ظهور النجم للمجوس

س: ظهر النجم للمجوس وعرفوا منه أن هناك عظيماً قد ولد كيف عرفوا أن النجم يشير لمولد عظيم ؟ هل من علم الفلك والتنجيم ؟ وهل التنجيم له علاقة بالنجوم ؟ وكيف عرفوا أن النجم يقودهم لهذا العظيم … إلى آخره ؟ وكيف يسير نجم فى هذا المسار الغريب وهل هذا الأرتفاع المنخفض … ؟ وهل لكل إنسان يولد نجم يظهر بولادته ويختفى بمماته ؟ وهل هناك علاقة بين الأفلاك والنجوم والكواكب وحياة الناس … أنت كبّرتـها خالص … وما يكتبه الفلكيون ؟

ج: فى الحقيقة أن النجم الذى ظهر للمجوس لا علاقة له إطلاقاً بالفلك ولا علاقة له بالنجوم ولا بالتنجيم. ولقد عرض القديس يوحنا ذهبى الفم لهذا الإشكال وأجاب علية فى تفسيرة لالجزء الخاص بالمجوس فى إنجيل معلمنا متى وخلص القديس يوحنا ذهبى الفم إلى أن النجم الذى ظهر للمجوس لم يكن نجماً عادياً … لم يكن نجماً عادياً من النجوم التى تدور فى الأفلاك للأسباب الآتية:

أول سبب أن النجم جاى من الشرق للغرب ونازل من الشمال للجنوب وهذا إتجاه لا يمكن يكون إتجاه نجوم اللى بتلف من الغرب للشرق فهو إتجاه غير إتجاه النجوم الطبيعية.

ثانياً: أن هذا النجم كان يقف حيناً ويسير حيناً آخر ودى مش أخلاق النجوم ولا طباعهم أبداً … مش عوايدهم يعنى إن النجم يقف فى حته ويمشى. النجم فى دورة مستمرة بطريقة رتيبة أو إن يظهر حيناً ويختفى حيناً آخر، فلما راحوا عند هيرودس أختفى النجم خرجوا ظهر لهم يعنى الكلام دا مش معقول، أو إن النجم ينزل حيث كان الصبى لأن لو فوق فى السما ما يعرفوش فى أنـهى حتة. زى واحد يمشى يلاقى القمر فوقيه وبعدين يمشى له 10، 12 كيلوا يلاقى القمر فوقيه برضه ويمشى كمان 50  كيلوا يلاقى القمر فوقيه فدى ما تعبرشى لكن هو عرف مكان الصبى إن النجم نزل نزل نزل نزل لغاية لما بقى قريب جداً من المكان من جهة العلو .كل هذه ليست من طبائع النجوم والذى أستهوى المجوس أنـهم رأوا نجماً يختلف عن باقى النجوم فاستنتجوا أن وراؤه سراً وأن لابد بعقليتهم همّا لابد أن فيه عظيم قد ولد فقالوا ياترى يطلع مين دا ؟ ويستنتج القديس يوحنا ذهبى الفم أن هذا النجم لم يكن نجماً إنما كان قوة إلهيه ظهرت فى هيئة نجم، يعنى مش نجم طبيعى. وقال أن هؤلاء المجوس يؤمنون بالنجوم فالله نزل إلى مستواهم لكى يرفعهم إلى مستواه، أظهر لهم شئ غريب زى النجم استلفت أنظارهم ولكن لما وصلوا إلى درجة من الوعى الروحى وذهبوا إلى الطفل يسوع وسجدوا له وآمنوا به وقدموا له هداياهم لم يرجعهم إلى بلادهم عن طريق نجم لأن مستواهم الروحى كان أرتفع وإنما اُوحى إليهم فى حُلم أنـهم يرجعوا دون أن يمروا على هيرودس لأنـهم أرتفعوا إلى مستوى روحى فوق مستوى التنجيم.

