الرهبنة صغيرين.. وفيه بنات دخلوا الرهبنة صغيرين. نصيحتى ليكى إنك تكونى تحت إرشاد أب روحى ولا مانع أبداً إنك تروحى أديرة الراهبات وتسترشدى بأم روحية تقعد معاكى تشوف نفسيتك، تشوف السكه دى تصلح ليكى ولا لأ. تديكى تدريبات تمشيكى فى السكه لأنك ما تقدريش تمشى فى طريق الرهبنة بدون إرشاد قبل الطريق وأثناء الطريق. قبل الطريق علشان يقولوا لك السكه تصلح ليكى ولا لأ وأثناء الطريق علشان تعرفى تسلكى صح (أثنان خير من واحد ج1 02/03/1979).

أقرباء الراهبات

س: هل من حق رئيسة الدير أن تمنع زيارة أقرباء الراهبات ؟

ج: آه من حقها. من حقها طبعاً وخصوصاً إذا كان أقارب الراهبات بيخشوا يقابلوا الراهبة ويملوا عقلها بأخبار وأفكار يمكن تعكنن عليها طول الأسبوع. يعنى تصوروا مثلاً واحدة تركت العالم وراحت تترهبن وبعدت عن العالم وأخباره وأفكاره ومشاكله ومتاعبه وبعدين تيجى لها واحدة من قرايبها تزورها مش تكلمها كلام روحى تجيب لها أخبار أمها وأبوها وخالتها وعمتها والمشاكل اللى فى البيت والمشاكل اللى فى المدرسة واللى المشاكل اللى فى الأهالى وتملى عقلها بكلام تعكنن عليها طول الأسبوع، ويدوبك على بال ما أمنا الريسة تعالج هذه الحالة وترجّع البنت لحالتها الأولى تيجى زيارة تانى تكمّل عليها.

كتير منكم لا يحسنون طريقة الزيارة فى الدير، إن راهبة سلكت فى نسك شوية وقرايبها دخلوا ولقوها رفعت شوية … يا عينى يا أختى يا مسكينة، ياللى كنتى فى البيت متعززة دلوقتى ذلوكى فى الدير، نجيب لك أكل، نجيب لك لبس، نجيب لك تقوية، نجيب لك كذا. دا إنت عيانة، دا دمك مخطوف، دا وشك أصفر لغاية لما يعييوا البنت. الـ … دا مش تمام وبعد كدا يزعلوا ويقولوا هل من حق الريسة تمنع القرايب ؟ طبعاً من حقها لأن حياة الراهبة دى أمانة فى إيديها … أمانة فى إيديها. أما الأقارب القديسين اللى كل ما يزوروا الدير يملوه نعمة ويزودوا روحياته فا مش ممكن أبداً الريسة ها تمنعهم عن مقابلة قرايبهم (البابا شنوده الثالث. محاضرة الخلاص وكيف يكون 07/10/1977).

المقياس المظبوط للرهبنة

س: واحدة بتقول كيف أفهم إن كنت مياله للرهبنة وإنـها دعوة من الله ؟ وكيف أعرف ذلك ؟

ج: تعرفى ذلك إذا جا لك عريس فيه كل الصفات الكويسه خالص اللى تشتههيها أى بنت ولقيتى ميلك لربنا أكبر. لكن إذا كان لو جا لك واحد فيه كل الصفات الكويسه  تتهزى من جوه.. يبقى مش مياله للرهبنة. الشخص اللى ميال للرهبنة يعنى مات عن العالم تماماً بكل ما فيه من إغراءات. لكن واحدة ييجى لها عريس عنده مرتب كبير وعنده شقة وعنده عربية تفتكر العربية ديا ها توصلها الملكوت، وتقول وماله ما هو داود كان متجوز وابراهيم واسحق ويعقوب كانوا متجوزين. لكن الرهبنة إذا كنتى مياله للرهبنة المقياس المظبوط مهما أتى لك من عروض يشتهيها أى حد تكونى مازلتى ثابتة على فكرك (أنت تسأل وقداسة البابا شنوده الثالث يجيب ج2 1985).

