طرق مصادقة السيدة العذراء

س: أريد مصادقة السيدة العذراء، فكيف يكون ذلك ؟

ج: هى مستعدة بس الحكاية منكم أنتو. مصادقة العذراء تأتى بعدة أمور:

أول حاجة أن الإنسان يقرأ كتير عن العدرا وفضاائل العدرا وإكرام العدرا ومعجزات العدرا ومحبة العدرا للناس ومحبتها لربنا ومحبة ربنا ليها … إلى آخره.

تانى حاجة الواحد يذكر العدرا فى صلواته بإستمرار والكنيسة وضعت لنا الجزء الثالث فى صلوات الأجبية خاص بالعدرا.

التسابيح أيضاً الخاصة بالعدرا.

الصلاة أمام الأيقونة، الشموع حاجات كتيرة خالص (البابا شنوده الثالث. محاضرة: نحو الكمال المسيحى. بالإسكندرية خلال صوم الميلاد).

العذراء مريم ولقب السيدة

س: واحد بيقول هل من الخطأ أن نطلق على العذراء مريم لقب سيدة أو السيدة العذراء ؟ وهل لقب سيدة يتعارض مع بتولية العذراء ؟

ج: الظاهر أنك إنت بتتكلم بأسلوب المفاهيم العربية العامية يعنى، يقول لك دى واحدة ست ولا بنت. سيدة يعنى … امرأة لها أحترامها يعنى. وسيدة مؤنث سيد.

+ أحنا بنقول: أن نيب ترنتى  ثيؤتيكوس … نيب يعنى سيد. سيد يعنى Lord بالأنجليزى و Lady بالمؤنث. لكن مش معناها سيدة يعنى مش بنت … لأ. يعنى لما واحد بييجى يُلقى خطبة بيقول سيداتى سادتى بيكلم بس المتجوزين ولا كل الستات ؟! كله. سيد وسيدة. ما لهاش دعوة بالبتولية أبداً من ناحية اللغة. العُرف العامى فى اللغة العربية العامية، حتى اللغة العربية الفصيحة ما فيهاش دى، أن كلمة سيدة يعنى متجوزة أو مخلّفة … لأ. سيدتنا … لما نقول ستنا يعنى (التساهل مع الخطية 29/08/1990).

أيتها العذراء الطاهرة أسبلى ظلك السريع المعونة على عبدك

س: واحد بيقول فى القطعة الثالثة من صلاة النوم نقول: أيتها العذراء الطاهرة أسبلى ظلك السريع المعونة على عبدك، فما معنى عبودية العذراء مع أن هذا يتنافى مع الأرثوذكسية ؟

ج: لأ ما يتنافاش. اقرأ فى كتاب الكهنوت ها تجد حكاية سيد وعبد دى موجود ليها أمثلة كتيرة خالص. والسيدة العذراء يعنى إحنا بنقول سيدتنا وملكتنا كلنا إذا كان كلمة سيد أطلقت على كثيرين من الذين يعتبرون أولاد للعذراء فكم بالأولى السيدة العذراء نفسها اللى بيقول عليها الكتاب قامت الملكة عن يمينك أيها الملك ؟! فممكن أنك أنت تخاطب الملكة وتقول عبدك. وكلمة عبدك دى موجودة فى الكتاب المقدس كتير خالص يعنى ما تضايقوش منها.

البركة اللى أخدها يعقوب أبو الآباء قال له كن سيداً لأخوتك وليسجد لك بنو أمك … كن سيد ليهم وليسجد لك بنو أمك. وحكاية عبدك دى … بـها داود النبى مرات عديدة جداً تلاقيها  موجودة كتير فى الكتاب المقدس يعنى مش ضد التعليم الكتابى أبداً.

وعبد هنا لما تقال للسيد غير طبعاً العبودية لله، لأن العبودية لله تحمل عبودية وعبادة ولكن السيدة العذراء تعتبر سيدة لكن ما فيش عبادة (البابا شنوده الثالث. محاضرة: لا تحزنوا روح الله القدوس الذى به ختنتن 00/00/1985).

هل نحن عبيد للعذراء ؟

س: واحد بيقول نقول فى قطع النوم أيتها العذراء الطاهرة اسبلى ظلك السريع المعونة على عبدك. فهل نحن عبيد للعذراء ؟

ج: لأ كلمة على عبدك يعنى خدامك. فهل إنت لما بتبعت جواب لأى واحد وتقول له سيدى كذا أو إلى السيد فلان إنت بتعتبر إنه سيد وإنت عبد ؟! تعبير مؤدب بنقوله على السيدة العذراء على إعتبار إن إحنا بنقول عليها الملكة القائمة عن يمين الملك والسيدة العذراء … إلى آخره. ما فيش حكاية عبودية. ما تكبرهاش فى مخّك أو ما تخليش ناس من الطوائف الأخرى يكبّروها فى مخّك (الآباء الرسل 10/07/2002).