     أما النجوم وعلاقتها بالناس وحظوظهم دى مسأله لا يعرف الغيب إلا الله وحده مين اللى يعرف الغيب ؟ كمان الأفلاك اللى بيجيبوها بتوع النجوم دول فى الجرايد كل يوم تقرا حظك أنت والنجوم … دول يعنى عبارة عن إيه 12 حظ بيقولوهم لحوالى 40 مليون مصرى مثلاً فى مصر، يعنى كل 3 مليون ونص لهم بخت واحد فى هذا اليوم أنتوا تصدقوا الكلام دا. وساعات مثلاً يقولك دا نجمه فى برج الجوزاء مثلاً ويقول له أمامك مشكلة مالية معقدة ها تحل وجايز يكون 20 ألف طفل مولودين فى برج الجوزاء ومافيش قصادهم لا مشاكل مالية ها تحل ولا حاجة أبداً. ومش معقول أن كل الناس الـ 40 مليون دول يكون حظوظهم محصورة فى 12 حظ. كمان ساعات يكون ما يقوله فلكى غير ما يقولة فلكى آخر. وساعات يكون كلام عام … كلام عام ينفع لأى واحد فى الدنيا زى الناس اللى بيشوف البخت فى الفنجان مثلاً يقول قصادك سكة مفتوحة طب ما الناس كلهم قصادهم سكة مفتوحة يعنى دا عرف إيه جديد. أو واقف قصادك واحد تخين وواحد رفيّع، الف فى المية كل واحد قصاده التخين والرفيّع كلام يعنى كلام عام ينطبق على كل إنسان فى الدنيا ولا يمكن تحديداً لشئ له معالم واضحة بالنسبة للمستقبل. النجوم دى أمور إحنا ما نقدرش نخش فيها أبداً والكتاب المقدس لا يوافق عليها (ذهباً ولباناً ومراً 11/01/1980).

الألحان الفرايحى شئ وكسر الصيام شئ آخر

س: ناس بيسألوا هل يوجد صيام فى يومى الأربعاء والجمعة من بعد العيد لعيد الغطاس ؟ والبعض بيسأل هل فيه صيام أربع وجمعة من الميلاد للختان ؟      

ج: الجواب أيوه. صيام الأربعاء والجمعة يُحفظ باستمرار فى الكنيسة ولا يكسر إلا إذا كان يوم الأربع أو يوم الجمعة عيد سيدى كبير يعنى إذا جه يوم عيد الميلاد الأربع أو الجمعة نفطر فيهم إذا جه عيد الغطاس يوم الأربع أو يوم الجمعة نفطر فيهم وكذلك فى أيام الخماسين بنفطر فى الأربع والجمعة خمسين يوم بعد القيامة، لكن من الميلاد للغطاس لا يجوز إطلاقاً  كسر صيام الأربع والجمعة لا يجوز … عيب خالص الكلام دا.

لعل البعض جا له ارتباك من إن الطقس بتاع الصلاة فى الكنيسة يعنى الألحان بتبقى ألحان فرايحى من الميلاد للغطاس، ألحان فرايحى مش معناها يتكسر الصوم، بدليل أن يوم حد الزعف بنصلى بألحان فرايحى والصوم موجود. فالألحان الفرايحى شئ وكسر الصيام شئ آخر ما يصحش أبداً. اللى فطروا الأربع والجمعة من الميلاد للختان يعوضوهم بأيام تانية، مش يعوضوهم لما ييجى الصيام الكبير يعوضوهم من دلوقتى يعنى يصوموا بدالهم (ذهباً ولباناً ومراً 11/01/1980).

