س: واحد بيقول ما علاقة ما ورد فى أشعياء إصحاح 19 مبارك شعبى مصر وبما يسبقها من ضربات لمصر؟

ج: ما هو الضربات تقود للتوبة. يعنى الضربات من ربنا مش كل الضربات عبارة عن إنه يعنى رافض لأ. بدليل إن كتير من الضربات كان بعديها فرعون ييجى ويقول أخطيت إلى الله وإليكما وصلوا من أجلى والله البار وأنا وشعبى الأشرار. فيعنى الضربات دى ليس معناها إن الله مش راضى. حتى بالنسبة لسليمان الحكيم لما ربنا قال لداود إن ها ييجى لة إبن. قال إن أخطأ أؤدبه بضربات من الناس لكن رحمتى لا أنزعها منه. فربنا ممكن يسمح بضربات ومع ذلك تكون الضربات تساعد الإنسان على التوبة (سحابة شهود 07/11/2001).

 ما معنى كلمة كاهن ؟ وهل هى أمتداد لأسم الكاهن عند الفراعنة ؟

س: ما معنى كلمة كاهن هل هى أمتداد لاسم الكاهن عند الفراعنة علماً بأن المسيحية بعد الفرعونية مباشرة وخاصة وإن الكاهن الفرعونى كان رجل دين؟

ج: أنا هنا عايز أقول لكم ملاحظة بيقع فيها كثيرون البعض فى إهتمامهم بالمسيحية المصرية يتجاهلون المسيحية فى العالم كله. فمثلاً واحد يقول لك علامة الصليب متاخده من علامة أُنخ اللى شكل الصليب عند الفراعنة، طب ما الصليب موجود فى بلاد العالم كله. هى بس حاجة مسيحية دى حاجة للعالم كله. حكاية الكهنوت هل إحنا أخدناه من الفراعنة ؟ طب الكهنوت اللى موجود فى بقية بلاد العالم كان عندهم فرعنة همّا الآخرين ؟! ما كانش فيه. أو مثلاً ييجى يقول لك الثالوث أخدوه من قصة إزوريس وأيزيس وحورس من الثالوث الفرعونى. طب عقيدة الثالوث اللى موجودة فى العالم المسيحى كله فى شرق الدنيا وغربـها كان عندهم همّا الآخرين أزوريس وأيزيس وحورس ؟! لماذا الخلط بين العقائد المسيحية العامة وبعض العقائد المصرية ؟ الكلام دا لو كانت الحكاية خاصة بمصر وحدها لكن إذا كانت خاصة بكل بلاد العالم المسيحى فيبقى ما تجيبش بقى سيرة إيه العقائد المصرية كانت إيه لأن هذه المسائل موجودة فى كل العالم الكهنوت ما موجود فى العالم. مافيش كهنوت فى الكنيسة الكاثوليكية، فى روما وكل بلاد العالم الكاثوليكى فى أوربا وأمريكا وأمريكا اللاتينية وبلاد أخرى كثيرة ؟ مافيش كهنة عند الروم الأرثوذكس مافيس كهنة فى روسيا ورومانيا وبلغاريا وقسطنطينية ومافيش كهنة فى كل بلاد العالم ؟! بس الكهنوت جه من الفراعنة ؟! خلّى تفكيرك متسع فى هذه الأمور العامة (أرميا النبى 07/12/1994).

الألحان القبطية بعضها يونانى وبعضها فرعونى

س: كيف نشأت الألحان فى الكنسية ؟ وهل كانت مستعملة أيام آباؤنا الرسل ؟ وهل تخللها تغيير أو تطور عبر العصور؟

