ياما بيحصل إن إنسان يحاول إن مواهب غيره لا تظهر لكى ينفرد هوّ بالموهبة، راحته على تعب غيره، دى بتحصل كتير خالص وخصوصاً لو كان غيره مواهبه كويّسه. زى ناس لا يعطوا فرصه للظهور ودا التعب الذى يكابده الناشئون، إن الكبار مش عايزين يدوهم فرصة. يكون واحد عنده موهبة للكتابة يبعت للصحف ولا يمكن يُنشر. ليه ؟ لسه العيل بتاع النهار دا تطلع له مقالات ؟!! مستحيل. دا يمكن يقعد يا عينى المتخرج دا ـ ما دام مبتدئ ـ سنوات طويلة لا يمكن أن ينشر له شئ. أو واحد يعمل أختراع يقاوموا هذا الأختراع علشان ما يظهرشى ويبقى ظهر عالم من العلماء. أو معيد.. استاذه يدوّخه، لأن المعيد دا إيه عايز بسرعة يبقى مدرس واستاذ مساعد واستاذ ؟!! دا ممكن تتكتم أنفاسه. وساعات الأساتذة يقولوا للمعيد إنت اسمك مكتوب بالقلم الرصاص.. اسمه مكتوب بالقلم الرصاص يعنى ممكن يمحوه فى أى وقت. ما يتكتبش اسمه بالحبر غير لما يبقى مدرّس أو مساعد استاذ. وياما ناس ناشئين يتعبوا جداً على بال ما تُعطى لهم الفرصة لأن الكبار يريدون أن يحتكروا العلم، ويحتكروا الفن، ويحتكروا الشهادات، ويحتكروا النشر، يحتكروا العبقرية ويحتقروا كل عبقرى (لا تكن راحتك على تعب الآخرين 27/07/1988).

الوقت وأهميته وفائدته 25.02.1977

12 جويلية 201721 نوفمبر 2025 by Medhat Takla

والدى على المعاش

س: واحد بيقول ما رأى قداستكم فى المرأة العاملة ؟ والدتى امرأة عامله وهى تعمل كل يوم من 8 صباحاً لـ 3 بعد الظهر ووالدى على المعاش وهوّ المهتم بأمور المنزل وخاصه الأكل والشرب وهوّ سعيد بـهذا، وبصراحه هوّ ليس له رأى تقريباً فى المنزل فى كل الأمور، أمور المنزل تدار بواسطه الست الوالدة. وبعدين بيقول هل هذا هو حال الرجال بعد المعاش ؟ وما رأى الله فى هذا الحال ؟ وما معنى الآية التى تقول أعداء الإنسان أهل بيته ؟ ومعنى الآية اللى بتقول أكرم أباك وأمك ؟

ج: شوف يا إبنى والدك ووالدتك مبسوطين باللى بيحصل إنت تحشر نفسك ليه ؟! مالك بيهم هوّ مبسوط بشغل البيت بيتسلّى بعد المعاش وهى مبسوطة بتشتغل عامله بتجيب فلوس تكمّل إيراد البيت، إنت إيه اللى مزعّلك. لا والدك غلط ولا والدتك غلطت. ليه بس تخش فى الموضوع دا بالطريقة دى ؟! أما كون إن والدك اتحال على المعاش قبل والدتك فدا لأن فارق السن طبعاً الأب بيكون أكبر فى السن من الأم الرجل بيكون أكبر من الزوجة والأب بيكون أكبر من الأم … غالباً يعنى. وها ييجى وقت والدتك تحال إلى المعاش وتساعد والدك فى شغل البيت. كل واحد ياخد دوره كدا. وأوعى تفتكر شغل البيت وحش. طب ما ياريت إنت تساعد والدك أيضاً فى شغل البيت.

