الأسرة المسيحية

س: هل الزواج من الله أم من المخلوق ؟

ج: طبعاً الزواج الفاشل ليس من الله. لكن المرأة الفاضلة هى من الله. كون أن حاجة من الله مش معناها ربنا بيلغى عقل الإنسان وبيلغى حرية إرادته، وبيلغى رغباته الخاصة.. ما بيحصلش. مازال الإنسان بنفس رغباته، بنفس عقليته، بنفس أتجاهاته النفسية، بنفس تقديره للأمور وتفضيله حاجة على حاجة.. إلى آخره. فإرادة الإنسان موجودة.. موجودة، وما فيش التسليم الكامل. التسليم الكامل دا تمام زى مثلاً ما أبونا ابراهيم يقول لخادمه لعازر الدمشقى تروح عند عيلتى هناك وتجيب بنت لأبنى اسحق. فيجيب له البنت دى ياخدها وبقت زوجة. لا ليه دخل ولا أختار ولا عمل ولا سوّى. لكن فيه فى العهد القديم برضه أمثلة فيها أختيار زى يعقوب ما أحب راحيل وقال عايز راحيل، أدوا له ليئة قال لهم لأ راحيل. فيبقى فيه أختيار. فإرادة الإنسان داخله فى الموضوع.

+ وزى الزواج اللى بين داود وميكال بنت شاول برضه كان مبنى على محبة سابقة. فالشخص بيكون له أختيار وجايز الأختيار يكون صح وجايز يكون غلط. لأن مثلاً عيسو تزوج من بنات بنى حث وكانت زوجتاه مرارة قلب لاسحق ورفقة. بينما يعقوب تزوج بطريقة فاضلة (صورة الله 06/08/1986).

أسس السعادة الزوجية

س: ما هى أسس السعادة الزوجية من وجهة نظر قداستكم، وكيف يطمئن الإنسان المسيحى من النجاح فى أختيار شريكة حياته ؟

ج: أول حاجة: فى السعادة الزوجية ما تقعدش تسأل مراتك حياتـها السابقة إيه ؟! ماليكش دخل. إنت مالك ؟! دى اعترفت بيها وخلصت. تقول لها لازم أعرف جميع أسرارك من أول ما أتولدتى.. تبقى إنت بتنكش بقى. بتنكش على التعب وعلى المشاكل.. أو تنكش على الكدب. يعنى لو ضغط عليها ها تكدب. ها تقول لك خطيتى الكبيرة إن الملايكة الكتار اللى كنت بأشوفهم زمان ما عدتش أشوفهم دلوقتى.. كفايه إنت بقيت ملاكى الوحيد دى أول حاجة.

+ حاجة تانى: فى السعادة الزوجية: التوافق بين الأتنين، يعنى طبع يوافق طبع.. طبع يوافق طبع، فيتوافقوا مع بعض. دى حاجة مهمة جداً. سواء فى الطبع أو فى التصرّف. يعنى واحدة تحب تصوم كتير وزوجها يحب ياكل كتير، برضه جايز ما ينبسطوش مع بعض. تلاقيه قاعد ياكل، ياكل، ياكل، تقول إيه دا ؟! أو واحدة تحب الصمت الكتير وهو يحب الكلام الكتير.. برضه لازم الطبع يوافق بعض.

+ حاجة تانى: لازم الحياة الزوجية تكون مبنية على حب، مبنية على صداقة ومودة. لأن المحبة تحتمل كل شئ وتستر كل شئ وما تزعلشى من أقل سبب، يعنى على رأى المثل: حبيبك يبلع لك الزلط. فالزواج اللى مبنى على حب ومودة وصداقة يعيش سعيداً أكثر من غيره.

+ وكمان لابد فى السعادة الزوجية من الإحتمال. يعنى واحد يحتمل التانى. لو الأتنين بتوع إحتمال يحتملوا بعض. لو واحد منهم بتاع أحتمال يحتمل الطرف الآخر. لكن لو همّا الاتنين ما يحتملوش.. بس.. الكلمة قصادها كلمتين والرد قصاده ردين والحكاية تلخبط.

