Category / عزيزتى المرأة

by Medhat Takla

هل خُلقت المرأة على صورة الله ؟

س: هل خُلقت المرأة على صورة الله ؟

ج: نعم خُلقت على صورة الله، لأن بيقول ربنا خلقهما على صورته ذكراً وأنثى. ولما المرأة تُخلق على صورة الله ليس معناها إنـها خُلقت على صورته فى الجسد لكن خُلقت على صورته فى البر، فى التقوى. خُلقت على صورته أنـها ذات عاقلة حية كما إن الله ذات عاقلة حية. خُلقت على صورته فى الروح الخالدة والله خالد أبدى. وخُلقت على صورته فى البساطة فى الطهارة فى النقاوة. ولما نقرا سفر التكوين الإصحاح الأول نلاقى نفس الكلام. شوفوا بيقول إيه فخلق الله الإنسان على صورته – الإنسان جملة يعنى – خلق الله الإنسان على صورته على صورة الله خلقه ذكراً وأنثى خلقه. فأمنا حواء على صورة الله وأبونا آدم على صورة الله ما فيش هنا تمايز عنصرى بين الراجل والمرأة الإنسان كله كإنسان خُلق على صورة الله (سنوات مع أسئله الناس ج3 12/02 – 25/03/1992).

خلق حواء بعد آدم

س: ما الحكمة فى إن ربنا خلق حواء بعد آدم وليه ما خلقهمش مع بعض مرة واحدة ؟

ج: لو خلقهم همّا الأتنين مع بعض مرة واحدة ها يكونوا غرباء عن بعض. لكن لما تتخلق حواء من جنب آدم ما تبقاش غريبة عليه. علشان كدا قال دى لحم من لحمى وعظم من عظامى. فأصبح فيه محبة بين الأتنين لأن حواء جزء من آدم. ومش ممكن أبداً تبقى جزء منه غير لما هو يتخلق فى الأول وتتاخد حته منه تبقى حواء. فلما آدم يقول لحواء إنت حته منّى دى تبقى حاجة كويسه.. أنتوا ها تعدّلوا على ربنا لكن يعنى دى حاجة.

تانى حاجة: الخليقة كلها بتبقى ليها أصل واحد. لكن لما آدم يتخلق لوحده وحواء لوحدها يبقى ليهم أصلين مش أصل واحد، كون إن أصل واحد دا كويس. على كلٍ كويس اللى خلقها أحسن ما يخلقهاش خالص (مفهوم الوداعة 28/07/1993).

أعتراض الأم على رهبنة ابنها

س: واحدة بتقول إبنى يريد الرهبنة وأنا رافضة بشدة، وقد خيّرنى بين الهجرة والرهبنة فأخترت أنا الهجرة ولكنه أختار الرهبنة. فماذا أفعل يا سيدنا ؟

ج: ما تتدخّليش فى شئون إبنك غصب عنه. إبنك دا مش لعبة فى إيدك تمشيه بالريموت كونترول توديه الرهبنة توديه الهجرة ؟ عيب الحاجات دى. خلّى إبنك يحبك. ما تخليش إبنك يشعر إنك إنتِ واقفة فى طريق حياته وبتتصرّفى فيها غصب عنه. وكون إنك إنتِ تقولى رضيت له بالهجرة يعنى مستغنية عن وجوده معاكى. ها يروح بلاد تانية بينك وبينها بحار ومحيطات وساعات طويلة فى الطيارة. يعنى إنت لو تحبى إبنك وتحبى تشوفيه ما الأديرة بينك وبينها ساعة.. ساعة ونص تكونى شفتيه. أما حكاية أختار الرهبنة وما يختارهاش دى شغلانة أب إعترافه مش شغلانتك إنتِ. أكمنك أمه قم تتحكمى فيه بالشكل دا ؟ هل إنتِ فى حياتك الزوجية أتحكّمت أمك فيها وقالت لك تتجوزى دا أو لأ، وتتجوزى أو ما تتجوزيش ؟ بلاش اسلوب التحكّم اللى يتعب الناس. الأمومة معناها الحنان والحب مش الأمومة معناها التحكم والسيطرة. أنا مش بقول إن إبنك يهاجر أو يروح الرهبنة، بقول دى شغلة أب إعترافه ويحلها بينه وبينه لكن إنتِ ما تتحكميش بـهذا الشكل (مثل الزارع 28/10/1998).