أما ما مصير الرجال بعد المعاش … فيختلف الناس لهذا الأمر. المعاش عندنا فى مصر بيروح على المعاش فى سن الـ 60 سنة. فيه ناس بعد سن الستين بيكون صحتهم قويه ويقدروا يشتغلوا فى أى شغلانه أخرى غير العمل الحكومى، وما يحتاجش إنه يقعد يساعد الست الوالدة فى شغل البيت يعنى بيكون له شغل أيضاً، بعد المعاش بيخش فى حاجه تانى. وفيه ناس صحتهم ما بتساعدش فبيقعد فى البيت. دا فيه ناس أصعب من كدا إنسان يحال إلى المعاش وربما زوجته تكون توفيت قبل كدا وأولاده هاجروا اللى راح أمريكا واللى راح كندا واللى راح استراليا واللى راح فى أى حته وهوّ قاعد لوحده وبيضطر إنه يخش فى بيت للمسنين علشان يساعدوه. فأشكر ربنا إن والدك عنده الصحة اللى بيشتغل بيها فى البيت. وتأكد لو قعّد بدون شغل خالص صحته ها تسوء لأن الحركة بتدى نشاط.

إيه معنى حكاية أعداء الإنسان أهل بيته ؟ يقصد أهل البيت اللى بيمنعوه عن ربنا. أو يمنعوه عن التكريس وتخصيص نفسه لله. أو يخافوا عليه مخافة جسديه زى أم تخاف على أبنها من الصوم تقول له ما تصومش. وزى أم تحب إن أبنها يذاكر تمنعه عن الاجتماعات كلها بينما يقدر يجمع بين الأتنين. آدى أعداء الإنسان أهل بيته، يعنى اللى بيمنعوه عن طريق ربنا. لكن مش قاعده إن فيه آباء كويسين وأمهات كويسين بيريّحوا أولادهم يعنى مش كل أهل بيت مش كلهم أعداء. حكاية أكرم أباك وأمك أنا عامل عليها كتاب ممكن تقراه بحاله بدال ما نضّيع وقتنا (أنت تسأل وقداسة البابا شنوده الثالث يجيب 01، 08/02/1989).

12 جويلية 201721 نوفمبر 2025 by Medhat Takla

بركه اسحق ليعقوب وعيسو

س: واحد بيقول فى عبرانيين11 بالإيمان بارك اسحق يعقوب وعيسو مع إن أبانا اسحق لم يبارك سوى يعقوب ؟

ج: لأ هو أعطى بركه لعيسو أيضاً بس ليست البركة الروحية التى أخذها يعقوب. بركه يعقوب تشمل 3 أشياء: بركه رئاسة الأسرة وإن يبقى هو سيد أخوته. ولذلك قال له كن سيداً لأخوتك وليسجد لك بنو أمك. وبركه تانيه هى بركه الكهنوت ولذلك قال عضدته بحنطه وخمر، وهنا يبان إزاى فى العهد القديم إشارة إلى سر الإفخارستيا اللى فى العهد الجديد … حنطه وخمر. زى إن كانت دى موجوده فى تكوين 27 موجود أيضاً فى تكوين 14 تقدمه ملكى صادق برضه الخبز والخمر … الحنطة والخمر. فيبقى بركه السيادة ورئاسة الأسرة، بركه الكهنوت وبركه أعظم من هذا كله أن يأتى من نسله السيد المسيح. العبارة اللى قالها ربنا لإبراهيم إن بنسلك تتبارك جميع قبائل الأرض، فالنسل دا ها ييجى من يعقوب. دول التلات بركات المهمة. أما كون إن عيسو ياخد أى بركه ماديه بسيفك تعيش يعنى أهو ها تقدر تعيش بس تعيش بالـ … بالقوة بالعافية، دى حاجه.

تانى حاجه: عايز أقولها لكم بالإضافة إلى كل هذا مجرد إن أب من الآباء الكبار يحط إيده على واحد ويقول أى كلام … بتعتبر بركه. ولذلك لما تقروا فى تكوين49 عن البركات التى أعطاها يعقوب أب الآباء لأولاده تجد فيها كلام صعب، ولكن مجرد إن قال كلمتين على راسه تعتبر بركه أى حاجه يقول أى كلام المهم يبقى خد بركه من أبوه إن قال له كلمتين كويسين ينفعوه فى حياته. ولو كلمتين إنذار، ولو كلمتين شداد كفاية إن أبوه قال له كلمتين فوق راسه. أقروا أنتو تكوين 49 والكلام اللى قاله يعقوب لأولاده … دا قال لأتنين من أولاده ملعون غضبهما فإنه شديد وسخطهما فإنه قاسٍ. ولكن قال بالإيمان بارك يعقوب أولاده. أى كلمه يقولها أب فوق راس واحد بتعتبر بركه. يعنى على الأقل بينذرهم إن غضبهم الوحش دا مضر ليهم فى حياتـهم، فيبقى نصيحه كويسه وتبقى بركه. زى أب يضرب ابنه قلمين تبقى بركه برضه، لأن بالقلمين دول بيصلّح حياته وبيوضبه وبيخليه يبطّل الشر اللى فيه فيعتبر هذا القلم – بالهمزة أو بالقاف زى ما تطلع – يعتبر بركه. يعتبر إيه ؟ بركه (شبه الشر 22/10/86، أنت تسأل وقداسه البابا شنوده الثالث يجيب 15، 22/10/1986).