+ ولذلك مما يجعل الحياة الزوجية سعيدة هدوء الطبع.. هدوء الطبع يعنى أنا عندى إنك تتجوزى واحد ماليته قليلة وما بيتنرفزش أحسن ما تتجوزى واحد غنى نيرفز خالص أقل حاجة يزعّق عليها، يعمل شوشرة، يقلب الدنيا. فى الحالة دى تلاقى الفلوس مش جايبه نتيجة. يارت كل واحد يضمن إن اللى بيتجوزه ما يكونش طبعه ناشف. الطبع الشديد بيتعب (من هو الله بالنسبة إلينا ؟ 19/07/1989).

نصائح للمتزوجين فى عيد زواجهم الثلاثين

س: واحد باعت لى بيقول، عليه هو يعنى إننا اليوم نحتفل بعيد زواجنا الثلاثين، يعنى دول لازم كبار فى السن دول بيحتفلوا بعيد زواجهم الثلاثين. ونرجو أولاً الصلاة من أجلنا، وثانياً ما هى النصيحة التى تقدموها لنا ـ بعد 30 سنة إنت جيت يعنى متأخر ـ معليش برضه ؟

ج: أولاً كل سنة وأنتوا طيبين وعقبال ما نـهنيكم بعيد زواجكم الـ 40 و الـ 50 والـ 70 وأنتوا فى أكمل صحة وفى شيخوخة صالحة مباركة. هو النصيحة اللى أقدمها لكل المتزوجين، بيقول لينا ولبقية المتزوجين يعنى.

+ النصيحة اللى أقدمها لجميع المتزوجين إنـهم يعيشوا فى محبة مع بعض. فى حياة محبة وحياة روحانية مقدسة. الأتنين دول حياة محبة وحياة روحانية مقدسة.

+ وأيضاً من ضمن هذه النصائح إن كل واحد من الطرفين يفكّر كيف يُسعد الآخر ويخدم باقى الأسرة. لا يفكّر فى نفسه لأن الكتاب بيقول: المحبة لا تطلب ما لنفسها. إنما كيف يبذل من أجل الطرف الآخر ومن أجل باقى الأسرة. يعنى وظيفة الزوجة إنـها تسعد زوجها ووظيفة الزوج إنه يسعد زوجته ووظيفة الأتنين إنـهم يسعدوا باقى أفراد الأسرة. لو عملنا كدا يبقى حاجة كويسة.

+ أيضاً على الزوجين باستمرار إن كل واحد يفهم نفسية التانى ويعامله بما يوافق نفسته.. يفهم نفسية الطرف الآخر ويعامله بما يوافق نفسيته. وأيضاً يفوّت فى بعض الأوقات. يعنى قصدى أقول إيه ما يدققش على كل كلمة ويحاسب عليها. فيه بعض أمور يمررها كدا. مش ممكن إنسان ها يكون كامل فلابد برضه فيه بعض غلطات. لا يحاسب على كل غلطة وإنما يمرر كثير من الغلطات دون أن يحاسب عليها. وإذا كنت إنت ها تحاسب غيرك على كل غلطة، غيرك برضه ها يحاسبك على كل غلطة، وتقعدوا تناكفوا مع بعض، لازم فيه غلطات تمر.

+ أيضاً لا تعالجوا المشاكل بالتزعيق أو بالغضب أو بالزعل. حاولوا تعالجوا المشاكل بطريقة روحية هادئة ما فيهاش زعل، ما فيهاش غضب، بروح التفاهم.

+ ياريت يكون ليكم أوقات تتناولوا فيها مع بعض، تصلّوا فيها مع بعض، تقروا الإنجيل مع بعض يكون ليكم حياة مع ربنا فى جو البيت. أشعروا إن ربنا موجود فى بيتكم.. أشعروا إن ربنا موجود فى بيتكم. الزواج اللى فى الرب.. أنا بأشعر باستمرار إن الزواج دا مكوّن من تلاتة من الزوج والزوجة وربنا. بيشترك معاهم همّا الاتنين بدليل لما بيخلّفوا عيّل بيبقى العيّل دا ابن الزوج وابن الزوجة وابن ربنا. مش بيبقى من أولاد الله.. فربنا مشترك معاهم فى الزواج. دا فرق بين الزواج الكنسى والزواج المدنى، الزواج المدنى مشترك معاهم مكتب التوثيق، الـ civil marriage يعنى، لكن الزواج الإلهى بتاع ربنا، مشترك ربنا، ربنا هو اللى ربط الأتنين فى حياة مقدسة مع بعض.

