هل خُلقت المرأة على صورة الله ؟

س: هل خُلقت المرأة على صورة الله ؟

ج: نعم خُلقت على صورة الله، لأن بيقول ربنا خلقهما على صورته ذكراً وأنثى. ولما المرأة تُخلق على صورة الله ليس معناها إنـها خُلقت على صورته فى الجسد لكن خُلقت على صورته فى البر، فى التقوى. خُلقت على صورته أنـها ذات عاقلة حية كما إن الله ذات عاقلة حية. خُلقت على صورته فى الروح الخالدة والله خالد أبدى. وخُلقت على صورته فى البساطة فى الطهارة فى النقاوة. ولما نقرا سفر التكوين الإصحاح الأول نلاقى نفس الكلام. شوفوا بيقول إيه فخلق الله الإنسان على صورته – الإنسان جملة يعنى – خلق الله الإنسان على صورته على صورة الله خلقه ذكراً وأنثى خلقه. فأمنا حواء على صورة الله وأبونا آدم على صورة الله ما فيش هنا تمايز عنصرى بين الراجل والمرأة الإنسان كله كإنسان خُلق على صورة الله (سنوات مع أسئله الناس ج3 12/02 – 25/03/1992).

خلق حواء بعد آدم

س: ما الحكمة فى إن ربنا خلق حواء بعد آدم وليه ما خلقهمش مع بعض مرة واحدة ؟

ج: لو خلقهم همّا الأتنين مع بعض مرة واحدة ها يكونوا غرباء عن بعض. لكن لما تتخلق حواء من جنب آدم ما تبقاش غريبة عليه. علشان كدا قال دى لحم من لحمى وعظم من عظامى. فأصبح فيه محبة بين الأتنين لأن حواء جزء من آدم. ومش ممكن أبداً تبقى جزء منه غير لما هو يتخلق فى الأول وتتاخد حته منه تبقى حواء. فلما آدم يقول لحواء إنت حته منّى دى تبقى حاجة كويسه.. أنتوا ها تعدّلوا على ربنا لكن يعنى دى حاجة.

تانى حاجة: الخليقة كلها بتبقى ليها أصل واحد. لكن لما آدم يتخلق لوحده وحواء لوحدها يبقى ليهم أصلين مش أصل واحد، كون إن أصل واحد دا كويس. على كلٍ كويس اللى خلقها أحسن ما يخلقهاش خالص (مفهوم الوداعة 28/07/1993).

أعتراض الأم على رهبنة ابنها

س: واحدة بتقول إبنى يريد الرهبنة وأنا رافضة بشدة، وقد خيّرنى بين الهجرة والرهبنة فأخترت أنا الهجرة ولكنه أختار الرهبنة. فماذا أفعل يا سيدنا ؟

ج: ما تتدخّليش فى شئون إبنك غصب عنه. إبنك دا مش لعبة فى إيدك تمشيه بالريموت كونترول توديه الرهبنة توديه الهجرة ؟ عيب الحاجات دى. خلّى إبنك يحبك. ما تخليش إبنك يشعر إنك إنتِ واقفة فى طريق حياته وبتتصرّفى فيها غصب عنه. وكون إنك إنتِ تقولى رضيت له بالهجرة يعنى مستغنية عن وجوده معاكى. ها يروح بلاد تانية بينك وبينها بحار ومحيطات وساعات طويلة فى الطيارة. يعنى إنت لو تحبى إبنك وتحبى تشوفيه ما الأديرة بينك وبينها ساعة.. ساعة ونص تكونى شفتيه. أما حكاية أختار الرهبنة وما يختارهاش دى شغلانة أب إعترافه مش شغلانتك إنتِ. أكمنك أمه قم تتحكمى فيه بالشكل دا ؟ هل إنتِ فى حياتك الزوجية أتحكّمت أمك فيها وقالت لك تتجوزى دا أو لأ، وتتجوزى أو ما تتجوزيش ؟ بلاش اسلوب التحكّم اللى يتعب الناس. الأمومة معناها الحنان والحب مش الأمومة معناها التحكم والسيطرة. أنا مش بقول إن إبنك يهاجر أو يروح الرهبنة، بقول دى شغلة أب إعترافه ويحلها بينه وبينه لكن إنتِ ما تتحكميش بـهذا الشكل (مثل الزارع 28/10/1998).