12 جويلية 201721 نوفمبر 2025 by Medhat Takla

دعاء الناس العواجيز

س: واحد بيقول بالنسبة لدعاء الناس العواجيز أو أى واحد يكون متضايق من واحد قداستك بتقول لا تخافوا. فهل فيه مزمور نقوله أو آية أو أى حاجه نقولها لما نحس إن اللى أمامنا يدعى علينا ؟

ج: قول مزمور أللهم باسمك خلصنى، أول مزمور فى الساعة السادسة. قول المزمور التالت: يا رب لماذا كثر الذين يحزنوننى كثيرون قاموا علىّ كثيرون يقولون لنفسى … إلى آخره. قول أللهم ألتفت إلى معونتى يا رب أسرع وأعنّى ليخزى ويخجل طالبوا نفسى. قول أبعدوا عنّى يا جميع فاعلى الأثم فإن الرب قد سمع صوت بكائى الرب سمع صوت تضرعى الرب لصلاتى قَبِل.

أو حاجه تانى روح للناس العواجيز دول قول لهم أنتوا زعلانين من إيه ؟ وأنا أصالحكم وكلمه طيبه للعواجيز تخليهم يرجعوا فى كلامهم ويقولوا لك لا يا إبنى دا إحنا بنحبك وما نقصدش حاجه بس أهى كلمه طلعت على لسانا من غير قصد. يعنى مش بس تقول دعائهم ما يوصلشى مادام ناس زعلانين منك وبيدعو عليك … روح صالحهم. بس ساعات بقى فيه ناس ما يرضوش يصالحوك إلا لو نفذت اللى فى مخّهم وإنت مش قادر تنفّذ اللى فى مخّهم فاللى زى دول دعائهم لا يجوز، مادام بيطلبوا منك حاجه غير ممكنه وغير معقوله وحاجه ضد ربنا. أو زى ما قال داود النبى أكثر من شعر رأسى الذين يبغضوننى بلا سبب. دا بولس الرسول مجموعه ضخمه من اليهود نذرت صوماً إنـها لا تأكل ولا تشرب لغايه لما تقتله … أهو ندر يبقى يحوق فيهم الكلام دا ؟! شمعى بن جيرا دعى على داود النبى … دعى عليه وقال له يا سفّاك الدماء يحصلّك ويحصلّك زى ما حصل لشاول وعيلته اللى إنت عملت فيهم وسويت فيهم … هل دعاء شمعى بن جيرا حاق فى داود ؟! مش كل دعاء. بس مش إنت تقول هؤلاء الناس خطاه ولا يجوز دعائهم … روح صالحهم … إن كنت تقدر، إن كنت إيه ؟ تقدر (أنت تسأل وقداسة البابا شنوده الثالث يجيب، الإكليريكية 21/02/1989).