س: هل أنا مسئول عن خلاص من هم حولى ؟ وإذا كانوا لا يهتمون بكلامى ولا ينصتون إلى كلامى، ماذا أفعل ؟

ج: إنت مسئول إنك توصل كلمة الخلاص للّى حواليك لكن لست مسئولاً أن يقبلوا الكلام أو لا يقبلوا. حتى الأنبياء كانوا بيوصّلوا كلمه الخلاص لكن فيه ناس ما كانوش بيسمعوا ليهم وما كانوش بيطاوعوهم. فلك أن تشهد للرب، ولكنك لا تستطيع أنك تضمن أن كل الناس يخلصون. نفس السيد المسيح له المجد بشّر الناس وقال لهم الكلام الروحى اللطيف العميق اللازم لخلاصهم والبعض قَبل والبعض لا يقبل. وفى مثل الزارع … الزارع خرج ليزرع بعض بذار أُلقيت على الطريق وخطفها الطير، وبعض بذار نمت وخنقها الشوك، وبعض بذار جابت نتيجة 30، 60، 100. فإنت تقول ما تستطيع للناس، ولكن ما تُعتبرش مسئول عن خلاصهم يعنى. لوط أب الآباء نصح أهل سادوم بيقول الكتاب كان كمازح فى وسط أصهاره وما سمعوش ليه، فأنت مش مسئول إلا عن أنك تبلّغ كلمة ربنا وخلاص. لكن مسئوليتك فى الآتى:

+ أول حاجة: تقول كلمة الله وتكون قدوة فى التنفيذ، لأن جايز تبلّغهم الكلمة وأعمالك ما تخليهمش يستفيدوا منّك. فيبقى هنا أنت مسئول لأن قدوتك أساءت إلى قوة الكلمة.

+ تانى حاجة: أنك أنت لما تُبلّغ الناس كلمة الله تبلّغهم الكلمة فى وداعة وفى هدوء وفى حكمة. لأن بعض الناس بينصحوا غيرهم فى كبرياء فيبقوا مش عايزين يسمعوا. أو يوبّخوا غيرهم بعنف فيكرهوهم من أجل توبيخهم ليهم. ولا تنسى قول الكتاب رابح النفوس حكيم … رابح النفوس حكيم. علشان تكسب الناس لازم تكون حكيم. علشان تخلّص نفوس اللى حواليك تكون حكيم. ومن ضمن الحكمة أنك ما تطلبش منهم ما هو فوق مستواهم، لأن ساعات واحد ييجى لإنسان مبتدئ ويتعبه بوصايا شديدة ما يقدرش عليها … يقول الدين دا ما أقدرش أمشى فيه. أمشى مع الناس فى هدوء واحدة واحدة … تدريجاً. التلاميذ نفسهم قالوا عن الأمم الداخلين فى الإيمان لا نثقّل عليهم بوصايا كثيرة. والمسيح  قال عندى كلام لأقوله لكم ولكنكم لا تحتملون الآن. فيبقى إذا أردت أنك تساهم فى خلاص أنفس الناس كن حكيماً، كن عارفاً بالنفوس، تدرج معاهم، كلمهم بحكمة … بوداعة … بغير انتهار.

+ وأيضاً لا تيأس، يعنى إذا أتكلّمت مرة ومرتين وما جابتش نتيجة … ما تيأسش، جايز الحكاية محتاجة لوقت.

+ أجعلهم أيضاً يستفيدون من حياتك أكثر مما يستفيدون من كلامك (الأكاليل 05/04/1989، أنت تسأل وقداسة البابا شنوده الثالث يجيب 05، 12، 19/04/1989).

بركة ربنا

     انتم ابحثوا عن الملكوت وكل هذه تذدادونـها، تجد بركة ربنا حلّت فى بيتك، بركة ربنا حلّت فى مالك، بركة ربنا حّلت فى القليل الذى عندك أصبح أكثر من الكثير.

هو المشكلة مش إيه اللى فى ايدينا، مشكلة اللى فى ايدينا فيه بركة ولا لأ.

زمان كان واحد مرتبه قليل ومبسوط خالص وعايش كويس. دلوقتى بتيجى آلاف للناس وزى الهوا بتطير كدا ما فيهاش بركة، مش الجنيه فقد قيمته الشرائية، الجنيه فقد البركة اللى ربنا كان حاططها فيه … ليه ؟ لأن إحنا مش ماشيين مع ربنا.