العذراء والدة الإله … ثيؤتوكوس

س: واحد بيقول أود أن أسأل هل حملت أم النور العذراء مريم لاهوت المسيح مثلما حملت الناسوت ؟ أم أتحد لاهوته بالناسوت بعد الميلاد ؟     

ج: لأ طبعاً أتحد لاهوته بناسوته داخل بطن السيدة العذراء. علشان كدا سُميت والدة الإله. أما حكاية أن حملت الناسوت فقط واتحد اللاهوت بالناسوت بعد الميلاد فدى فكرة نسطورية وقد حرمت الكنيسة نسطور وكل أفكاره. ودى اللى بتخلى البعض يسموها أم يسوع مش والدة الإله. إحنا بنسميها ثيؤتوكوس … ثيؤتوكوس يعنى والدة الإله جواه، أتحد الاهوت بالناسوت داخل بطن السيدة العذراء (البابا شنوده الثالث. محاضرة الغضب 27/08/1986).

عيد صعود جسد السيدة العذراء

سنحتفل باكر إن شاء الله بعيد صعود جسد السيدة العذراء مريم إلى السماء وكل عام وجميعكم بخير. بـهذه المناسبة أود أن أكلمكم عن الأعياد.

ربنا الذى يريد أن يفرح أولاده جعل لهم أعياداً على الأرض لكى تكون أيام فرح. فيه بعض الناس يظنون أن الحياة هى مجرد انسحاق وبكاء على الخطية وحزن دائم ويقدمون صورة مشوهة عن الدين إنه كله حزن وذل، بينما الكتاب بيقول: افرحوا كل حين وأقول أيضاً افرحوا. وربنا جعل لنا أعياد نفرح فيها، والأعياد دى على أنواع كثيرة وكل عيد منها له دلالته:

+ أول عيد قدمه الله للبشرية هو يوم الرب، فى كل أسبوع قال ان ربنا ها يعطيك يوم لكى تستريح فيه، عمل من الأعمال لا تعمل … تستريح. ربنا عايزك تستريح، لكن البشر اعتبروا هذه الراحة ثقلاً عليهم وبقوا يتضجروا، إزاى نقدس يوم للرب ما نقدرش نستريح وزعلانيين من ربنا علشان مش عايزين يستريحوا. دا على رأى واحد قال إن الله الذى خلق الإنسان ويعرف طبيعة الجسد عارف إن الطبيعة دى محتاجة انـها تستريح يوم فى الأسبوع. والناس ينهكون أنفسهم ويرهقون أنفسهم ويرفضون الراحة فيعتلون ويمرضون ويتعبون لمخالفة الوصية. إذن كأن الرب يريد أن يجعل الراحة عيداً، فعلاً ربنا عايز الناس يستريحوا.

+ وراحة يوم السبت كانت رمز للراحة بتاعت يوم الحد اللى ربنا استراح فيها من خلاص الإنسان ومن نتائج خطية الإنسان. خطية الإنسان نتيجتها موت، فربنا قضى على هذا الموت بالقيامة فى يوم الأحد … فأصبحت راحة. فربنا يريد أن يجعل للإنسان راحة على أن تكون راحة الرب لذلك سُمى يوم الرب.

+ يوم السبت يومز للأحد ويوم الأحد يرمز للسبت الكبير … للأبدية التى فيها راحة دائمة لا تعب فيها، الراحة بتاعت يوم السبت أو يوم الأحد هى راحة جزئية، يعنى يوم واحد فى الأسبوع تستريح فيه. لكن الراحة الأبدية فى السبت الكبير فى الأبد حيث تكون راحة دائمة.

+ لذلك لما الناس بيغادروا هذا العالم بيقول الكتاب: يستريحون من متاعبهم وأعمالهم تتبعهم. يقولون فلان تنيّح يعنى استريّح.. راحة، لكن الناس اللى بيكرهوا الراحة … زى ما بيكرهوا الراحة فى يوم الرب، بيكرهوا الراحة اللى فى الموت برضه. وفيه ناس ما يحبوش الكلام عن الأبدية … يضايقهم، مع انـها راحة … دا أول عيد يرمز للراحة (الأعياد ورموزها 21/08/1981).

ممكن تصوم وإنت فى لندن

س: … يعنى صيام العذراء من 7 أغسطس إلى 22 أغسطس هو مشغول وبيقول إنه مسافر خارج البلاد ورايح لندن فى الفترة دى تقريباً، وممكن يبقى يصومهم فترة ثانية ؟