س: واحدة بتقول أن فتاة فى سن 26 عام ومخطوبة ودائماً يتهمنى جميع من حولى إنى أتصف بالأنانية، لكنى لم أشعر بذالك ـ دا من أنانيتك برضه ـ لكن من كثرة تكرار هذا الإتـهام شعرت إنى بدأت فى ممارسته حتى يكون الكلام صحيح لكن ليس بيدى، إنما هو شئ لا شعورى. والآن أحس إن الجميع يكرهنى حتى أبى وأمى أصبحوا يقولوا لى إنت أنانية حتى مع أخواتك وتبدأ التفرقة ثم الكلام الحاد حتى تنتهى بمشاجرة. فهل أنا السبب فى ذلك ؟

ج: طبعاً. إذا كان كل اللى حواليكى بيقولوا إنك أنانية وأبوكى وأمك بيقولوا لك إنك أنانية وحتى مع أخواتك، فلازم تكونى أنانية. فأحسن تبطّلى الأنانية اللى عندك لأن دايماً الشخص الأنانى إنسان مكروه. الأنانى يعنى المحب لذاته اللى بيفضّل ذاته على غيره. فإنت حاولى تمرّنى نفسك إنك تفضّلى أخواتك عليكى، إنك تفضّلى أهل البيت كله عليكى. والكتاب بيقول: إن الواحد يكون آخر الكل يأخذ المتكأ الأخير يكون خادماً للكل. فحاولى إنك تبقى كدا. وعلى رأى الشيخ الروحانى بيقول: فى كل مكان وجدت فيه كن صغير أخوتك وخديمهم. فإنت فضّلى غيرك على نفسك. والكتاب بيقول: مقدمين بعضكم بعضاً فى الكرامة. قدّمى غيرك على نفسك سواء فى الكرامة أو فى الأخذ، فى أخذ الأشياء يعنى. مش كل حاجة كويسة تقولى أنا عايزاها وتسيبى أخواتك. لأن الأنانية دى لو أستمريتى فيها ممكن تضيّع منك خطيبك برضه. لأنك إنت أتدرّبتى على الأنانية مع أخواتك ومع أبوكى وأمك، ممكن الأنانية تصحبك جوه البيت فتبقى أنانية فى معاملتك لزوجك لغاية لما يزهق منك. فبطّلى الحكاية دى. لكن بتقولى كون إن أنا لم أشعر بذلك ما هو جايز الواحد ما بيشعرش بأخطائه لكن غيره بيحسوا بيها. فبطّلى الأنانية قبل الزواج وبعد الزواج (أنت تسأل وقداسة البابا شنوده الثالث يجيب 16، 23/09/1987).

س: واحدة بتقول مشكلتى أنى طموحة جداً، حصلت على دبلوم تجارة وأشتغلت فى محل لمدة 6 شهور، فكّرت خلال الشهر الأخير فى دراسة للّغة لعدم أقتناعى بالدبلوم، وأبتديت ولكنى فوجئت بأن صاحب المحل قال لى مع السلامة لأنى أنشغلت بالدراسة، وأنا ظروفى صعبة جداً. اتحطمت كل آمالى فى العمل والدراسة وأنا قدّمت فى شركة. وهل ممكن أوفق فى العمل والدراسة مع دراسة لغة.. إلى آخره ؟

ج: إذا كنت فى شغل وعايزه تدرسى، أدرسى بحيث أن دراستك ما تعطلكيش عن الشغل. ما تخليش صاحب العمل يشعر أنك مهملة فى عملك من أجل الدراسة. لأن يبقى بتاخدى الدراسة على حساب عدم الأمانة للعمل، ودى مش كويس.. أهو قال لك مع السلامة.

+  والطموح لابد أن يكون مرتبطاً بالأمانة، مش طموح معناها الواحد يفقد أمانته لعمله ويبقى عنده طموح. وذنب صاحب العمل إيه إن عندك طموح ؟! وهو كمان عايز شغله يمشى. فبرضه دى غلطة.

+ وفيه ناس يدرسوا دراسة فى عملهم تساعد على عملهم، يعنى واحد يكون ماسك حسابات فى عمل ويدرس حاجات تتعلق بالحسابات يدرس آلة كاتبة، يدرس اختزال.. يعنى فيه حاجات تساعده فى نفس العمل اللى هو فيه، مش دراسة خارجة عن العمل (الإرادة كيف تقوى وكيف تضعف 20/10/1978).