اقرأ سفر التثنية إصحاح 28 البركة اللى كانت تقال لكل الشعب. مباركاً تكون فى البيت ومباركاً تكون فى سلّتك ومعجنك، ثمار غنمك وإناث بـهاءمك. كله كل شئ تحل فيه البركة، ليه كل شئ بتحل فيه البركة ؟ لأن أنا مهتم بربنا وبملكوت ربنا. ربنا يقول ما دام مهتم بيّا أنا أهتم بيك، إرجعوا إلىّ أرجع إليكم. إنت بتهتم بمرتبك تقول يكفّينى إزاى عمرك ما بتهتم بالعشور تديها لربنا، لو اعتبرت إن العشور دى خارجة من المرتب كأنـها مستقطعة زى التأمينات ومستقطعة زى الإستحقاقات بتاعت الحكومة اللى بتاخدها منك وقلت مرتبى دا التسع أعشار. كنت تبص تلاقى التسع أعشار دول أكتر من الواحد صحيح. لأن تسع أعشار + بركة يبقوا أكبر من الواحد. وواحد من غير بركة يبقى أقل من تسع أعشار. هى مش مسألة رياضة مسألة بركة (الملكوت 07/11/1990).

عرس قانا الجليل والخمر غير المسكره

س: فى عرس قانا الجليل يوجد رأى يقول إن الخمر كانت مسكره وآخر يقول إن الخمر غير مسكره فأرجو إفادتنا ؟

ج: لم تكن مسكره لأن السكر حرام فى الكتاب المقدّس فمش معقول السيد المسيح ها يبارك خمر مسكره والناس يخرجوا متدروخين مش معقول فلم تكن مسكره لكن كانت  خمراً جيدة … جيدة لكن مش مسكره (مستويات فى الفضيلة 09/02/1994).

 راهب، موناخس

أنبا أنطونيوس أعطاهم بداية لحياة من نوع جديد. ما هى هذه الحياة الجديدة التى بدأها الأنبا أنطونيوس. تسموها الرهبنة … صدقونى اسم الرهبنة دا اسم مش مظبوط … بصراحة يعنى.

رهبنه يعنى إيه ؟ إنسان يرهب الله يعنى يخافة ؟! دا أنبا أنطونيوس صاحب هذا الطريق قال لهم يا أولادى أنا لا أخاف الله … فتعجبوا ؟! هذا الكلام صعب يا أبانا. قال لهم ذلك لأنى أحبه والمحبة تطرح الخوف إلى خارج … ما باخافش من ربنا. يبقى تسمى راهب … جات كلمة راهب منين. ترجمة عربية غير دقيقة. الترجمة اليونانية موناخس يعنى متوحّد يمكن ترجمة أفضل. ولا اسم مناخس ولا اسم راهب ولا حاجه، كان للرهبان اسم آخر أو صفة أخرى سُجلت فى التاريخ هى أفضل اسم. على الأقل ينطبق على الأنبا أنطونيوس خلينا فى الأنبا أنطونيوس بلاش كل الرهبان، هذا اللقب هو ملائكة أرضيون أو بشر سمائيون … آدى الرهبان. ملائكة أرضيون أو بشر سمائيون. ناس بيعيشوا فى طقس الملائكة وهم على الأرض فى الجسد … آدى الرهبان. تسميهم ملايكة على الأرض أو تسميهم بشر فى السماء، سميهم ما شئت هم بشر سمائيون أو ملائكة أرضيون. ومن أول هذه الملائكة … القديس الأنبا أنطونيوس (الأنبا أنطونيوس 30/01/1979).

الأنبا أنطونيوس ومعرفة القراءة والكتابة

س: الأنبا أنطونيوس أب الرهبان لم يكن يعرف القراءة والكتابة فكيف عرف وقرأ الكتاب المقدس ؟

ج: فيه ناس بيقولوا كلمة كان أمياً يعنى ما كانش يعرف اليونانية فكان الشخص الذى لا يعرف اليونانية يعتبر أمياً يعنى لأنه قال فى بعض أقواله قال يعنى وإن أحتجت لمعرفة ففى كتاب الله اقرأ. يعنى أعتقد إنه كان يعرف القراءة والكتابه بس ما كانش يعرف اليونانية لذلك أعتبر جاهلاً أو أمياً (أنت تسأل وقداسة البابا شنوده الثالث يجيب ج13 1986).