ج: دا الصوم ما تبانش أهميته ولذّته غير لما تصومه وفيه متاعب وفيه عوائق. وهو يوجد ما يمنع الصيام فى لندن ؟! أمّال الأقباط اللى عايشين هناك وكنيستنا اللى هناك ما بيصوموش خالص ؟! إذا كنت إنت مجرد سفر مش قادر تصوم أمّال اللى عايشيين هناك على طول دول يعملوا إيه ؟! والقسوس بتوعنا هناك اللى فى لندن يبقى ربنا يعوض علينا فيهم ولا إيه ؟! اللى قاعدين على طول هناك. يا إبنى ممكن تصوم وإنت فى لندن وممكن إنك إنت تصوم وإنت فى المانيا وممكن تصوم فى كل مكان. أنا أفتكر لما سافرت إلى لندن فى فبراير سنة 69 كان أثناء الصوم الكبير وصوم يونان وكنا صايمين. ما هنا عندنا الأنبا رويس بيشتغل فى لندن ما كانش بيصوم هو الآخر ولا إيه ؟! الكلام دا مش معقول. دا كان حاجة غريبة لما أنا قضيت مدة هناك شوية ويصادف كان أيام صوم يونان الناس لقونى يوم الأحد فاطر ويوم الأثنين صايم والثلاثاء صايم والأربعاء صايم، والخميس فاطر والجمعة صايم والسبت فاطر كان صيام يونان فى الثلاثة أيام الأولى والأحد فطار وبعد شوية لقوا أسبوع مر كدا وبعدين الثلاثاء فاطر والأربعاء صايم والخميس فاطر والجمعة صايم والسبت فاطر قالوا لى إيه الحكاية بتاعتكم ؟! لغاية ما قعّدت أشرح لهم يعنى إيه يونان ويعنى إيه الصيام الكبير ويعنى إيه الأربعاء والجمعة لغاية لما فهموها، لكن ممكن الواحد يصوم هناك. دا إنت لو أكلت بس خضار وفاكهة ها تبقى كويس جداً على الأقل ها تخف شوية الدهون الزايدة المتراكمة فوق جسمك وبتتعب قلبك … إلى آخره، وتبقى نشيط وكويس لو أكلت خضار وفاكهة. لو أكلت حاجات من المكسرات ودى رخيصة قوى هناك دى تدّي لك calories  ضخمة وطاقة ضخمة وتبقى إنسان تمام … ورخيصة. دا إنت لو عشت على التفاح وهناك سعره سعر الطماطم بالظبط وساعات الطماطم بتبقى أغلى ها تقدر تقضى فترة كويسة. لكن مش معناها إنك إنت تروح بلد غريبة تقوم تنسى عقيدتك. طب افرض إنك إنت أتعينت موظف ثابت فى بلد غريبة يبقى تبطّل صوم على طول. أنا عايزك تصوم العذراء زى ما هو فى أثناء فترة وجودك فى انجلترا وليس لك عذر أبداً. إذا وجدت نية ممكن إنك إنت تنفّذ. دا حتى فى الطيارة تقدر تطلب غذاء نباتى ويجيبوا لك غذاء نباتى. لما بيوزعوا الأكل، قبلها بس تقول لهم vegetarian  مش ضرورى تقول لهم صيام وتقول لهم أقباط وتدّي لهم محاضرة فى اللاهوت، لا. تقول لهم إنك إنت شخص  vegetarian يعنى نباتى يجيبوا لك نباتى لأن فيه هنود نباتيين وهمّا مش مسيحيين ومش أقباط. وفيه بوذيين نباتيين وفيه ناس كثير بيركبوا الطيارة نباتيين. أنا نفسى أقول لك أيها الأخ تصوم يعنى تصوم. اللى بيقولوا أسبوع زيادة فى الأول ولا فى الآخر أنا أقترح يكون فى الأول إذا كنتوا عايزين تصوموا علشان فى العيد نعيد كلنا مع بعض، مش تبقى الكنيسة كلها معيّدة وإنت الوحيد اللى صايم وتقول لهم لا أصلى عندى أسبوع، لا. وتكشف نفسك، ممكن إنك إنت عايز تصوم أسبوع زيادة تخلّى الأسبوع فى الأول وتفطر مع بقية الناس وتعيّد مع باقى الناس ويبقى ماشى مع الكنيسة بروح واحدة (حياة الإنتصار 17/07/1985).

ندر صيام العذراء بالماء والملح

س: سؤال فى صيام العدرا هل يصح الصيام بالماء والملح عند الندر بالرغم من إن بعض القسس ينفون هذا النوع من الصيام على أعتبار إن جميع الخضراوات بـها زيت ؟       

ج: طبعاً الخضراوات بـها زيت، والدقة ما فيها زيت فى السمسم لكن المعروف حينما يندر إنسان بميه وملح اللى فى ضميرة مش اللى فى معمل التحليل اللى فى إيه … اللى فى ضميره، فى ضميره إنه بيندر ما بياخدش زيت صافى. يعنى ياكل فول مثلاً ما يحطش عليه زيت حتى لو كان نبات الفول فيه زيت دى ما لناش دخل بيها. لكن دايماً الصيام والندر حسب ضمير الإنسان … حسب إيه … ضمير الإنسان وليس حسب معمل التحليل، لازم تكونوا فاهمين دى كويس. فاللى بيندر ميه وملح بيندر إنه ياكل أى حاجة بس ما بيستعملش حاجات فيها زيت صرف. يعنى ما يحطش زيت على فول مثلاً، أو ما يحطش زيت على طبيخ أو ما ياكلش طعمية مقلية بزيت أو بتنجان مقلى بزيت، بطاطس محمّرة بزيت يعنى الحاجة اللى فيها زيت صرف واخدين بالكم.

لكن كون إن داخل فى التحليل … الآباء دول اللى قالوا الكلام دا بيعقدوا على الناس الصيام. والظاهر هما ما بيحبوش الصيام. وأنا أحب إن الآباء الكهنة يريحوا الناس ما يعقدوش الناس … يريحوا الناس ما يعقدوش الناس. اللى ييجى يقول له إيه يعنى تصوم بالميه والملح دى كل حاجة فيها زيت يعنى عايزه ياكل إيه يعنى ؟ يقول له كل الخضروات فيها زيت عايزه ياكل إيه أمّال ؟!  وهو نادر كدا. ولا ميه وملح يعنى يدوب الملح فى الميه ويشربه ؟!