12 جويلية 201714 أوت 2019 by Medhat Takla

س: هل توجد آية فى الكتاب توضّح إن السيد المسيح له المجد ضحك ؟

س: هل توجد آية فى الكتاب توضّح إن السيد المسيح له المجد ضحك ؟

ج: هو ما فيش آية، وإن كان فى المزمور الثانى يقول: الساكن فى السموات يضحك بـهم. وربما يضحك بـهم يعنى يستهزء بيهم يعنى. وبعض القديسين كان عندهم روح المرح برضه. زى إيليا النبى مع إنه كان راجل ناشف وشديد لما جه يتكلم مع أنبياء البعل، لما صلّوا وما نزلتش نار قال لهم صلّوا بصوت عالى يمكن الإله بتاعكم نايم جايز يصحى، فربضه كان قاعد ينّكت معاهم. من أشهر القديسين اللى كانوا مشهورين بروح المرح القديس مكاريوس الإسكندرانى لما تقروا السيرة بتاعته، لدرجة إن الشياطين برضه بقوا لما ييجوا يتعبوه يعاملوه بنفس المعاملة. على أيّه الحالات الكتاب المقدس بيقول: للبكاء وقت وللضحك وقت. والمهم فى الضحك إنه لا يبالغ فيه بحيث يخرج عن حدوده ولا الإنسان يكون مكتوم على طول بحيث يعيش فى كآبة. الناس اللى عندهم مرح بيكونوا سعداء.. الناس اللى عندهم مرح بيكونوا سعداء فى حياتـهم. وممكن يكون عندهم مرح وما عندهمش غلط. فيه إنسان يضحك معاك من النهار دا لبكرة وما فيش كلمة غلط. وفيه إنسان يقعد مكتوم بحيث إنك إنت ما تقدرش تكمّل معاه 5 دقايق، تلاقى الجو بقى.. يعنى دراما خالص ما بقاش.. ما بقاش ماشى. المسألة عايزه من جهة الضحك الواحد يعرف متى يضحك ومتى لا يضحك وكيف ولماذا والحدود والكثرة والقلة.. إلى آخره. لكن لو إنت بتضحك ما بتغلطش، ما دام ما خرجتش على الحدود. وأحياناً يكون المرح نوع من الذكاء يعنى مش كل واحد يعرف يضحك هى عايزه ذكاء علشان يقدر يقول كلام فيه ضحك. وساعات الناس اللى ما بيعرفوش يضحكوا بيكون ذكائهم ضعيف.. مش كله. فيه مجالات تبكّى الناس فيها على خطاياهم لكن ما تقدرش تخلّى البكاء صفة دائمة مدى الحياة. الواحد يبكى شويه لكن ما يقدرش يقعد طول عمره يبكى. وفيه أوقات تضّحك الناس وتفرّحهم لكن مش كل عمرهم ضحك. وفيه موقف يكون متأزم بين أتنين وهمّا الأتنين متخانقين ودا بيشد من هنا ودا بيشد من هنا وما تتحلّش الحكاية غير بكلمة لطيفة تفك الأتنين شويه وتخفف التأزم الموجود، ياما أشكالات بتتحل بالضحك. وساعات الناس اللى ياخدوا الأمور كلها جد الحكاية قصادهم بتتسد يعنى ما بتنفعشى. فما تاخدش الأمور بالشدة دى يا حبيبى. مش كل حاجة حصلت من المسيح أتكتبت ومش كل حاجة ما أتكتبتش ما حصلتش (كيف نعامل الأطفال 08/12/1978).

11 جويلية 201723 مارس 2022 by Medhat Takla

ما رأيك فى الهجره للخارج روحياً وأخلاقياً وعقائدياً

س: واحد بيقول إيه رأيك فى الهجره للخارج أمريكا مثلاً روحياً وأخلاقياً وعقائدياً، وخاصه إذا كان معظم أقارب المسافر موجودين فى بلد المهجر ؟

ج: رأيى إن الإنسان يستطيع أن يعبد الله فى أى مكان على الأرض، المكان مش هو اللى يحدد علاقتك بالله لكن اللى يحدد علاقتك بالله صلتك القلبيه بربنا وقلبك من جوه. فممكن إنسان يذهب إلى بلاد المهجر ويعيش قديساً ويعطى قدوه صالحه هناك. وممكن إنسان يروح المهجر ويضيع، وممكن يضيع فى مصر برضه، يعنى اللى ضايع … ضايع، المهم قلبه من جوه مظبوط ولا مش مظبوط.

