س: بيقول الكتاب باطل الأباطيل الكل باطل. فما قيمة الأهداف الأرضيه كي يسعي إليها الناس؟ وكيف تكون للإنسان أهداف أرضية وما هي؟ وماذا سيكون قيمتها وأهميتها بجانب الهدف السماوي؟ كيف تكون لي كطالب مقبل علي الثانوية العامة الحماس اللازم للإستذكار الجيد ؟ وماذا سيكون الهدف الذي سيسبب هذا الحماس ؟ وما الفرق بين هذه الكلية أو غيرها ؟ الكل باطل ؟

ج: طبعاً الطالب اللي بيجيب مجموع في الثانوية ما بيقولش الكل باطل. لكن لما ما يجيبش مجموع يقول الكل باطل. شوف عايز أقول لك حاجة، الكلية ليست هدفاً ولا الوظيفة تكون هدفاً أيضاً. الهدف الحقيقي هو إنك تسعي لأبديتك وتكون لك حياة روحية متصلة بالله، الباقي كله يعتبر وسائل وليس أهداف. يعني الهدف الوحيد هو ربنا. لكن لكى تصل إلي ربنا بتعيش حياة مرضية علي الأرض. لو عشت بلا وظيفة جايز ما بتقدرش ترضي ربنا، ولو عشت بلا تعليم ربما برضه مش ها تقدر ترضي ربنا فيبقي حكاية التعليم والوظيفة مسألة كيف تقضي حياتك علي الأرض هادئً كوسيلة وليس كهدف. لو خلّيت الوظائف أهداف والتعليم أهداف ها تتعب في حياتك، كلها مجرد وسائل إزاي بنقضي اليومين علي الأرض. لو الإنسان وصل إلي إن الكل باطل وقبض الريح ها يصل إلي حياة الزهد وينتهي إلي الرهبنة. لكن مش الكل بيقدر علي كدا. اللي بيقتنع فعلاً فعلاً بإن الكل باطل وقبض الريح غالباً بينتهي إلي الرهبنة لكن مش الكل يقدر علي كدا. لكن فيه ناس برضه بيعيشوا متزوجين وأتقياء وكويسين ويقول الكل باطل، يعني ما يتعلقش بـهذه الأمور. يعني زي ما بيقول بولس الرسول: يكون الذين يستعملون العالم كأنـهم لا يستعملونه. يقول لك أهو يومين بنقضيهم علي الأرض المهم إزاي نوصل لربنا. ولكن إنت بتنجح في الثانوية وتجيب مجموع لأن المفروض فيك في حياة الكمال أن تكون تلميذاً كاملاً في حياته الدراسية، مش ضروري إن المجموع تخش بيه كليه كبيرة ولا لأ، لكن لابد أن تكون شخصاً كاملاً. في كل عمل يوضع في يديك تكون شخص كامل فيه. في الدراسة تكون شخص كامل، في البيت تكون كامل، في الوظيفة تكون كامل، دا المطلوب منك. لأن لما أولاد الله يكونوا فاشلين في حياتـهم الدراسية يبقي كأن الدين ما بيدي لهمش دفعه عملية في حياتـهم إنـهم يكونوا أشخاص ناجحين. يقول لك عن الرجل البار في المزمور الأول: وكل ما يعمله ينجح فيه. وقيل عن يوسف الصديق إنه كان شاباً ناجحاً وكان الرب معه. فالمفروض إنك تكون ناجح وتعطي صورة مثالية عن الإنسان المتدين اللي كل اللي بيعمله بينجح فيه. إفرض ما اشتغلتش يعني تقعد عالة علي الناس ؟! هي دي الصورة المثالية اللي إنت عايزها للإنسان الروحي (كيف تحصل على الراحة 07/09/1988).