معروف كلمة ميه وملح يعنى أكل خالى من الزيت الصافى يعنى مافيش Pure Oil  أو Pure Fat  اللى هيا بتكوّن الزيت. لكن كون إنه المواد فيها زيت هو فى ضميره ما قالش الكلام دا لما ندر. وكل واحد بيندر حسب ضميره والله هو فاحص القلوب وعارف كل واحد قلبه فيه إيه (البابا شنوده الثالث. محاضرة: الطريق الوسطى 03/08/1988).

شريكة أنت فى الفداء

س: واحد بيقول سمعنا من أحد الكورالات المشتركة بمهرجان عيد جلوس قداستكم فى ترنيمة قدمها الكورال بيقول أحد أبياتـها مناشداً السيدة العذراء شريكة أنتِ فى الفداء. هل العذراء شريكة فى الفداء ؟

ج: طبعاً لأ. التعبير دا تعبير مش أرثوذكسى أنا عارف جاى منين لكن أرجو من الناس بتوع الكورال يصلّحوا دى. الفداء قام به المسيح وحده فقط لا غير. أما كون إن العذراء دا إبنها الوحيد وتألمت لأجله دى مش مشكلة. لكن هى أشتركت فى الفداء … لأ. أو مثلاً يقولوا أشتركت فى الفداء علشان هى اللى أنجبت المسيح. يبقى هل كل أم أنجبت واحد تشترك فى كل أعماله ؟! التعبير مش دقيق ياريت أخواننا اللى بيشتركوا فى الإحتفالات إن وجد حاجات زى كدا يصلّحوها فى الأول أو تراجع الأناشيد بتاعت الكورالات قبل أن ينشدوها (شخصية ملكى صادق 05/12/1990).

الصورة الطقسية للسيدة العذراء ويوسف النجار

كتير منكم بيجيبوا لى صور علشان أمضى عليها وتكون الصور مش طقسية أو صور مش روحية أو صور غلط. يعنى من أمثلة هذه الصور الصور اللى بييجى فيها يوسف النجّار صغيّر فى السن ساعات بيجيبوا لى الصور أرجعها لهم وأقول لهم خدوه لما يكبر أبقوا هاتوه لى … هوّ يوسف النجّار كان عجوز وكبير فى السن لما خطب السيده العذراء … كان عجوز وكبير فى السن. حكاية يوسف صغيّر كدا وشاب صغيّر ديا الحاجة اللى جاء منها فكرة البروتستانت إن أتجوز العدرا وخلّف عيال … إلى آخر القصة. لكن يوسف النجّار كما يقول تاريخ الكنيسة إنه كان كبير فى السن جداً كان راجل أشيب يعنى. وخطب العذراء لكى يحفظها لا لكى يتزوجها. نقطة تانى بعض الصور اللى ساعات بتيجى أهو أى واحد تعجبه صورة بياخدها وبيجيبها ياريت تدققّوا فى الصور.

بالمناسبة دى عايز أقول لكم هناك فارق بين نوعين من الصور. صورة تقتنيها فى بيتك وصورة طقسية تتوضع فى الكنيسة. الصورة دى مثلاً صورة العذراء وعبارة عن بنت عادية حتى ما فيش هالة حول رأسها مما يدل على إنـها صورة بروتستانتية 100 %، ويجيبوها علشان أنا أمضى عليها. ما فيش أى هالة حوالين العذراء. إيه الفرق بينها وبين أى بنت ؟ أى بنت فى الدنيا يعنى ؟ مين عارف دى كان اسمها إيه دى صاحبة الصورة دى ؟ أى صورة لقديس من القديسين بدون هالة أعرفوا إنـها صورة غير أرثوذكيسة وما نقدرش نمضى عليها. الصورة ديا صورة كويسه للسيدة العذراء. العذراء الحزينة، العذراء الباكية وعليها هالة وممكن صورة كويسه تحطّها فى بيتكم ما فيش مانع، ولذلك ممكن نمضى عليها.

ها أقول لكم ما هى الصورة الطقسية اللى ممكن نحتفظ بيها فى الكنيسة. صورة العذراء الطقسية التى نحتفظ بيها فى الكنيسة لها 5 علامات ها أقول لكم عليها:

العلامة الأولى: إن العذراء تحمل المسيح فالعذراء لوحدها ليست هى الطقس اللى إحنا نحبه فى الكنيسة. إحنا بنقدس العذراء كوالدة الإله فلازم تكون تحمل المسيح على كتفها. فأى صورة للعذراء لا تحمل المسيح ما نقدرش نحطها فى الكنيسة. صورة للتأمل تحطها فى بيتكم لكن فى الكنيسة لأ. دى أول علامة.

تانى علامة: تحمل المسيح هى تكون على يمين المسيح. لأن الآية بتقول قامت الملكة عن يمينك أيها الملك. فتبقى عن يمين المسيح.

تالت حاجة: ما دام ملكة يلبّسوها تاج، علشان تبقى ملكة.

رابع حاجة: حواليها الهالة.

خامس علامة: إن العذراء ما دمنا نسميها السماء الثانية بتكون الصورة فيها شويه نجوم أو شويه ملايكة.