الأنبا انطونيوس أب لطريق روحانى

س: واحد بيقول لماذا يذكر اسم الأنبا أنطونيوس قبل الأنبا بولا رغم إن الأنبا بولا أول السواح وعاش فى الرهبنة قبل الأنبا أنطونيوس ؟

ج: السبب هو إن الأنبا أنطونيوس أب لطريق روحانى وله تلاميذ فى الرهبنة من كل مكان. فأنبا بولا قداسته يدوبك خاصة بيه لوحدة، لكن قداسة الأنبا أنطونيوس شملت قيادة روحانية لذلك يسمونه أب جميع الرهبان. علشان كدا بيقولوا العظيم الأنبا أنظونيوس – بى نشتى أفا انطونيوس – أب طريق، أب جميع الرهبان (العهد 31/01/2001).

كاتب أنكر قصه تواضع الأنبا أنطونيوس للشياطين

س: واحد بيسأل بيقول ما رأيكم فى كاتب أنكر قصة تواضع الأنبا أنطونيوس اللى قال فيها للشياطين إيها الأقوياء ماذا تريدون منّى أنا الضعيف على أعتبار إن القصة لم ترد فى بعض الكتب الغربية ؟

ج: فى الحقيقة هذا الإتجاه فى منتهى الخطورة لأنه إذا أنكر قصة عن القديس الأنبا أنطونيوس مشهورة زى دى بيقى بينكر إيضاً بستان الرهبان ويشكك فى بستان الرهبان ويشكك فى سير القديسين لمجرد إن هو نفسه بينادى بإن الواحد ينتهر الشيطان ويدوس على الشيطان ويهجم على الشيطان ويقول لك أنتهر أهجم أهتف أعمل حاجات زى دى. فإنكارها عبارة عن تشكيك فى البستان وتشكيك فى سير القديسن.

تانى نقطه عايز أقولها إن هذا المبدأ نفسه لو مشينا بيه ها يبقى فى منتهى الخطورة أنا طبعاً مش عايز أقعد أفحص فى كل سير القديسين علشان أشوف القصة دى مكررة ولا لأ أنا عايز أمسك المبدأ نفسه.

+ ما رأيكم أن فيه معجزات فى الكتاب المقدس لم ترد إلا فى إنجيل واحد ولم ترد فى باقى الأناجيل هل ننكرها علشان لم ترد فى باقى الأناجيل ؟! معجزة إقامة لعازر فى يوحنا 11 ولم ترد فى أى إنجيل آخر. معجزة منح البصر للمولود أعمى فى يوحنا 9 ولم ترد فى أى إنجيل آخر. معجزة شفاء مريض بيت حسدا اللى بقى له 38 سنة فى يوحنا 5 ولم ترد فى أى إنجيل آخر. معجزة عرس قانا الجليل فى يوحنا 2 ولم ترد فى أى إنجيل آخر. معجزة صيد السمك الكثير بعد القيامة فى يوحنا 21 ولا ترد فى أى إنجيل آخر هل ننكرهم المعجزات دى كلها ؟!

+ خدوا مثلاً بعض أحداث مجئ الميسح إلى مصر لم يرد إلا فى متى 2 ولم يرد فى أى إنجيل آخر فهل ننكره لهذا السبب. ذهاب المسيح إلى الهيكل وعمره 12 سنة وذهابه إلى الهيكل أثناء تطهير مريم الاتنين دول لم يردوا إلا فى إنجيل لوقا فهل ننكرهم لأنـهم لم يردوا فى الأناجيل الأخرى.

