س: واحد بيقول من هو أول من أخترع اللغه القبطيه؟

ج: ما فيش حد أخترعها يا أبنى أبداً. اللى حاصل أن المصريين القدماء من أيام الفراعنه، من زمان يعنى كانوا يتكلمون اللغة الهيروغليفية. اللغة المصرية القديمة هى اللغة الهيروغليفية، وبعدين اللغة الهيروغليفية حصل فيها تطور إلى اللغة الهيراطيقية إلى اللغة الديموطيقية إلى اللغة القبطية. فاللغة القبطية هى التطور بتاع اللغة الهيروغليفية لغه القدماء. لكن على الرغم من كل دا كانت بتكتب اللغة بصور زى الحاجات اللى بتوجد على الآثار، أبتدوا يختصروها شويه عن زمان علشان بس تبقى سهله بدال ما يبقى كل اسم.. كل كلمه ترسم لها كام صورة. وبعدين أختاروا حروف من اللغة اليونانية يكتبوا بيها اللغة القبطية ما عدا 7 حروف تبقت من القديم. لكن اللغة القبطية ديا دى لغتنا بتاعت زمان ما حدّش أخترعها، هى تطور اللغة الهيروغليفية (عيد الصعود 15/05/1991).

س: اللغة القبطية لماذا نستعملها كثيراً إذا كان الله خلقنا عرب ومعظم الناس في القداس مش فاهمين حاجه ونصفهم بينام ويشعر بملل؟

ج: لأ. إنت فاكر لما تنام.. كل الناس بيناموا. أو إنت لما تشعر بملل وعدم فهم تفتكر كل الناس كدا؟! بمرور الوقت الناس بيتعلّموا. هو إحنا لو لغينا اللغة القبطية ها نلغي الألحان ونلغي الموسيقي القبطية ودي خسارة كبيرة جداً. كمان لما تلغي اللغة القبطية بتلغي هويتك وأصلك لأن أصلك قبطي. ومش المهم في القداس بس عنصر الفهم.. ممكن التأثير والمشاعر ليها فايدتـها الكبيرة. ما فيش شك أي واحد بيسمع لحن آجيوس الحزايني بيعرف معناه، وبيعرف كلمه آجيوس يعني قدوس، ويعرف إن ذوكسا با ترى كى نى يعني مجد للآب والإبن، بطول الوقت الناس بيلقطوا حاجات كتيرة. ومع ذلك دلوقتي فيه جزء كبير من القداس باللغة العربية. لكن ما نقدرش نلغي هويتنا كلها من أجل إن واحد يفهم أو ما يفهمش. دا إنت لو فهمت نصف القداس يبقي كفايه عليك (لقاء الرب مع تلاميذه 07/05/2003).

س: ما هى أهمية اللغة القبطية في حياتنا الروحية؟

ج: قصدنا إن إحنا نصلّي بفهم ونسبّح ونقول الألحان بتاعتنا بفهم. فهي لغرض ديني روحي هدفه العباده بفهم (الحلفان، لا تقاوموا الشر 04/03/1987).

س: هل اللغة القبطية التى نصلّى بـها فى كنائسنا هى اللغة الهيروغليفية؟

ج: لأ طبعاً. اللغة الهيروغليفية هى الأصل وتطورت لغايه لما وصلت إلى اللغة الهيراطيقية وبعدين الديموطيقية وبعدين القبطية. فهى تدرج من اللغة الهيروغليفية. وأتذكر إن أنا لما كنت طالب فى معهد الآثار المصريه كانوا يدونا اللغة القبطية وكل كلمة والأصل الهيروغليفى بتاعها جايه منين يعنى(النظام 06/06/2001).

فى حب مصر: لقداسه البابا شنوده الثالث

جعلتك يا مصر فى مهجتى

وأهواك يا مصر عمق الهوى

إذا غبت عنك ولو فتره

أذوب حنيناً أقاسى النوى

إذا عطشت إلى الحب يوماً

بحبك يا مصر قلبى أرتوى

نوى الكل رفعك فوق الرؤوس

وحقاً لكل أمرئ كل ما نوى