+ ياريت أيضاً فى بعض المناسبات تقدموا هدايا لبعض. الناس بيفتكروا الهدايا للغُرب. تيجى فى عيد ميلاد زوجتك طبعاً متجوزين عمركم 30 سنة يعنى فى عيد ميلادها الـ 50، الـ 60، الـ 70 زى ما يطلع أنا مش عارف متجوزين عمركم قد إيه ؟؟ لكن طبعاً ما فيش حد فيكم ها يقل عن خمسين ـ فى عيد ميلادها أنسى رقم كام لكن أفتكر تاريخ الميلاد، تقدم لها هدية لطيفة فى عيد ميلادها، تقدموا لبعض هدايا فى عيد زواجكم، تقدموا لبعض هدايا فى يوم خطوبتكم.. دى فيها إيه دى ؟! يعنى جايز يكونوا أتخطبوا لبعض من 32 سنة أو 31 برضه.

+ تحتفلوا ببعض مناسبات روحية.

+ تحتفلوا مثلاً بعيد ميلاد أول عيّل ليكم، عيد ميلاد تانى عيّل ليكم. تحتفلوا بأعياد ميلاد أحفادكم إذا كان ليكم أحفاد. خلّوا البيت كدا فيه أفراح كل شويه والتانية تشوفوا مناسبة تحتفلوا بيها.. وكل سنة وأنتوا طيبين (المحبة لا تسقط أبداً 29/07/1992).

الزوجة ومصروف البيت

س: نشكر الله على سلامة عودتكم ورجاء أن تنصح زوجتى بعدم سرقة المصروف من جيبى ؟

ج: فى الأول أنصحك إنك إنت تديها المصروف بطريقة قانونية وهى ما تسرقش. هى بتسرق لية من جيبك ؟ علشان إنك مش مديها. فلو أديتها مش محتاجة. كمان ما نسميهاش سرقة. ما نسميهاش إية.. سرقة. لأن السرقه إن الواحد يسرق ما للغير فإذا كان مالك هى تملكه لأنكم أنتوا الأتنين واحد. يبقى هى ما سرقتش، يبقى الغلطة إنها أخدت بدون إذن. نسميها إنها بتاخد بدون إذن مش بتسرق. ونصيحة ليك تانى ما تسيبش جيبك فيه فلوس.. يعنى تخبى الفلوس فى حتة ما تعرفش توصل لها مراتك. وإن وصلت لها تغيّر الحتة.

ونصيحتى لمراتك إنها تستأذن زوجها وإذا أخدت من جيبة تاخد فى حدود المعقول.. فى حدود إيه.. المعقول. بحيث إن هو ما يتعبش يعنى… وهو بيقول الأيام صعبة وأنا خايف على آخرتها. إنت خايف على آخرتها ولا خايف على الفلوس.. طيب. خصوصاً نحن فى سن الخمسين. أمال اللى ساب السبعين يعمل إيه ؟! دا ىإنت بشرتك صالحة. ونطلب الآخرة الصالحة. علشان تطلب الآخرة الصالحة علق ورقة فى جيبك تكتب فيها لا تكنزوا لكم كنوزاً على الأرض، وعلّق ورقة تانية فى جيبك محبة المال أصل لكل الشرور. وعلّق ورقه تالتة فى جيبك قول فيها أنا شايفك وإنت بتاخدى. يظهر الناس ها يقولوا لنا تفسير الآية بتاعت يكون الإثنان واحداً هل ديا تنطبق على الفلوس ولا لأ ؟ دى عايزة تفسير مش وقتة (علينا أن نعمل 05/09/2001).