س:واحد بيقول رجاء محبة الرد على السؤال، كل شئ فى الوجود مخلوق من والدين، فهل أبونا آدم له أب أم لأ ؟

ج: شوف إيه.. السؤال بتاعك فيه غلطة، إيه الغلطة اللى فى السؤال دا، بتقول كل شئ فى الوجود مخلوق من والدين.. اللى من والدين يبقى مولود أما مخلوق.. كلمة مخلوق يعنى من العدم، فآدم لا ليه أب ولا ليه أم لأنه مش مولود. فيه فرق بين مولود ومخلوق هو مش مولود وحواء مش مولودة.. أُخذت من ضلع من آدم.

علشان كدا عايز أقول لك على حكاية تنفعك فى ملكوت السموات إن شاء الله .لما تروح الملكوت بعد عمر طويل جداً وتتقابل مع القديسين تلاقى آدم وحواء هما الأتنين ما لهمش سرة فى بطنهم. يعنى كل واحد له سرة فى بطنه لأن السرة دى مطرح الحبل السُرّى اللى كان بيربط الجنين بأمه.. فلو لقيت أتنين من غير سرة تقول له أهلاً جدى آدم.. أهلاً تيته حواء.. بس مش كل واحد فى السما تشوفه تقعد تبص تشوف ليه سرة ولا..

كمان فيه ساعات تلاقوا صورة غلط للملاك ميخائيل وحاطين له سرة، الملاك ميخائيل ما أتولدش من أم !! فيبقى الصورة دى غلط. الصور زمان كانوا بيجيبوه لابس ملابس مغطية جسمه كرئيس جند الرب، كجندى كبير لكن ما أعرفش إزاى الصور دى بيعملوها كدا. طبعاً الصورة دى غلط (بـهتوا من تعليمه 14/06/2000).