الصورة اللى ها أوريها لكم هى صورة Typical للخمس علامات دول.

العذراء مع المسيح آدى واحد. على يمين المسيح آدى أتنين. عليها تاج آدى تلاتة. حوالين راسها هالة آدى أربعة. حواليها الملايكة والملايكة فوق سحاب يدل على السماء آدى خمس علامات. دى صورة طقسية 100 %. واضح الكلام (لا تطفئوا الروح 27/11/1985).

حمل السيدة العذراء

س: هل السيدة العذراء حملت بالسيد المسيح 9 أشهر ؟

ج: أيوة بالضبط، 9 باليوم. علشان كدا إحنا بنعيّد عيد الميلاد في 29 كهيك وبنعيّد عيد البشارة في 29 برمهات. ما بين 29 كيهك و 29 برمهات 9 أشهر باليوم (المسيح وتعامله مع الشيطان ج2 15/03/1995).

الحامل وصيام العذراء

س: زوجتي حامل في شهرها السادس وتصر علي صيام العذراء ؟

ج: أهو صيام العذراء انتهي ونشكر ربنا، لما زوجتك وهي حُبلي تصوم صيام العذراء الواد يطلع واد متدين … يورث الصوم عن أمه … صدقوني لو إن إحنا جبنا أعذار علشان ما نصومش بيها ما أكثر الأعذار. فلانة دي حُبلي، فلان دا كبير في السن، وفلان دا صغيّر، وفلان دا بيشتغل شغل تقيل، ما هو اللي حدث إن في الكنيسة الكاثوليكية فيه حاجات بيسموها التسامحات أو التفسيحات فضلوا يسامحوا في الصيامات لغاية دلوقتي ما بقاش فيه صيام خالص. حتى الإستعداد للمناولة بقت ساعة واحدة يعني لو قام من النوم كل له أكلة، علي بال ما يلبس هدومه ويروح الكنيسة ويصلّي القداس يكون خلصت الساعة ويبقي فاطر علشان مساكين يا عيني في عصر التكنولوجيا ما بيقدروش يصوموا. تسامحنا هذا ها يخلّي الناس عمرهم ما يصوموا. لكن ممكن الزوجة دي تصوم صيام العدرا وبعدين بقي في فطار العدرا، مش إنت بتقول 6 أشهر ينتظرها 3 أشهر علي طول ما فيهمش ولا صيام غير الأربعاء والجمعة. أكبر فترة فطار في السنة من فطار العدرا 22 أغسطس لصوم الميلاد في 25 نوفمبر 95 يوم ما فيهمش أصوام كبيرة، ما عدا الأربعاء والجمعة طبعاً، بأقول ما فيهمش صيام كبير. فعوضها بقي بالبروتين واللبن والجبنة وخلّي الواد يتغذي ويتعزي (الغضب 27/08/1986).

بطاقة شخصية باسم السيدة العذراء … خرافات

س: ناس بيسألوا على بطاقة شخصية باسم السيدة العذراء وبيجيبوا لها قصة طويلة ؟   

ج:  طبعاً الكلام دا كلام خرافات لا أكثر ولا أقل، كلام خرافات. وعايزكوا أنتو تكونوا أكبر من كدا.

أولاً البطاقة الشخصية الموجودة ديا شكل البطاقة الشخصية اللى موجودة فى أيامنا بالظبط، يعنى واخدين واحدة وعاملين زيها، حتى نفس حكاية الرقم ومركز البوليس بالظبط تمام والحاجات دى ما كانتش موجودة أيام العذراء. كمان هل كانت الصيغة الموجودة دى أيام العذراء يعنى أيام ما ولدت ما كانش فيه حاجات زى دى، والكلام اللى فيها باين إنه كلام تأليف وحاطين لها كمان بصمة صباع مش معقول العذرا بصموها فى الـ … مش معقول. دا كمان  مش مكتوب فصيلة الدم والحاجات دى … ما تصدقوش الكلام دا.كل ما الناس يلخبطوا فى حاجات من النوع دا قم المعجزات الحقيقية التى للسيدة العذراء تتوه وسط الخرافات اللى من هذا النوع (البابا شنوده الثالث. محاضرة الناموس ونعمة الله العاملة 18/03/1977).  

خطايا كبار السن

س: واحد بيقول أرجو الجواب على هذا السؤال الذى يتعب نفسى كثيراً بيقول يعنى ملخص السؤال إن كل ما يقول لأبوه اعترف يقول له يا ابنى هو أنا شاب زيك بغلط ؟

ج: هو يعنى ما فيش الخطايا غير الخطايا الشبابية بس ؟! جايز أبوه بيتنرفز، جايز بيغضب، جايز بيشتم … ممكن. والكتاب بيقول من قال لأخيه يا أحمق يكون مستحق نار جهنم، يعنى هو بس لازم يخطئ خطايا الشباب فيه خطايا أخرى. قل له الكتاب بيقول من يغضب على أخيه باطلاً يكون قاتل نفس هو لازم يعنى يكون قتل بصحيح يعنى أرتكب جريمة. على أية الحالات إنت أديت واجبك وسيب الباقى، جايز أبوك الحكاية دى تضرب فى مخه بعدين لكن لو تلح عليه باستمرار باستمرار ها يزهق منك وجايز يعنى يديك قلمين ولا حاجة … فإنت قولت له واسكت. وإنت قلت له وإيه … واسكت. أول ما تلاقيه فى يوم شتم شتيمة قول له آه يا بابا دى اللى عايزك تعترف عليها ما يقدرش يقول لك أنا ما بخطيش مثلك قول له أهو (البابا شنوده الثالث. محاضرة واجب الأسرة فى الصيف 10/08/1988).   

