الناس اللى بيتبرعوا بدمهم ما خدمة، اللى بيتبرعوا بأعضاء من أعضاءهم ما هى خدمة. اللى بيهتموا بالحالات الميئوس منها  أهى خدمة. إيه رأيكم فى الأمراض المستعصية المعروف إن صاحبها ها يموت.. ها يموت ياريت توجد خدمة حد يقعد جنبه يسهّل له الأيام الأخيرة ويصلّح علاقته مع ربنا ويقوده لربنا قبل ما يموت من غير ما يقول له إنت ها تموت، يقول له ما يقولهوش يعنى دى حاجات إحنا ما نخشش فيها فيه حاجات بتبقى معروفة. قيادة الناس فى لحظاتـهم الأخيرة. كون إن واحد يقعد جنب عيان ويقول له كلمتين يقودوه لربنا والعيان بيكون مستعد يسمع. له أذنان للسمع لأنه بيطلب رحمة ربنا. مش بس العيان تفوت عليه وتدّى له صحبة ورد، أو تدّى له علبة شيكولاتة وبرضه كلمتين لطاف. ما قدرتش تقول كلمتين لطاف إدّى له إنجيل وقول له خليه تحت راسك تحب تقرا فيه أقرا فيه. إدّى له صورة دينية مؤثّرة وقول له خد بركة القديس بتاع الصورة ديا. يعنى حاول توصّل الناس لربنا بطريقة سهلة (الخدمة وآثارها الروحية 24/06/1992).