by Medhat Takla

الأنانية

س: واحدة بتقول أن فتاة فى سن 26 عام ومخطوبة ودائماً يتهمنى جميع من حولى إنى أتصف بالأنانية، لكنى لم أشعر بذالك ـ دا من أنانيتك برضه ـ لكن من كثرة تكرار هذا الإتـهام شعرت إنى بدأت فى ممارسته حتى يكون الكلام صحيح لكن ليس بيدى، إنما هو شئ لا شعورى. والآن أحس إن الجميع يكرهنى حتى أبى وأمى أصبحوا يقولوا لى إنت أنانية حتى مع أخواتك وتبدأ التفرقة ثم الكلام الحاد حتى تنتهى بمشاجرة. فهل أنا السبب فى ذلك ؟

ج: طبعاً. إذا كان كل اللى حواليكى بيقولوا إنك أنانية وأبوكى وأمك بيقولوا لك إنك أنانية وحتى مع أخواتك، فلازم تكونى أنانية. فأحسن تبطّلى الأنانية اللى عندك لأن دايماً الشخص الأنانى إنسان مكروه. الأنانى يعنى المحب لذاته اللى بيفضّل ذاته على غيره. فإنت حاولى تمرّنى نفسك إنك تفضّلى أخواتك عليكى، إنك تفضّلى أهل البيت كله عليكى. والكتاب بيقول: إن الواحد يكون آخر الكل يأخذ المتكأ الأخير يكون خادماً للكل. فحاولى إنك تبقى كدا. وعلى رأى الشيخ الروحانى بيقول: فى كل مكان وجدت فيه كن صغير أخوتك وخديمهم. فإنت فضّلى غيرك على نفسك. والكتاب بيقول: مقدمين بعضكم بعضاً فى الكرامة. قدّمى غيرك على نفسك سواء فى الكرامة أو فى الأخذ، فى أخذ الأشياء يعنى. مش كل حاجة كويسة تقولى أنا عايزاها وتسيبى أخواتك. لأن الأنانية دى لو أستمريتى فيها ممكن تضيّع منك خطيبك برضه. لأنك إنت أتدرّبتى على الأنانية مع أخواتك ومع أبوكى وأمك، ممكن الأنانية تصحبك جوه البيت فتبقى أنانية فى معاملتك لزوجك لغاية لما يزهق منك. فبطّلى الحكاية دى. لكن بتقولى كون إن أنا لم أشعر بذلك ما هو جايز الواحد ما بيشعرش بأخطائه لكن غيره بيحسوا بيها. فبطّلى الأنانية قبل الزواج وبعد الزواج (أنت تسأل وقداسة البابا شنوده الثالث يجيب 16، 23/09/1987).

by Medhat Takla

تعليم المرأة

لما نتكلم عن العلم أيضاً نذكر تعليم المرأة، المرأة التى هى نصف المجتمع وحينما تعلمت قدمت لنا طاقات عجيبة في كل نوع من أنواع العلم ووصلت المرأة إلى عمل الطبيب والمحاسب والمدرس وناظر المدرسة وأستاذ الجامعة ووصلت أيضاً إلى الوزارة وفي الغرب وصلت إلى ما هو أكثر من هذا وفُجّرت طاقات في المرأة عن طريق العلم. نذكر هذا فنذكر العمل الكبير الذى قام به قاسم أمين وهدى شعراوى والعمل الكبير الذي قام به البابا كيرلس الرابع الذى كان أول من أنشأ مدارس للبنات في مصر(ندوة محو الأمية بالأهرام 03/04/1996).