أصبحت يتيماً

لقد مات أبي الروحي القمص أثناسيوس السرياني … ثم بعد ذلك أمي في خلال شهر واحد فقط. ولقد أصبحت يتيماً بالحقيقة ومحتاج لصلوات ؟

+ ربنا يعزيك يا حبيبي. افتكر الآية اللي بتقول أبي وأمي قد تركاني والرب يضمني. طبعاً أبونا أثناسيوس السرياني كتير قوي كانوا بيعترفوا عليه وأصبحت نياحته مشكلة أيضاً لأديرة الراهبات … فين لما لقينا واحد يصلح يكون أب اعتراف للراهبات. ربنا ينيح نفسه. وإنت شوف لك أب اعتراف. ويعني ما فيش حد أبوه وأمه ما بيتوفوش. الكل، كل الناس آبائهم وأمهاتـهم بيتوفوا (مذاقة الملكوت 15/10/1997).

الأستاذ حبيب جرجس والتعليم الدينى فى المدارس

يعتبر المنشئ الحقيقى للأكليريكية والمنشئ الحقيقى للتربية الكنسية لمدارس الأحد. ولم يكتفى حبيب جرجس بكدا … حبيب جرجس  قال لازم نخش التعليم فى المدارس. أبتدى يتفاهم مع وزارة المعارف … ما كانش فيه تعليم فى المدارس. دا بقى الدين مادة رسمية من أول ما جه محمد نجيب. قبل كدا ما كانش فيه الدين مادة رسمية. فقال طب ولو نعلّم العيال، ولو فى حصص إضافية. طب نجيب مدرسين منين ؟ نعد مدرسين ولو يكونوا متطوعين وما فيش مالية … زى بعضه متطوعين … بقى يعد المدرسين، بقى يشجّع المدرسين إنـهم يدرّسوا الدين، بقى يعمل لهم المناهج الدينية فألّف 3 كتب باسم الخلاصة الإيمانية. وألّف بعدين لما التعليم أنتشر تانى … ألّف كتاب اسمه مبادئ العقيدة الأرثوذكسية 8 كتب 4 لإبتدائى و4 لثانوى … ابتدأ يألّف كتب. قصص الكتاب المقدس طلّع لها 3 كتب اسمه: الكنز الأنفس فى تاريخ الكتاب المقدس. ابتدأ يشتغل بتأليف كتب لتعليم الدين … ما هو المدرسين يقولوا ها نعلّم دين إيه ما أحنا ما نعرفش !! يقول لهم ها أعمل لكم كتب. والكتب يحطها وكتب لطيفة، وكل درس ليه صورته والدرس والإستنتاجات والمعانى الروحية اللى تخرج منه … وكلّه. يعنى المدرس ياخده زى بيضة مقشّرة ومستوية، وياخدها على الجاهز كدا. فبدأ يخش فى التعليم الدينى فى المدارس ويضع له المناهج ويؤلف له الكتب. دا سنة 1909 كان كتب الكتب بتاعته بتاعت الخلاصة الإيمانية، سنه 1913 كانت الطبعة الخامسة أتعملت. كل سنة يعمل طبعة جديدة. وتـهافت المدرسين والطلبة على كتبه لأن هو اللى بقى يعلّمهم الدين. فبقى ماسك الكلية الأكليريكية وماسك مدارس الأحد وماسك التعليم الدينى فى المدارس وماسك وضع المناهج ووضع الدروس وتأليف الكتب وإحضار الصور وعمل كل دا (كلمة عن الأستاذ حبيب جرجس 22/08/1990).

المسيحية لكل العصور

س: واحد بيقول هل تصلح الأشياء التى نتكلم عنها فى الحياة المسيحية مثل التواضع والمحبة فى عصرنا الحالى ؟    

ج: طبعاً المسيحية لكل عصر. ووصايا الله لكل عصر. ومفروض كل عصر يكون فيه محبة ويكون فيه تواضع. بس علشان تقدر تسلك فيهم ينبغى أنك تضيف ليهم الحكمة والإفراز فيكون تواضع بحكمة ومحبة بحكمة. فإذا تعب الإنسان بيكون تعبان من قلة الحكمة مش تعبان إن التواضع ما يصلحش لأيامنا أو إن المحبة ما تصلحش لأيامنا.

دا الكتاب بيقول الله محبة من يثيت فى المحبة يثبت فى الله والله فيه فى (يوحنا الأولى إصحاح 4) ، فإزاى إنسان يكون بعيد عن المحبة ويقول ما تصلحش لأيامنا أمال تصلح لمين ؟! وكذلك التواضع. التواضع صفة من صفات الله. أكاد أقول إن المتواضع الحقيقى الوحيد هو ربنا، لأن الإنسان دا ها يتواضع يروح فين دا شوية تراب ورماد ينزل شوية ينزل يروح فين عن التراب والرماد، وقبل ما يبقى تراب ورماد كان عدم ها ينزل شوية فين عن العدم ؟! المتواضع هو كبير بينزل والوحيد الكبير اللى بينزل هو ربنا نزل إلى مستوانا لكى يرفعنا إلى مستوى أعلى وأخذ صورتنا لكى يعطينا صورته (البابا شنوده الثالث. محاضرة صورة الله 06/08/1986).