+ روحياً: أنا زمان كنت ما بوافقش على الهجره وبقول الإنسان لو راح روحياً يضيع.. وأخلاقياً. لكن لما توليت هذه المسئوليه بنعمه ربنا وجدت نفسى إنى سواء موافق أو مش موافق لازم آخد بالى من الناس اللى فى الخارج. فى امريكا مثلاً كان عندنا كنيستين فقط كنيسه فى أقصى الشرق فى نيو جرسى، وكنيسه فى أقصى الغرب فى لوس أنجيلوس. عندنا دلوقتى 25 كنيسه، وبمعونه ربنا ها تتأسس 10 كنائس أخرى فى بحر 3، 4 شهور … وأبتدينا فيهم. يعنى كنيسه فلوريدا إن شاء الله أسبوعين تكون تأسست كنيسه جديده ما كانتش موجوده فى المهجر. كنيسه أورانج كونتى تابعه لـ لوس انجيلوس برضه مسافه أسبوعين تلاته تكون تأسست، ما كانتش موجوده قبل كدا. بنعمه ربنا كلها ها تمر. فمادام فيه كنائس موجوده يبقى يستطيع الإنسان روحياً يمشى كويس. بس طبعاً ما فيش كنائس زى مصر، يعنى موجود فى البلد أو فى الولايه كنيسه، هنا عندكوا عشرات الكنائس موجوده فى بلد واحده.

+ عقائدياً: إذا كنتم أنتوا ثابتين فى عقائدكم لما تروحوا الخارج ممكن تكونوا كارزين لهذه العقائد مش بس ثابتين فى هذه العقائد. ولولا الهجره قديماً ما كان الإيمان أنتشر إلى جهات الأرض كلها، يعنى لو إن آباؤنا الرسل قعدوا فى أورشليم وما خرجوش منها وقالوا مش عايزين نـهاجر كان إزاى الإيمان وصل إليكم. لو إن مرقس الرسول قعّد فى بلده وما جاش مصر كان الإيمان وصل أليكم إزاى؟! وهكذا باقى الرسل، زى ما بيقول الكتاب: والذين تشتتوا جالوا مبشرين بالكلمه. فممكن إن الإنسان اللى يهاجر يكون معاه كتب روحيه، ويكون معاه كتب عقائديه. هو المهم فى تربيه أولادنا اللى يتولدوا فى المهجر. يعنى اللى خارجين من هنا نقول عندهم معلومات وعندهم عقيده، لكن اللى يتولدوا لازم يتربّوا فى مخافه الله ولذلك الذين هاجروا من مصر عليهم مسئوليه كبيره من جهه أولادهم. لأن جايز لما يكبروا ربما ما يعرفوش يحكموهم إذا ما ربوهمش من الصغر. واللى قاعدين هنا فى المهجر لازم ياخدوا بالهم من الكلام دا. لأن ممكن الولد يكبر يبقى عمره 15، 16 سنه أبوه يقول له كلام..يقول له يابابا دا رأيك الخاص لكن أنا لىّ رأى آخر، ما يقدرش يقول له أزيد من كدا الـ Human Rights لازم تديله هذا الحق. فلازم تربى الولد من صغره بحيث يكون ثابت فى الإيمان ثابت فى العقيده.

+ ومن أعظم الناس الذين ثبتوا فى الإيمان وفى العقيده فى بلاد المهجر دانيال النبى، بلاده كانت أرض السبى لكنها بالنسبه له هاجر من بلاده سواء كأسير حرب أو … لكنها فى أرض غريبه وكان مثالاً للتقوى والحياه مع ربنا … دانيال النبى. وعرضت عليه إغراءات كثيره ورفضها. ومن الآيات اللطيفه إنه يقول: أما دانيال فوضع فى قلبه أن لا يتنجس بأطايب الملك. وقف موقف شديد … قوى فى أرض غربته.

+ من ضمن الناس الجبابره فى أرض غربتهم حزقيال النبى أيضاً.

+ ومن ضمن الناس اللى كانوا أقوياء فى أرض غربتهم نحميا ... نحميا الذى استطاع أن يقف أمام الملك أرتحشستا ويكلّمه عن إعاده بناء أورشليم وفعلاً راح هناك وبناها وأرجع كل شئ إلى وضعه السليم.

+ وكذلك زروبابل، زوربابل اسمه … زوربابل يعنى زرع بابل. يعنى أتولد فى بابل. يعنى فى أرض السبى ومع ذلك نُسب إليه هيكل زوربابل. فالإنسان اللى عايز يمشى كويس فى العقيده يستطيع يكون قوى يذهب إلى هناك وينشر الأرثوذكسيه فى كل مكان. بس مش كل واحد يقول لى أنا ها أروح أنشر الأرثوذكسيه لازم يكون ثابت فيها قبل ما يمشى .. علشان ما يتعبشى.