ج: الألحان كانت موجوده من زمن قديم جداً فاستعمال الموسيقى فى الأمور الدينيه كانت موجوده. يعنى ناس كتير كانوا بيصلّوا بطريقه ملحّنه من زمان. فى قصه العبور مريم أخت هارون وموسى أخدت الدف فى أيديها وكانت بترقص وتغنى وتقول الخيل وركاب الخيل طرحهم فى البحر الأحمر. داود النبى كان بيقول بألحان بيقال أن كان ليه فرقه كبيره جداً من عدد كبير من الموسيقيين بيصاحبوه فى بعض مزاميره وصلواته. وأحياناً هو كان بيقول مزاميره وصلواته على العود وهو بيضرب على العود أو على الناى وهو بيشتغل على الناى أو على العشره الأوتار فالموسيقى الدينيه موجوده من زمان.. الموسيقى الدينيه موجوده من زمان. ليس فقط عند المؤمنين اللى بيعبدوا ربنا مظبوط بل حتى وسط الأمم أيضاً كان ليهم موسيقى. الموسيقى بتاعتنا أصلها فرعونى وبخاصه الموسيقى الجنائزيه. فيه ألحان كتيره فرعونيه. وبعدين الموسيقى برضه تأثرت يعنى موسيقى الكنيسة تأثرت فى بعض أوقاتـها بالناحيه اليونانيه وعندنا ألحان كتيره فى الكنيسة يونانيه من أولها لآخرها نفس الكلام واللفظ يونانى. زى إى أغابى تو ثيؤو كى باترو.. يونانى من أولها. ذوكسا باترى كى إيو كى أجيوا بنفماتى.. كلها يونانى. لكن فيه عندنا فى الألحان بعضها يونانى بعضها فرعونى وبعضها دمج من هذا وذاك وكل كنيسة لها ألحانـها..كل كنيسة لها ألحانـها يعنى الأرمن ليهم ألحان مميزه، الأثيوبيين ليهم ألحان مميزه، السريان ليهم ألحان مميزه، اليونان ليهم ألحان مميزه. كل شعب ألحانه تأثرت بالجو الذى عاش فيه (الله والإنسان ج2 08/05/1996).

كتب تتحدث عن تاريخ مصر pdf

سليم حسن.. موسوعة مصر القديمة.. الجزء الثانى

سليم حسن.. موسوعة مصر القديمة.. الجزء الخامس

سليم حسن.. موسوعة مصر القديمة.. الجزء السادس

سليم حسن.. موسوعة مصر القديمة.. الجزء الثامن

سليم حسن.. موسوعة مصر القديمة.. الجزء التاسع

سليم حسن.. موسوعة مصر القديمة.. الجزء العاشر

سليم حسن.. موسوعة مصر القديمة.. الجزء الحادى عشر

سليم حسن.. موسوعة مصر القديمة.. الجزء الثانى عشر

سليم حسن.. موسوعة مصر القديمة.. الجزء الثالث عشر

سليم حسن.. موسوعة مصر القديمة.. الجزء الخامس عشر

 

 

 

https://www.youtube.com/watch?v=KJfsMNMi2Ks

س: أنا شاب عائد من المانيا الغربية بعد فترة غربة من عام ونصف ولا أعرف أن أسلك فى مصر هنا بعد معاناة نفسية للفارق الإجتماعى والسلوكى ويشعرون فى كنيستى إننى أصبحت عثرة لهم، هل أقترب من الكنيسة أم أبتعد ؟

ج: يا أخى عندنا فى الكنيسة ناس كتير من المانيا ومن أمريكا ومن أوربا ومن حتت كتير، أشمعنى إنت يعنى ؟! وإيه الفارق .. وعندنا شوارع مسفلتة وكباري .. وكبارى علوية وكل حاجة. صدقنى الحالة الاجتماعية فى مصر أفضل بكثير من ألمانيا وإنجلترا وباقى بلاد أمريكا ها أقول لك ليه، يعنى حاجة بسيطة بصفتى زرت بلاد كتير من النوع دا يعنى. يعنى خد بالك زى إنجلترا وألمانيا زيها برضه ما فرقتش الإنسان بيشتغل من 6 الصبح ويرجع 6 بالليل أو 7 بالليل، يدوبك يتعشى ويعقد فى بيته شوية وينام ويستعد ليوم تانى. ولذلك مافيش صِلات اجتماعية، مافيش تذاور، مافيش علاقات، مافيش جار بيزور جاره. مافيش حاجة أبداً. يتفضل يوم السبت يعمل شوبنج يعنى يمر يبضّع على المحلات يجيب الحاجات اللى عايزها يحطّها فى الثلاجة أو فى البلكونة. فى انجلترا االبلكونات كلها ثلاجات .. كله يعنى .. ثلاجة طبيعية مش كذا قدم هى كلها كدا. ويوم الأحد يبقى ويك ايند (week End) يخرج يتفسّح ومافيش أى علاقات اجتماعية .. خالص. دا عندنا هنا فيه صداقات وفيه محبة، ولو الواحد عيى أو تعب يلاقى كذا جار واقف جنبه ويلاقى الناس بتحب بعض يعنى مش زى هناك. هناك نادر إنه يوجد يحبوا بعض. على أيّة الحالات إنت خش الكنيسة أحضر القداس وأتناول وأمشى لكن ما تبصلهمش من فوق، خليك متواضع كدا ومش إنت أول واحد راح ألمانيا. وتأكد إنك إنت ها تنبسط. إن ما إنبسطّش ورجعت تانى .. طبعاً على رأى المثل كل واحد ينام على الجنب اللى يريّحه، الحتة اللى تستريّح فيها أقعد فيها. لكن ممكن إنك إنت تتقابل مع الناس وتقابلهم بمحبة وتقابلهم ببشاشة ويشعروا إن سفرك برة ما غيرش نفسيتك ومأثرش على علاقاتك لأن دى مش كويسة فى حقك (أنت تسأل وقداسه البابا شنوده الثالث يجيب ج6 16، 23/04/1986).