by Medhat Takla

لا تقتل ولا تقتلى

س: واحد صديقى خايف من مراته بعد ما قالت له الكتاب حرّم القتل على الراجل لكن لم يحرّمه على المرأة ؟

ج: كل وصية.. كل وصية مقدمة بأسلوب الذكر هى للذكر وللأنثى. مش معقول ربنا يقول لا تقتل ولا تقتلى، لا تسرق ولا تسرقى، لا تشتم ولا تشتمى. كل وصية موجهة للإنسان عموماً. فلما ربنا بيقول لا تقتل وصية موجهة للإنسان عموماً ذكراً كان أو أنثى رجلاً كان أو امرأة. هو مراته بتخوّفه ؟! خليه راجل لأ.. خليه راجل.. يخاف من مراته ؟! كل ما تخوّفك هات لها هدية كدا علشان ترضى عليك وما تقتلكش.. (الصعود لنا 23/05/2001).

by Medhat Takla

حواء والحية

س: لماذا ذهبت الحية لحواء ولم تذهب لآدم ؟ هل لأن حواء جنس ضعيف يسهل الضحك عليه ؟ أم ماذا ؟

ج: لما آدم طاوع حواء ظهر أيضاً إنه جنس ضعيف ممكن الضحك عليه برضه. بس حواء ضعيفة ضحكت عليها الحية، وآدم ضعيف ضحكت عليه حواء وهمّا الأتنين أتضحك عليهم، دى أول نقطة.

تانى نقطة: إن كان هناك عذر ممكن أن نقدمه لأمنا القديسة حواء فهو الآتى إن حواء كانت بسيطة القلب جداً لا تعرف خطية، يعنى لا يمكن تفكّر إن الحية تكذب عليها لأنـها لا تعرف كلمة الكذب ولا تعرف معنى الكذب، وأول مرة فى حياتـها تسمع كذب. ما تعرفش يعنى لو كنت قلت لها يا أمنا حواء أو يا جدّتنا حواء تعرفى يعنى إيه كلمة كدبة ؟ تقول لك يعنى إيه كدبة ما أعرفش ؟ ما تعرفش إن فيه حد بيمكر. لأول مرة فى حياتـها تصادف المكر. ما تعرفشى إن واحد يوقّع واحد تانى فى مشكلة أو يخدعه أو يضيّعوا أبديته.. ما تعرفش. إنسانة بسيطة جداً لا تعرف الخطية. هى أبتدت تعرف الخطية بعد ما أكلت من الشجرة وأبتدت عنيها تتفتح وتعرف إن فيه حاجة اسمها خطية. لكن قبل كدا كانت بسيطة ما تعرفش خطية، لا تعرف إلا الخير فقط. ما تعرفش الكدب، ما تعرفشى اللعب بالكلام ما تعرفش حاجة زى دى. لكن ليس معنى هذا إنـها أخطأت عن جهل على الأقل إن لم تكن تعرف الكدب  فكانت تعرف وصية ربنا إن قال لها ما تاكليش وما تمسيش. فسواء الحية بتكدب ما بتكدبش، بتخدع ما بتخدعشى، بتخطى ما بتخطيش على الأقل فيه وصية تقول ما تاكليش، فكان ممكن إنـها تطاوع الوصية. لكن فى أحياناً كتيرة حواء وبنات حواء يحبّوا ينفّذوا اللى فى مخّهم. وبرضه ساعات الرجاله كدا ما هو الرجاله ولاد حواء برضه، مش بس البنات بنات حواء برضه الرجاله ولاد حواء. والرجاله برضه يحبّوا ينفّذوا اللى فى مخّهم. فحكاية إن واحد ينفّذ اللى فى مخّه دى مش كويّسة. على الأقل كان ليها راجل يترد عليه.. ممكن تروح له وتقول له إيه رأيك يا آدم الحيّة بتقول لى كدا يعنى ننفّذ ولا ما ننفّذش ؟ إيه رأيك ؟ كان يقول لها عيب يا بنتى (أنت تسأل وقداسة البابا شنوده الثالث يجيب ج7 1986).