+ شوفوا فيه تشبيه لطيف ربما أكون قلته لكم من قبل: التيار … تيار الميه فى نـهر أو بحر يستطيع يجرف كتله ضخمه من الخشب ويمشّيها زى ما هو عايز، لكن ما يستطيعشى يجرف سمكايه قد كدا.. لها قوه الإراده اللى تمشى عكس التيار وتقف ضده لأن فيها إراده وفيها حياه، مش زى كتله الخشب … تجيب عرق خشب ولا جزع نخله وترميه قد كدا..ويمشى مع التيار ويجرفه التيار لكن السمكايه الصغنطوطه اللى قد كدا هو … تقف تقاوم التيار. فأنا عايزك تبقى زى السمكايه ديا ما تبقاش زى جزع الشجره … كبير كبير … وإراده ما فيش وحياه ما فيش.

+ الشخص اللى يهاجر لازم يكون قوى فى عقيدته قوى فى أخلاقه قوى فى روحياته والقوه الداخليه تصحبه فى كل مكان يحل فيه (آباؤنا الرسل 25/06/1986).

صلاة التجنيز بالمهجر

س: ما رأى قداستكم فى إلغاء صلاة التجنيز بالمهجر حيث توجد الإمكانيات لحفظ الجثه أثناء أسبوع الآلام إلي أن يحل عيد القيامة ويُمكن الصلاة على المتوفى؟

ج: دا طقس موجود، والشخص اللى بيموت فى أسبوع الآلام بيستفيد من صلاة الجنّاز العام اللى بيُعمل بعد قداس أحد الزعف. بيتعمل جنّاز عام على أرواح الذين يموتون فى أسبوع الآلام

ثانياً: فيه صلاة بتقال على الميت اللى بيموت فى أسبوع الآلام، صلاة فى الكنيسة موجودة بس فى أسبوع الآلام لا يرفع عليه بخور. يعنى ما فيش أوشية إنجيل ببخور، ما فيش أوشية الراقدين ببخور، لكن فيه صلاه معينه موجودة فى الكتاب بتاع أسبوع الآلام يُصلّى بـها على الموتى ويحضروا صلاة البسخه. لكن ما تفتكرش بتوع المهجر بيقصّروا فى صلوات الكنيسة.. لأ ماشيين تمام. هو عايز يحنّطوا الميت لغاية لما ينتهى أسبوع الآلام وبعدين يصلّوا عليه. دا حتى لو حنطوه لغاية عيد القيامة الصلاة فى الخمسين ما فيهاش التجنيزات العادية دا بيُصلّى بلحن القيامة ويخش الكنيسة بلحن القيامه (العنف 15/11/2000).

القداس الإلهى للقمص أنطونيوس راغب كنيسه مارجرجس بجيرسى ستى

قداس الأحد المبارك أبونا غبريال عبد السيد 03.05.1992

الأنبا بولا المحبة المتبادلة بين الزوجين بدون تاريخ

11 جويلية 2017 by Medhat Takla

فى حب مصر: لقداسه البابا شنوده الثالث

جعلتك يا مصر فى مهجتى

وأهواك يا مصر عمق الهوى

إذا غبت عنك ولو فتره

أذوب حنيناً أقاسى النوى

إذا عطشت إلى الحب يوماً

بحبك يا مصر قلبى أرتوى

نوى الكل رفعك فوق الرؤوس

وحقاً لكل أمرئ كل ما نوى

11 جويلية 201722 ديسمبر 2019 by Medhat Takla

هل شغل البيت يعتبر عطاء ؟

س: واحدة بتقول بعد سماعى العظة الماضية عن العطاء وخاصة عبارة إن لم تجد ما تعطيه أعط راحتك للآخرين. فهل شغل البيت يُعتبر عطاء ويطبّق عليه الآية: كل واحد يأخذ أجرته بحسب تعبه ؟

ج: طبعاً شغل البيت يعتبر عطاء ما فيش شك. لأن المرأة بتُعطى من راحتها فى شغل البيت لكى تريح الآخرين فيعتبر عطاء.