س: واحد بيقول يقول مار اسحق صوم اللسان خير من صوم الفم وصوم القلب عن الشهوات خير من صوم الإثنين. فكيف أصوّم لسانى وأنا لا أستطيع أن أسيطر على لسانى حينما أكون وسط الناس؟

1. ج: إن ما قدرتش تسيطر على لسانك سيطرة كاملة تدرج فى هذا الأمر، أقول لك شويه أمثلة من هذا التدرج يعنى:
2. إنك إنت لا تتكلم فى كل موضوع يطرح أمامك. مش أتكلّموا فى السياسة تخش فى السياسة، أتكلّموا فى الأسعار تخش فى الأسعار، أتكلّموا فى الأرواح تخش فى الأرواح، يعنى خليك زى ما بيقول الكتاب: الإستماع أفضل من التكلم. قول فيه موضوعات مش من إختصاصى بلاش أتكلم فيها. فيه ناس بيتكلموا فى سيرة الناس ما تتكلمش، يعنى موضوعات ما تخشش فيها.
3. تانى حاجة: أتعود على إختيار الألفاظ بحيث إن ألفاظك تكون ألفاظ كويسة ما فيهاش خطأ، ما فيهاش قسوة، ما فيهاش جرح للناس، ما فيهاش مسك للسيرة.. إلى آخره.
4. تدريب تالت: إنك إنت لا تتعود كثره الكلام. بيقول: كثرة الكلام لا تخلوا من معصية. بتتكلم لكن بلاش تكتّر، أول ما تلاقى نفسك كتّرت قول كفايه على كدا.
5. عود نفسك أيضاً على إنك إنت تتكلم حينما تُدعى إلى الكلام. يعنى إذا سألوك جاوب، ما سألوكش أديك قاعد ساكت.

درب نفسك أيضاً إنك.. (أنت تسأل وقداسة البابا شنوده الثالث يجيب 15/02 ـ 08، 22/03/1989).

س: واحدة بتقول أنا حائرة جداً لأن شخص تقدم لى عايش فى سويسرا، والكل يشهد له بحسن الخلق وطيبة القلب وعندما تكلمت معه علمت أنه كانت له غلطات كثيرة وأنه على إستعداد أن تكون حياته مستقيمة. ويقول لى أنه أختارنى لأنى متدينة وهو متمسك بى. وأنا صلّيت لكن مضطربة ؟

ج: أدينى اسمه وأنا أسألك عليه. على كُلاٍ لو إنك إنت بحثتى على أى إنسان له ماضى ولا ما لهوش ماضى يمكن مش ها تلاقى حد. الجميع زاغوا وفسدوا وأعوزهم مجد الله. يعنى إنت عايزه تتجوزى واحد بلا خطية، عمره ما أخطأ ؟! إذا كان ربنا غفر له إنت ما تغفريلهوش ؟ !

+ هو شوفوا عايز أقول لكم حاجة، ربما أكون قلتها لكم مرة لكن ها أقولها لكم مرة تانى. فى أحيان كثيرة لما ناس يخطبوا بعض والبنت تعترف بأغلاطها القديمة أو الولد يعترف بأغلاطه القديمة بتتفشكل الخطوبة وعنصر الشك يفضل موجود وما يخرجش. بقولها لكم بصراحة. هو المهم إن الإنسان يعنى حتى إن أخطأ يكون بطّل الخطأ يعنى وتاب وماشى كويس. فإن كان التائبون لا نصيب لهم.. يبقى ما فائدة التوبة ؟! إذا كانت توبة حقيقية يعنى. بتقول الكل يشهد له، برضه إيه.. فكّرى ولاحظى وهو ماشى معاكى بيتصرف إزاى.. مش معناها تأجرى مخابرات عليه.. ولا ناس يقعدوا يبصوا له ويشوفوا عينه رايحه فين ولا بيبتسم إزاى.. لأ يعنى خليكى معقولة يعنى. حاجة تانى وإنتِ فى ماضيكى ما لكيش أخطاء يعنى ؟! ولا هو المخطئ الوحيد ؟ ربنا يوفّقك وإذا كان من نصيبك ربنا يثبت الموضوع (علاقتك مع الله 16/08/1989).

أعلانات الزواج بمجلة الكرازة !!

س: لى أقتراح أتمنى من قداستكم أن تجعل له جزء فى مجلتنا التى ربما يطّلع عليها جميع المسيحيين. الأقتراح هو تخصيص جزء من مجلة الكرازة لموضوع الزواج، أى إتمام الزواج المسيحى عن طريق المجلة مثل نشر اسماء بعض الشابات والشبان الذين فى سن الزواج والمؤهل الدراسى والعمل الحالى والسن والمرتب..؟

ج:…أديك يا إبنى سمعت الرد من غير ما أتكلّم..