 

by Medhat Takla

هل السكوت علامة الرضا ؟

س: هل السكوت علامة الرضا، مثل يعنى: هل السكوت علامة الرضا ؟

ج: لأ طبعاً.

+ السيد المسيح أثناء محاكمته كان ساكت مش معناها إنه كان راضى بالكلام اللى بيحصل.

+ أحياناً الواحد ما يجاوبشى لأن السؤال لا يستحق الإجابة.

+ وأحياناً ما يجاوبشى لأن السؤال ربما يكشف سراً معيناً لآخرين وهو ما يحبّش يكشف أسرار الناس.

+ ربما واحد ما يجاوبشى لأن السؤال دا سُئل أكتر من مرة وأجيب عليه وما فيش فايدة.

+ ربما واحد ما يجاوبش على السؤال لأن قصد السؤال مش قصد مظبوط يعنى. زى مثلاً ما سُئل المسيح على الصليب لو كنت ابن الله أنزل من على الصليب لكن ما جاوبش.

+ جايز الواحد ما يجاوبش لأن الجواب يجر على حاجة تانية. زى مثلاً بنت ماشية فى الشارع وواحد يخش فى الخط ويسألها سؤال إنت رايحه فين ؟ اسمك إيه ؟ ما تجاوبشى. هل معناها أنـها راضية بكلامه ؟! لأ مش راضية لكن لو جاوبته يبقى دخلت معاه فى علاقة وهى مش عايزة.

+ جايز الواحد ما يجاوبش على السؤال لأن الإجابة فيها إحراج.. إحراج فيسكت أحسن.

فيه حته تانى فى سفر الأمثال يقول: لا تجاوب الجاهل حسب حماقته لئلا تعدله أنت. يعنى لما تجاوبه تبقى زيه. مش كل سكوت علامة الرضا. ياما آباء متوحدين أو سواح كانو بيسألوا أسئلة وكانوا بيسكتوا ما بيردوش لأن يعنى روحانياتـهم فيها نوع من الصمت (المسيح وتعامله مع الشيطان ج2 15/03/1995).

by Medhat Takla

الملابس المحتشمة تبعد عن ثلاثة أمور

س: واحدة بتقول هل يا سيدنا الأغانى لا تليق بأبنة يسوع ؟ وهل الملابس الموضة والمكياج لا تليق بأبنة تعيش حياة روحانية مع المسيح ؟

ج: هو تتوقف على نوع الأغانى طبعاً الكتاب المقدس بيقول بمزامير وتراتيل وأغانى روحية مترنمين فى قلوبكم للرب. لكن الأغانى بتاعت العالم ديا لا تليق فعلاً بأولاد ربنا. عندك كتير فى الموسيقى الدينية من أجمل ما يكون فى الألحان وفى الترانيم وفى التراتيل. لكن ليست كل أنواع الأغانى يعنى مثلاً أفرض نشيد وطنى ما فيهوش حاجة كلهم بيقولوا بلادى بلادى فداكى دمى ما جراش حاجة. لكن طبعاً ما أظنش إنك إنت تقصدى هذا النوع يعنى.

س: هل الملابس الموضة والمكياج..؟ أنتوا عارفين إن الموضة دى بتتغير كل سنة فما أعرفشى أنـهى موضة تقصديها يعنى موضة السنة دى ولا السنة اللى فاتت ولا اللى قبليها وأنا لا عارف ديا ولا دى. المهم فى الملابس بالنسبة للبنت أن تكون ملابس محتشمة. يعنى أنا مش ها أخش فى الموضة دى غلط ولا صح. هل الملابس محتشمة ولا لأ. والملابس المحتشمة تبعد عن ثلاثة أمور:

الأمر الأول الملابس الكاشفة للجسم ودى أنواع وأشكال أو القصيرة جداً.. إلى آخره يعنى.

وفيه ملابس شفافة جداً ودى برضه غلط.