الجهاد القانونى

س: واحد بيقول ما تفسير الآية التى تقول: لا أحد يكلل إن لم يجاهد قانونياً يعنى إيه الجهاد القانونى ؟  (2تى2: 5)                  

ج: يقصد يجاهد قانونياً يعنى يجاهد جهاد يتفق مع وصايا الله ومع شريعته، لأن القانون هو الناموس (نوموس) يعنى قانون أو شريعة. فيجاهد قانونياً يعنى يجاهد حسب الوصايا التى أوصى بـها ربنا (البابا شنوده الثالث. محاضرة: الطريق الوسطى 03/08/1988).

رقم 8 يرمز إلى بداية جديدة

الرقم 8 يرمز لإيه ؟ لما نيجى أسبوع والـ 7 أيام ينتهوا ويبتدى اليوم التامن يبقى اليوم التامن بداية أسبوع جديد، فأصبح الرقم 8 يرمز إلى بداية جديدة، يرمز إلى بداية إيه ؟.. جديدة

+ لما نيجى للقيامة إنسان مات وخلصت حياته الأولى، يبقى القيامة رمز لحياة جديدة، علشان كدا كان يرمز ليها الرقم 8. المسيح قام فى اليوم الثامن، الـ 7 أيام خلصوا السبت وأبتدى فى اليوم التامن اللى هو أول الأسبوع الجديد.

+ ونلاحظ أن حوادث القيامة اللى هى بداية حياة جديدة، طبعاً المسيح أقام كثيرين لكن لم يذكر فى الكتاب المقدس إلا 8 حوادث إقامة أموات. 3 أقامهم المسيح أبنه ياييرس، ابن أرمله نايين، لعازر آدى 3. واحد أقامه بولس الرسول اللى هو أفتيخوس، وواحدة أقامها بطرس اللى هى طابيسة. يبقى آدى 5 فى العهد الجديد و3 فى العهد القديم. واحد أقامه إيليا ابن أرملة صرفة صيدا، وواحد أقامه أليشع ابن المرأة الشونمية وواحد قام بملامسة عظام أليشع … يعنى 8. لأن الـ 8 ترمز للقيامة لأن القيامة ديا بداية حياة جديدة.

+  المعمودية بداية حياة جديدة: وبرضه موت مع المسيح وقيامة معه، زى ما جه فى رو:6. المعمودية كان يرمز لها الختان فى العهد القديم، والختان كان فى اليوم الثامن. بيختن الطفل فى اليوم الثامن، يعنى اليوم الثامن بداية حياة جديدة، بداية عهد مع الله فى هذا اليوم.

+ لما العالم فسد وربنا أبتدى يأخذ شعباً جديداً من ابينا ابراهيم، نلاحظ أن أبينا أبراهيم كان له ثمانية أولاد … أوعوا تتعبوا من الكلام دا ها أجيبهم لكم كان له إيه ثمانية أولاد. 6 من قطورة فى تكوين أصحاح 25. وواحد من هاجر والتامن اللى هو ابن الموعد اللى بدأت به حياة جديدة وعهد جديد مع الله كان من مستودع ممات وكأنه دخل برضه فى القيامة هو الآخر. لأن مستودع سارة كان ميت، قالت كيف يكون لى تنعم وسيدى قد شاخ. هى كانت خلاص ما اصبحش ليها عادة كالنساء … يعنى مستودعها مات. الـ 8 دول ها أجيبهم لكم كدا. 8 أولاد يمكن بعضكم كدا الحكاية كانت غريبة بالنسبة له. شوفوا تكوين 25. يقول: وعاد ابراهيم فأخذ زوجة اسمها قطورة فولدت له … عدّوا معايا فولدت له زمران، ويقشان، ومدان ومديان، ويشباق وشوحاً واسماعيل 7 واسحق 8.

+ لما العالم هلك بالطوفان وأراد الرب أن يبدأ حياة جديدة مع العالم، بدأها فى الفلك بـ 8 أنفار رمز للحياة الجديدة زى ما قال معلمنا بطرس. فى الفلك خلصت ثمان أنفس بالماء. نوح وعياله التلاتة يبقوا أربعة وزوجة كل واحد من الأربعة يبقوا كام … 8. بل معلمنا بطرس غير الـ 8 دول يقول حاجة لطيفة خالص فى بطرس التانية 2: 5. شوفوا يقول إيه … يقول أن الله لم يُشفق على العالم القديم بل إنما حفظ نوحاً ثامناً كارزاً بالبر. نوح كان الثامن من آدم. يعنى لما تعدّوا الآباء من أول آدم تلاقوا نوح كان نمرة 8. تلاقوا الآباء من آدم موجودين فى تكوين أصحاح 5. كل واحد مذكور كدا. فنوح كان الثامن من آدم وفى نفس الوقت كان خلص ضمن تمان أنفس بالماء فى الفلك رمز للحياة الجديدة.