دا عايز يعمل أعلانات.. تقول إيه ؟! تقول فلانة عينها خضراء تطلب زوجاً طويل القامة.. مش معقول يا إبنى الحاجات دى أبداً.. ما تنفعش..

إذا كنّا أحنا رجال دين ونريد أن نقدم للناس مساعدة.. ينبغى أن تكون أعلاناتنا مضمونة وموضع ثقة. فإذا إنت قدّمت إنسان لناس، منين تضمن أنـهم يستريحوا معاه، وإذا ما أستريحوش يقولوا الكنيسة هى اللى قدّمت لنا.. وقالت لنا.. ويسخطوا على الكنيسة. أحنا منين نعرف إن الأتنين دول يستريّحوا مع بعض. مسائل الزواج دى مسائل أمزجة تتفق مع بعض. فيه مزاج يتفق مع مزاج وما يتفقش مع مزاج آخر. طبيعة تتفق مع طبيعة وما تتفقش مع طبيعة أخرى. على رأى الناس.. بعض الناس قالوا فى الزواج: الزواج هو نصف يبحث عن نصفه الآخر. يعنى الحاجة اللى تتفق معاه تمام الإتفاق. وجايز إنسانة تكون كويسة جداً لكن طباعها ما تنفعش مع واحد تانى. وواحد يكون كويس جداً وطباعه ما تتفقش مع واحدة. دى حاجة عايزه أتفاق قلوب وأتفاق طباع وأتفاق أفكار.. والطيور على أشكالها تقع زى ما بيقول المثل.. ولا يأتى الزواج إطلاقاً عن طريق المجلات سواء مجلاتنا أحنا أو أى مجلة أو جرنال فى الدنيا.. دا لازم الناس يختبروا بعض ويشوفوا يقدروا يعيشوا مع بعض ولا لأ. لكن ما تيجيش الأمور بالأعلانات.. دا الأعلانات دى واحد عايز يشترى له عربية.. يأجر شقة. لكن حكاية زواج ييجى بالأعلانات.. ما ينفعش أبداً يا إبنى.. ما ينفعش.. فنأسف لهذا الأقتراح ويعاد إلى صاحبه (عندى عليك إنك تركت محبتك الأولى 04/11/1977).

الزواج عن طريق الأنترنيت

س: واحد بيقول زوجوا البنات كقول الدسقولية.. نعم ولكن هل يوافق سيدنا أن يتم الزواج لبناتنا مع الألفية الثالثة عن طريق عرضهن على موقع الكنيسة بالأنترنيت ؟

ج: دا إيه دا إعلانات زواج بالأنترنيت. لأ حاجة مش لطيفة لأ. إذا كانت أى كنيسة بتعمل كدا لازم توقّف الموضوع دا. همّا سلعة سلع بتباع نعرضها فى الأنترنيت لأ. مش صح الكلام دا أبداً. والأنترنيت دا ها يجيب زواج ؟! دا زى مثلاً زمان كان فيه زواج بالمراسلة. واحد يتجوز واحدة من أمريكا تبعت له صورتـها مش صورتـها هىّ صورة ممثلة من الممثلات المشهورات بآخر جمال ومنظر ويفتكر إنه ها يتجوز دى ويعقد عليها بالمراسلة. وهوّ يبعت لها صور من قادة البلاد وإن هو من كبار الشخصيات.. فيعنى حكايه الأنترنيت وحكاية المراسلة دى ما توصّلش لزواج أبداً.. أبداً. اللى بيعملوا كدا يبطّلوا حاجات زى دى هىّ حاجات سوقى ؟! لأ (شجعوا صغار النفوس 06/12/2002).