عمرى 17 سنة هل لى رهبنة الآن ؟

س: واحد بيقول أنا عمرى 17 سنة وفى الصف الثانى التجارى وأنا أريد أنى أترهبن وهذا الفكر يأتينى من وأنا وفى الأبتدائية حتى الآن، هل لى رهبنة الآن مع إنى لا أقدر إنى أستحمل إن أصبر فى العالم ووصية الله و.. إلخ وأحب الرهبنة جداً وأحب قراءة الكتب على الرهبنة ؟

ج: يا حبيبى البلد لازم كل واحد بيأدّى الخدمة العسكرية، يعنى يروح الجيش ويخلّص. فإنت لازم تنتظر لما تأدى الخدمة العسكرية وإلا لو رحت الدير ها يخدوك تانى. دا واجب وطنى لازم تأدّيه.  فخلّى محبتك فى قلبك للرهبنة زودها زى ما إنت عايز، بقراية الكتب، بزيارة الأديرة، بسير القديسين لكن أستنى لما تخلّص الخدمة العسكرية وشوف الفكر لسّه قاعد فى قلبك ولا لأ. إن كان قاعد وثابت يبقى كويس تروح تترهبن. وبرضه لازم تشاور أب إعترافك (البيت المبنى على الصخر 08/07/1987).

كيف أحيا راهباً فى العالم ؟

س: واحد بيقول أرجو أن ترشدنى كيف أحيا راهباً فى العالم حيث إن رئيس أحد الأديرة نصحنى بالتردد على الدير كطالب للرهبنة ؟

ج: لأ بينصحك تتردد على الدير عشان إنت تعرف الحياة الديرية وهمّا يعرفوك فى الدير لكن مش معناها إنك ما تترهبنش خالص. أما إلى أن تتم رهبنتك نصيحتى لك إنك تداوم على الصلاة سواء صلاة المزامير صلاة الساعات أو صلاتك الخاصة. نصيحتى لك إنك تجد وقت للقراءة والتأمل. نصيحتى لك إنك تقلل مشغولياتك اللى ما لهاش لازمة وتقدر تقعد مع نفسك شوية تستفيد من الوقت. نصيحتى لك أيضاً إنك تتعلّم الهدوء والإحتمال علشان لما تروح فى الدير ما تتنرفزش ويزعلوا منّك. مهّد نفسك لكدا يعنى. وضّب الحكاية مع عيلتك إنـهم ما يفاجأوش. إبعد عن الكماليات والحاجات اللى ما لهاش لازمة. أتعود إنك ما لكش دخل بغيرك، ما تقعدش تبص فلان دا بيعمل إيه ! وفلان دا بيعمل إيه ! وفلان دا بيعمل إيه ! خليك فى حالك. ما تتّتبّعش أخبار الناس وأعمال الناس وتشوف بيعملوا إيه. فما لكش دخل بأعمال الناس. أتعود الكلمة الطيبة عشان لو رحت فى الدير ومعاك الكلمة الطيبة ينبسطوا منك (من هو الله بالنسبة إلينا ؟ 19/07/1989).

الرهبنة وحرب الشهادة

س: أنا طالب في الصف الأول من كلية الحقوق وأريد أنى أترهب بالثانوية فهل يحق ويحل ؟

ج: طبعاً يحق ويحل لكن مش من صالحك. ها تلاقي رهبان تانيين جامعيين وربما حد بيقدمهم ويقول فلان دا واخد ليسانس حقوق.. تحط وشك في الأرض. فلان دا واخد بكالوريوس هندسة تحط وشك في الأرض وتتحارب. فما دام أبتديت في الحقوق خد حقوقك فيها لحد الأخر يعنى لغاية ما تتخرّج. لأنك جايز تتحارب بيها. ولما الواحد ياخد شهادة تبقي مش مهمة بالنسبة له، لكن لما ما ياخدهاش يبقي متقاتل بيها، متحارب بيها.

+ كمان إنت طالب في سنة أولى حقوق يعنى ما نضمنش أخدت إعفاء من الجندية ولا لأ. جايز تحتاج إنك إنت تروح الجيش علشان تاخد إعفاء، إلا لو كان واحد معفي جاهز، يعنى وحيد أو عنده إعفاء لأسباب صحية أو غـيره لكن برضه لازم يكون عنده شهادة إعفاء من الجندية. لأن مش معقول تبقي راهب وبعدما تترهبن يطلبوك في الجيش وتبقي حكاية صعبة. من رأيي إنك تكمل دراستك (مثل السامرى الصالح 10/03/1999).