+ أحاديث كثيره لم ترد إلا فى إنجيل واحد مثلاً لقاء المسيح مع نيقوديموس وحديثه معاه لم يرد إلا فى إنجيل يوحنا إصحاح 3. مافيش فى أى إنجيل آخر. لقاء المسيح مع السامريه لم يرد إلا فى يوحنا إصحاح 4 لم يرد فى أى إنجيل آخر. حديث المسيح مع اليهود عن إن هو خبز الحياه والتناول منه حديث طويل لم يرد إلا فى يوحنا 6 ولم يرد فى أى إنجيل آخر. المسيح الراعى الصالح لم يرد إلا فى يوحنا 10 ولم يرد فى أى إنجيل آخر. حديث المسيح مع الرسل فى لقاؤه الأخير معاهم وعن الروح القدس ومجيئه لم يرد إلا فى يوحنا من إصحاح 14 إلى إصحاح 16 ولم يرد فى أى إنجيل آخر. صلاه المسيح الختامية الكبيرة فى مناجاته مع الآب لم ترد إلا فى يوحنا 17 ولم ترد فى أى إنجيل آخر هل كل الحاجات دى ننكرها ؟! خدوا مثلاً مقابلة المسيح مع زكا العشّار لم ترد إلا فى إنجيل لوقا إصحاح 19 هل ننكرها مش موجوده فى الأناجيل الأخرى. الفرسيى والعشار ووجودهم فى الهيكل لم ترد إلا فى لوقا 18 ننكرها ؟! قاضى الظلم لم يرد إلا فى لوقا 18 ننكره ؟ !

هل أحداث موجودة فى إنجيل واحد ولم ترد فى أناجيل أخرى ننكرها لأنـها لم ترد إلا فى هذا الإنجيل ؟! كلام مش معقول … كلام مش معقول.

ونفس هذا المبدأ ممكن يؤدى إلى التشكيك فى الإنجيل ذاته يقول لك دى لم ترد إلا فى إنجيل واحد. لما فيكم واحد يدرس الأناجيل يقول لك أحداث أو معجزات أنفرد بـها متى وحده. معجزات أو أحداث أنفرد بـها مرقس لوحده. معجزات أو أحداث أنفرد بـها لوقا لوحده. هل كون إن مش موجودة فى باقى الأناجيل معناها ننكرها ؟! أنا مش بقول إن القصة دى مش موجودة فى الباقى أنا بس بقول بأناقش المبدأ ذاته.

+ فيه حاجه تانية عايز أقولها لكم فى أسلوب الغربيين ساعات الفكر الغربى ما بيتفقش مع الفكر الشرقى فى بعض أمور معينة ولذلك ما يحطهاش. مثال لهذا لما نبحث الأفكار الثمانية المقاتلة للنفس زى فكر الكبرياء، فكر المجد الباطل، فكر البطنة، فكر الزنا … إلى آخره هذه الأفكار الثمانية مجموعة نيقة وما بعد نيقية فكر الزنا بالذات ما كتبهوش حذفوه لأن الفكر الشرقى ما بيتفقش معاهم فماذكرهوش خالص هل معناها إن الآباء ما كتبوهوش. مجموعة آباء نيقية وما بعد نيقية لم يذكروا أى حرف من كتابات كيرلس الكبير الذى رأس مجمع أفسس هل معناها ننكر وجودة لأن المجموعة دى ما تكبتهوش ؟! ليه بس الكلام دا ؟؟؟ !!!

+ اللى عايز أقوله لكم بقى فى إختصار إن قصص الآباء الرهبان كانت قصص كتيرة جداً جداً جداً بشكل لا يُحصى فكان كل واحد من الكتّاب بيجمّع بعض حاجات ويحطّها ما يقدرش يحط كل حاجة قصص كتيرة جداً. دا فيه قديسين يمكن لم يرد عنهم شئ خالص فى تاريخ حياتـهم. سير القديسين كتيرة جداً كل واحد كان بيجيب بعض حاجات ويسيب الباقى. ما يقدرش يجيب كل حاجة ولو كتبوا كل حاجة دى فين دى بقى … (التأمل فى الحياة الروحية 09/10/1991).