س: وبعدين بتقول إذا كان شغل البيت ومسئولياته أحياناً يكون على حساب علاقتى بربنا مثل تقصيرى فى الصلاة والقراءة وحضور الكنيسة. هل هذا أيضاً عطاء ؟

ج: لأ. الأمر يحتاج لحكمة، حكمة فى تنظيم الوقت. يعنى إنت تتعبى من أجل البيت يعتبر عطاء، لكن تتعبى بحكمة بحيث إنك إنت كما تُعطى الآخرين تُعطى ربنا حقوقه وتُعطى حياتك الروحية حقوقها.

س: كيف أرضى ربنا فى الآية ينبغى أن يطاع الله أكثر من الناس وفى نفس الوقت لا أكون سبب فى تعب من فى البيت أو شعورى بالتقصير من ناحيتهم ؟

ج: ما نبالغش مبالغة شديدة فى شغل البيت بحيث إنه ياخد وقت يضيّع الروحيات ويضيّع الكنيسة ويضيّع كل حاجة. يعنى كل حاجة تكون بعقل.. بعقل وبحكمة. مش واحدة مثلاً فى شغل البيت عايزه تلّمع الزجاج علشان يبقى نضيف تقعد تشتغل فى تلميع الزجاج ساعتين تلاتة وما تصليش ؟ لأ أبداً. نقطة تانية عايز أقولها لك ياريت تكونى حافظة المزامير والصلوات، وأثناء ما بتشتغلى فى البيت قولى مزاميرك وصلواتك أثناء الشغل. أثناء ما بتطبخى فى البيت قولى مزاميرك وصلواتك أثناء الطبيخ، على الأقل يطلع طبيخ مبروك مطبوخ بالمزامير وبالصلوات وحاجة تمام ينفع الجسد والروح معاً ويبقى بركة. أتمرّنى على الحفظ كل ما تحفظى كل ما يكون قلبك مع ربنا. أحفظى أشياء من التسبحة، من التراتيل وأنتى بتشتغلى تبقى بترتلى وبتصلّى وخصوصاً فيه بعض التراتيل لها أسلوب الصلوات. زى مثلاً يا رب يسوع المسيح مخلصى الصالح ليها أسلوب الصلاة. زى مراحمك يا إلاهى كثيرة جداً فيها أسلوب الصلاة. فإخلطى الشغل بالصلاة وما تخليهوش مجرد شغل بعيد عن ربنا (التكامل فى الفضائل 09/07/1997).

11 جويلية 201719 أفريل 2020 by Medhat Takla

ضرورة تعليم العقيدة

س: هل البساطة فى الإيمان تُغنى عن تعليم العقيدة والأسرار الكنسية وما شابه ذلك ونقول إن هذا الإنسان بسيط لا يحتاج إلى تعليم ؟

ج: لعلى فى مقدمة كتاب بدعة الخلاص فى لحظة كاتب مقالة كاملة عن هذا الموضوع وإن لازم نعلّم الناس العقيدة. لأن الإنسان اللى تقول عليه بسيط وسيبه فى بساطته ما أسهل واحد من طائفة أخرى ياخد هذا البسيط ويلقنه تعليم غير أرثوذكسى ويحوله إلى إنسان من عقيدة أخرى. البساطة فى المسيحية معناها عدم التعقيد. بسيط مش معناها ساذج أو على نياته ؟ لأ بسيط يعنى غير معقّد والبساطة المسيحية بساطة حكيمة والحكمة المسيحية حكمة بسيطة يعنى غير معقدة. علشان كدا المسيح قال كونوا بسطاء وحكماء. فممكن الإنسان يكون بسيط ويكون أيضاً حكيم. لكن مش معناها بسيط يعنى ساذج يعنى على نياته يعنى أى واحد يضحك عليه بكلمتين أو أى واحد يقوده حيث يشاء. لا تأخذوا البساطة بـهذا المعنى. بسيط يعنى غير معقد بسيط يعنى إيه ؟ غير معقد. زى ما أنتو مثلاً تاخدوا فى الكيمياء إن فيه مادة مركّبة ومادة بسيطة. فإذا دخلت فى تركيب وأتحد عنصر بعنصر وفلز بفلز وحاجات زى كدا تكوّنت مادة مركّبة. لكن حاجة بسيطة يعنى غير مركّبة وغير معقّدة (أنت تسأل وقداسة البابا شنوده الثالث يجيب ج4 19، 26/03/1986).

02/03/1978 البابا شنودة الثالث أسرار الكنيسة السبعة