أريد أن أكون راهب

س: واحد بيقول أنا طالب فى الجامعة وأريد إنى أكون راهب.. وكيف أسلك فى الطريق رغم إن والدتى تقول لى أنتم أتنين أخوات فقط ولا تلاتة.. والدتى تريد إنـها تزوجنى وكل يوم تفتح لى هذا الموضوع ؟

ج: إنت أحسن تقول لوالدتك.. قول لها أنا لسّه يعنى ها أتجوز وأنا لسّه ما عنديش وظيفة.. لسّه فاضل عليك لما تتخرج.. تتخرج.. مافيش واحده تتجوز تلميذ.. تستنى لما تتخرج وبعد ما تتخرج تخلّص الجيش وبعدين تشوف لك وظيفة وبعدين تشوف لك شقة.. يعنى لسّه بدرى. ما تحاولش إنك تخش فى المشكلة دلوقتى. إنت لما بتكشف نفسك وتقول عايز أبقى راهب بتجيب لنفسك التجارب وتخلّى والدتك تكلمك. منين ما والدتك تكلمك قول لها يا ماما لسّه بدرى.. هو دلوقتى رهبنه وزواج إيه ؟! دا أنا لسّه تلميذ.. لما أخلّص الدروس يحلّها ربنا.. فيه واحدة ها تتجوز تلميذ ؟! ها يصرف عليها إزاى ؟! ها يجيب لها شبكة منين ؟! ها يجيب لها شقة منين ؟! لسّه بدرى.. وما تجيبش لنفسك تجارب.. وخليك ساكت. منين ما إنت تفتح الباب على نفسك تلاقى الشيطان يبتدى يلعب لك. أوعى تاخدها ضحك مع والدتك وتقول لها طب هاتى العروسة وطبعاً عارف إنـها مش ها تجيب.. تقول لك نشبكك ونسيبك مشبوك لحد ما تتخرج. خليك بعيد عن الموضوع دا (تعب الأعصاب 17/08/1988).

شاب وحيد والرهبنة

س: واحد بيقول أنا شاب وحيد أبى ومعى أختان وأنا العائل الوحيد للأسرة بعد أبى وأبى يعمل عمل حكومى وأنا أريد الرهبنة مع العلم بإن الشاب الوحيد ليس له رهبنة ؟

ج: لأ ما نقدرش نقول الشاب الوحيد ليس له رهبنة لكن إذا كان هو العائل الوحيد ـ العائل بالهمزة مش بالقاف ـ إذا كان هو العائل الوحيد يبقى يؤدى واجبه نحو الأسرة فى إنه بيعولها. لكن إذا كان ابن وحيد والأسرة مستورة والحمد لله لا يوجد ما يمنع رهبنته. يعنى عبارة إن لا رهبنه للابن الوحيد دى مش مظبوطة. لكن ما يصحش الرهبنة إذا كان هو العائل الوحيد يعنى مافيش حد يعول الأسرة غيره وإذا هو راح يترهبن تحصل كارثة مالية واجتماعية للأسرة. يبقى يؤدى واجبه لغاية لما يشعر براحة ضميره وإن أسرته استقرت ويعنى الأختين بتوعه اتجوزوا والحمد لله يقدر يروح يترهبن ماجراش حاجه. أو يحوش قرشين ويديهم لأبوه وأمه وأخواته يعنى يتصّرف (علاقتك مع الله 16/08/1989).

فيلم حدث فى تلك الليلة القصة الثانية أبونا أنسطاسى

س: هل لابد من العمل بالنسبة للفتاة قبل الذهاب لأحد أديرة الراهبات أم يكفى الإنتهاء من الدراسة والإستعداد الروحى والعلاقة الروحية مع الله ؟

ج: هو ساعات العمل يكشف نفسية البنت. يعنى أهو فى البيت مش باينه وجايز فى الخدمة مش باينه. لكن العمل جو آخر بتعيش فيه مع غرباء ومش فى جو دينى، جو رسمى. فتبان من متاعب الزملاء، ومتاعب الرؤساء، ومتاعب من شرق وغرب، ومتاعب العمل نفسه. يبان إذا كانت هى بتقدر تحتمل أو ما تحتملش وتقدر تصبر أو ما تصبرش وإذا تعبت يكون نفسيتها إيه ؟ يعنى كنوع من التدريب (السنة الجديدة 25/12/1985).