وفيه ملابس ضاغطة يعنى بحيث إن الجسم يبان منها.

فلا الملابس الشفافة ولا الملابس الضاغطة ولا الملابس القصيرة جداً ولا الملابس الكاشفة للجسم. إنما ينبغى أن تكون الملابس محتشمة. عارفين يعنى إيه محتشمة ؟ وكلما كانت المرأة مغطاه كلما كانت موضع أحترام الرجل وتقديره. والبنت المتبرجة ما بتكونش موضع أحترام الرجال. ممكن تكون موضع شهوة الرجل الخاطئ لكن ما تكونش موضع أحترامه. جايز تكون موضع شهوته الرجل الخاطئ لكن ما تكونش موضع أحترامه.

فإنت شوفى الملابس اللى بتلبسيها دى من أى نوع ونطبّق القواعد مش الجزءيات (قدوة السيد المسيح لنا 01/03/1995).

by Medhat Takla

هل شغل البيت يعتبر عطاء ؟

س: واحدة بتقول بعد سماعى العظة الماضية عن العطاء وخاصة عبارة إن لم تجد ما تعطيه أعط راحتك للآخرين. فهل شغل البيت يُعتبر عطاء ويطبّق عليه الآية: كل واحد يأخذ أجرته بحسب تعبه ؟

ج: طبعاً شغل البيت يعتبر عطاء ما فيش شك. لأن المرأة بتُعطى من راحتها فى شغل البيت لكى تريح الآخرين فيعتبر عطاء.

س: وبعدين بتقول إذا كان شغل البيت ومسئولياته أحياناً يكون على حساب علاقتى بربنا مثل تقصيرى فى الصلاة والقراءة وحضور الكنيسة. هل هذا أيضاً عطاء ؟

ج: لأ. الأمر يحتاج لحكمة، حكمة فى تنظيم الوقت. يعنى إنت تتعبى من أجل البيت يعتبر عطاء، لكن تتعبى بحكمة بحيث إنك إنت كما تُعطى الآخرين تُعطى ربنا حقوقه وتُعطى حياتك الروحية حقوقها.

س: كيف أرضى ربنا فى الآية ينبغى أن يطاع الله أكثر من الناس وفى نفس الوقت لا أكون سبب فى تعب من فى البيت أو شعورى بالتقصير من ناحيتهم ؟

ج: ما نبالغش مبالغة شديدة فى شغل البيت بحيث إنه ياخد وقت يضيّع الروحيات ويضيّع الكنيسة ويضيّع كل حاجة. يعنى كل حاجة تكون بعقل.. بعقل وبحكمة. مش واحدة مثلاً فى شغل البيت عايزه تلّمع الزجاج علشان يبقى نضيف تقعد تشتغل فى تلميع الزجاج ساعتين تلاتة وما تصليش ؟ لأ أبداً. نقطة تانية عايز أقولها لك ياريت تكونى حافظة المزامير والصلوات، وأثناء ما بتشتغلى فى البيت قولى مزاميرك وصلواتك أثناء الشغل. أثناء ما بتطبخى فى البيت قولى مزاميرك وصلواتك أثناء الطبيخ، على الأقل يطلع طبيخ مبروك مطبوخ بالمزامير وبالصلوات وحاجة تمام ينفع الجسد والروح معاً ويبقى بركة. أتمرّنى على الحفظ كل ما تحفظى كل ما يكون قلبك مع ربنا. أحفظى أشياء من التسبحة، من التراتيل وأنتى بتشتغلى تبقى بترتلى وبتصلّى وخصوصاً فيه بعض التراتيل لها أسلوب الصلوات. زى مثلاً يا رب يسوع المسيح مخلصى الصالح ليها أسلوب الصلاة. زى مراحمك يا إلاهى كثيرة جداً فيها أسلوب الصلاة. فإخلطى الشغل بالصلاة وما تخليهوش مجرد شغل بعيد عن ربنا (التكامل فى الفضائل 09/07/1997).