+ المسيح قيل عليه أنه ابن ابراهيم ابن داود. طب نشوف داود كان إيه.. لما جه صموئيل النبى وعبّروا أمامه أولاد يسي البيتلحمى عبّروا أمامه الـ 7 أولاد … أولاد يسي. الـ7 كلهم ما نفعوش … قال له ما فيش حد تانى ؟ قال له بقى التامن دا هو. بقى بعد الصغير، بـهذا التامن بدأت حياة جديدة وخلاص جديد وأتى من نسله السيد المسيح.

+ لما ربنا كوّن كهنوت فى أيام موسى النبى وجاب هارون رئيس للكهنه هذا الكهنوت الجديد بدأ فى اليوم الثامن. فى سفر اللاويين اصحاح 9 يقول وفى اليوم الثامن دعا موسى هارون وبنيه وشيوخ اسرائيل وقال لهارون خذ لك عجلاً ابن بقر ذبيحة خطية أعمل كذا كذا كذا وبدأ كهنوته فى اليوم الثامن. وهكذا فى تقديم البكور كان يقول يتولد العجل من أمه يرضع 7 أيام وفى اليوم التامن ممكن تقدمه لىّ فى خروج 22: 30.

+ فى الإيمان الجديد نجد أن الشك فى قيامة السيد المسيح الذى أنتشر مع مريم المجدلية وقالت يا سيد أن كنت قد أخذته فقل لى أين وضعته. واللى أنتشر حتى وسط الأحد عشر ولم يصدقوا لا تلميذى عمواس ولا المجدلية ولا النسوة. زال هذا الشك فى اليوم الثامن عندما ظهر الرب لتوما وقال له مد صوابعك وجس ولا تكن بعد غير مؤمنٍ بل مؤمنٍ. وهكذا بدأت حياة جديدة.

+ نيجى بقى على تأسيس الكنيسة، كيف أُسست الكنيسة وتأسيس الكنيسة دا بدأ تاريخ جديد. ترتبط بيه بالرقم 8 ؟ قوى ترتبط بالرقم 8  تمام. لأن مرّت 7 أسابيع 7×7 بـ 49 وفى أول الأسبوع التامن بدأت الكنيسة، فى أول الأسبوع الإيه … التامن. وهذا هو الكلام اللى ربنا قاله على عيد الخمسين فى لاويين 23: قال ثم  تحسبون لكم من غداً السبت من يوم أتيانكم بحزمة الترديد 7 أسابيع تكون كاملة إلى غد الأسبوع السابع تحسبون 50 يوماً ثم تقربون تقدمة جديدة عيد الخمسين. وكان عيد الخمسين دا من الأعياد المشهورة فى العهد القديم وكان هو فى بداية الأسبوع الثامن. 7 أسابيع تمر ودا بداية الأسبوع الإيه … الثامن. وهكذا وجدنا أن أول عيد كان عيد اليوبيل الذى يحتفلون به ويطلقوا العبيد ويعملوا هيصة كان فى السنة الخمسين. تمر 7 أسابيع سنين يبقوا 49 سنة وفى أول الـ 7 الثامنة كان اليوبيل.

+ فيه كلمة لطيفة ممكن نقولها على الرقم 8 فى السكه كدا مش عارف ها تفهموها ولا لأ ؟ لكن يعنى كلمة لطيفة. ربنا فى 6 أيام خلق الخليقة كلها وأستراح فى اليوم الـ7، واخدين بالكم معايا، خلق الخليقة كلها فى إيه ؟  فى 6 أيام واستراح فى اليوم السابع. اليوم السابع دا ما أنتهاش خالص. يعنى كل يوم يقول وكان مساء وكان صباح يوماً واحداً، يوماً ثانياً، يوماً سادساً. لكن اليوم السابع ما أنتهاش، مازلنا نعيش حالياً فى اليوم السابع. ما زلنا نعيش حالياً إيه … فى اليوم السابع. طب أمتى ينتهى اليوم السابع ؟ ينتهى بالقيامة بيقول السماء والأرض تزولان وينتهى اليوم السابع، ويبدأ اليوم الثامن بحياة جديدة فى السما يرمز إلى بدأ جديد من غير الأرض دى برضه فى اليوم الثامن.

+ إذا مسكنا بقى فى فلسفة الأرقام ورموزها، طبعاً فيه حاجات كتيرة مش فاضى أقولها دلوقتى علشان ما نضيّعش الوقت. نقول الـ 8 اللى هى بداية جديدة لو أعتبرناها حياة فى الثالوث القدوس، أحنا فى الثالوث يبقى 8×3 بـ 24 تلاقى الحياة الجديدة ماشيه بالـ 24. التلاميذ الأثنى عشر مع أسباط اسرائيل الأثنى عشر 24. فى سفر الرؤيا يقول أبصرت 24 كاهناً لهم 24 تاج من ذهب و24 مجمرة من ذهب فى أيديهم آدى الـ 24 اللى هى ماشية فى الكهنوت السماوى. نتتبع 24 ها تلاقوا منها كتير خالص. نكتفى بالرقم 8 (الكتاب المقدس والعلاقة به، الرموز: الماء، الرقم 8، 3، 6، 5. 18، 25/09 ـ 02/10/1990).