ماجستير ودبلوم

س: واحدة بتقول أنا عمرى 23 وفى الماجستير وتقدم لخطبتى ابن خالتى وحاصل على دبلوم صنايع ويتعلق قلبى به روحياً ومحبة الله بيننا. وقد رفضه أهلى بسبب المؤهل رفضاً داخلياً ولكن من خارجهم يوافقون على رغبتى، فما رأى قداستكم فى هذا ؟ هل التعليم يؤثر على سعادة الأزواج ؟

ج: هو المحبة الكبيرة جداً ممكن تتخطى كل شئ. لكن إذا قريبك دا شعر بنقص لأنك إنت عندك ماجستير، وبعدين إن شاء الله يكون عندك دكتوراة وكل ما يقولوا الدكتورة فين يتعب.. هنا تبتدى المشكلة تظهر. فلو كان هو نفسيته تحتمل هذا الموضوع وما يتعبشى.. تمر. إذا كان إنت محبتك ليه كبيرة وتتجاهلى المؤهل دى حاجة تانى. هو المهم هل تستمر المحبة ولا لأ ؟ هل الزوج يتعب من تفوق زوجته عنه فى التعليم ؟ هل إنت تتعبى ؟ دى نوعية نفسيات أنا ما أقدرش أخش فيها، تتوقف على نوع نفسيتكم. بس لو حدث وأتجوزتوا ما تقعديش تتكلّمى على العلوم والرقى والدرجات العلمية وبيعاملوكى إزاى فى الجامعة.. ويعنى عايزه تكونى كدا متجاهلة الموضوع دا (محبة المسيح لتلاميذه 15/06/1994).

سيطرة الأم

س: واحد تعبان إنه أنـهى خطوبته من خطيبته بينما خطيبته دى بتحبه جداً وتعمل على إرضاءه لكن المشكلة فى والدتـها، فوالدتـها هى المسيطرة على الأب بينما الكتاب بيقول: الرجل رأس المراه. وقد تنازلت عن هذا ولكن أصابنى كثير من الإهانات من أمها وأنا لم يصدر منّى.. أقول لنفسى ما ذنب البنت ؟! وأوقات أخرى أقول لا أستطيع أن أستمر مع هذا البيت.. وخايف من عذاب الضمير؟

ج: شوف يا إبنى أنا عايز أقول لك حاجة يعنى فى المواضيع دى، طبعاً البنت لا ذنب لها. الأم مسيطرة على الأب دى إنت ما ليكش دخل بيها. المهم هل الأم مسيطرة على البنت اللى إنت ها تتجوزها ولا لأ ؟ ما جايز إنت تاخد البنت وتمشى بـيها إلى حيث تستريحان معاً بعيد عن الأب والأم وما ليكش دخل بيها. أمتى إنت تتعب وتقول ما أستريحشى.. لو كانت البنت خاضعة تماماً لأمها.. فأمها تخش فى حياتك والبنت تطاوع كلام أمها وإنت تتعب. لكن لو كانت البنت ساخطة على أمها وتصرفات أمها ومش طالعه لأمها يبقى ما ليهاش ذنب. فأقعد أفحص الموضوع وشوف يعنى البنت بتطاوع أمها فى إضطهادها ليك ؟ أو لما أمها بتهينك البنت بتزعل على كدا ولا بتنضم لأمها تقول ما ليها حق.. ما ست كبيرة.. يعنى شوف إيه اللى بيحصل (المسيح هو الرأس والكنيسة هى الجسد 14/09/1988).

 

لما نتكلم عن العلم أيضاً نذكر تعليم المرأة، المرأة التى هى نصف المجتمع وحينما تعلمت قدمت لنا طاقات عجيبة في كل نوع من أنواع العلم ووصلت المرأة إلى عمل الطبيب والمحاسب والمدرس وناظر المدرسة وأستاذ الجامعة ووصلت أيضاً إلى الوزارة وفي الغرب وصلت إلى ما هو أكثر من هذا وفُجّرت طاقات في المرأة عن طريق العلم. نذكر هذا فنذكر العمل الكبير الذى قام به قاسم أمين وهدى شعراوى والعمل الكبير الذي قام به البابا كيرلس الرابع الذى كان أول من أنشأ مدارس للبنات في مصر(ندوه محو الأميه بالأهرام 03/04/1996).

لما نتكلم عن العلم أيضاً نذكر تعليم المرأة، المرأة التى هى نصف المجتمع وحينما تعلمت قدمت لنا طاقات عجيبة في كل نوع من أنواع العلم ووصلت المرأة إلى عمل الطبيب والمحاسب والمدرس وناظر المدرسة وأستاذ الجامعة ووصلت أيضاً إلى الوزارة وفي الغرب وصلت إلى ما هو أكثر من هذا وفُجّرت طاقات في المرأة عن طريق العلم. نذكر هذا فنذكر العمل الكبير الذى قام به قاسم أمين وهدى شعراوى والعمل الكبير الذي قام به البابا كيرلس الرابع الذى كان أول من أنشأ مدارس للبنات في مصر(ندوة محو الأمية بالأهرام 03/04/1996).