لما نتكلم عن العلم أيضاً نذكر تعليم المرأة، المرأة التى هى نصف المجتمع وحينما تعلمت قدمت لنا طاقات عجيبة في كل نوع من أنواع العلم ووصلت المرأة إلى عمل الطبيب والمحاسب والمدرس وناظر المدرسة وأستاذ الجامعة ووصلت أيضاً إلى الوزارة وفي الغرب وصلت إلى ما هو أكثر من هذا وفُجّرت طاقات في المرأة عن طريق العلم. نذكر هذا فنذكر العمل الكبير الذى قام به قاسم أمين وهدى شعراوى والعمل الكبير الذي قام به البابا كيرلس الرابع الذى كان أول من أنشأ مدارس للبنات في مصر(ندوه محو الأميه بالأهرام 03/04/1996).

س: هل قدماء المصريين مثل بناه الأهرام الذين كانوا يؤمنون بخلود النفس بعد الموت مقرهم الآن الفردوس بأعتبار إن السيد المسيح قد فداهم على الصليب؟

ج: شوف يا حبيبى السيد المسيح قدّم فداءً للجميع على شرط إنـهم يؤمنوا دا شرط. ولذلك فى يوحنا3: 16 بيقول: هكذا أحب الله العالم حتى بذل أبنه الوحيد لكى لا يهلك كل من يؤمن به بل تكون له الحياة الأبدية. فلابد من الإيمان. قدماء المصريين كان عندهم فضائل صحيح وكانوا يؤمنون بالخلود. لكن هل الإيمان بالخلود وحدة يكفى؟! لا تنسى أن قدماء المصريين كانوا أيضاً يعبدون مجموعة كبيرة جداً من الآلهه. كانوا يعبدوا أزوريس وإيزيس وحورس وست ورع وآمون وحتحور وأنوبيس وآلهه كتار خالص. فهل مجرد الإيمان بالخلود يعفى من كل الحاجات دى ؟! صحيح فى إيمانـهم بالخلود كانوا يؤمنوا بإن الروح ترجع إلى الجسد، لكن كانوا يعتقدوا إن لابد من حفظ الجسد سليماً وإلا الروح ما ترجعش. فلو الواحد جسده راحت منه إيد يقوم الجسد من غير إيد ولو راحت رجل يقوم الجسد من غير إيه ؟ رجل. فكانوا لازم يعملوا يحنطوا الإنسان يبقى جسده سليم طبعاً الإيمان دا مش مظبوط. وكانوا يشوفوا إن لو الجسد أصابه تلف يعملوا تمثال مظبوط علشان تحل الروح فى التمثال إن ما حلتش فى الجسد. أفرض التمثال وقع أتكسّر يبقى الروح ما تلقاش جسد تحل فيه. يعملوا صورة مظبوطة تمام علشان الروح تحل فى الصورة. فهل إنت تؤمن إن الروح تحل فى التمثال ولا تحل فى الصورة. همّا أجدادنا وكانوا ناس كويّسين وكانوا فى منتهى العمق فى العلم والمعرفة وفى فضائل كثيرة وتـهذّب موسى بكل حكمة المصريين، وهم أول من أخترعوا الكيميا ومن أخترعوا التحنيط ومن أخترعوا الكتابة، ليهم صفات كتيرة لكن أيضاً هناك أخطاء أخرى.. هناك أخطاء أخرى. فما تمسكش فى حاجة واحدة وتسيب الباقى. أما ربنا فى اليوم الأخير يحاسب الناس إزاى.. بلاش إنت تحاسبهم قبل ما يحاسبهم ربنا (أنت تسأل وقداسة البابا شنوده الثالث يجيب 01، 08/02/1989).