الأستاذ حبيب جرجس له فضل علينا جميعاً في ناحيتين على الأقل وفي نواحى أخرى لأنه كان المؤسس الحقيقي للكلية الأكليريكية في هذا الجيل والمؤسس الحقيقي لمدارس الأحد في هذا الجيل وقائد التعليم الكنسي في هذا الجيل أيضاً .

المهم في حبيب جرجس ناحيتين هامتين جداً في حياته:

+ الناحية الأولى: الشعور بالمسئولية ودا درس روحى نقدر ناخده … الشعور بالمسئولية.

+ وتانى نقطة: العمل الإيجابي في الحياة.

لما دخل حبيب جرجس في الكلية الإكليريكية ما كانش فيه حتى مجرد مدرس دين في الكلية الإكليريكية … دخل الكلية الإكليريكية على اعتبار إنـها القناة الشرعية للعلوم الكنسية. ولم ينتقد الوضع إنما شعر بالمسئولية وبدأ العمل الإيجابي إنه يدرس، إنه يشتغل بعدين تخرّج من الكلية سنة 1898 بقي أول مدرس للاهوت في الكلية الإكليريكية بعدين بقي مُعلّم الدين عموماً. وبعدين اللاهوت دا بدأ يتفرّع فروع … فروع لغاية لما كبرت العلوم في الكلية الإكليريكية … الراجل لا ينتقد إنما يشتغل في العمل الإيجابي بكل قوة شاعر بالمسئولية.

+ الكنيسة كانت ضعيفة جداً في ذلك الحين مما جعل الطوائف تأكل فيها كما تشاء. فيه ناس بقوا يطلعوا ينتقدوا الوضع وناس أبتدوا في النظام الملى علشان يقوموا بالأعمال الإدارية بدال رجال الكهنوت. وناس بقوا يصرخوا صرخات من أجل حالة الكنيسة، وناس كانوا بينتقدوا ويكتبوا … إلى آخره. حبيب جرجس لا مسك دى … ولا دى … ولا دخل في الشغل دا كله مسك بيديه حجرين أساسيين ووضعهما في أساس البناء حجر اسمه الكلية الإكليريكية وحجر اسمه مدارس الأحد. وقعد البناء يرتفع وهو ينشد ويقول: وأما شعبك فليكن بالبركة الوف الوف وربوات ربوات يصنعون مشيئتك.

+ وكان حبيب جرجس محبوب جداً قعّد يشتغل الشغل بتاع الكنيسة في مسألة التعليم فقاد التعليم في جيله، قاده من الصفر، يعنى لا أستطيع أن أقول إن حبيب جرجس كان له مدرّس بالمعنى المفهوم، جايز أخذ شوية من أبونا فيلوثاوس ابراهيم، لكن كوّن مكتبة للكلية الإكليريكية وقعّد جنب المكتبة يقرأ ويفهم ويألّف ويشتغل … دى طريقته.

+ أول واحد في جيلنا هذا ترجم أقوال الآباء هو الأستاذ حبيب جرجس.

+ أسس مجلة اسمها مجلة الكرمة قضت حوالى 17 سنة، كانت أحسن مجلة في جيلها، مجلة علمية على أساس عميق كان فيها جزء من ترجمة أقوال الآباء.

+ أول واحد درّس اللاهوت في العصر الحاضر كأستاذ يعنى. بعد منه جه سمعان سليدس وجه أساتذة تانيين، لكن هو كان أول واحد ألّف في اللاهوت كتابة المشهور بتاع أسرار الكنسية السبعة، ألّف كتب في تاريخ الكنيسة، ألّف كتب في الكتاب المقدس.

+ لما جه يشوف تعليم الدين في المدارس ما كانش فيه كتب فشعر حبيب جرجس بالمسئولية فألّف مجموعة من الكتب. المبادئ المسيحية لأبتدائي وللثانوى والتعليم كلّه. ألّف كتاب الكنز الأنفس في التاريخ المقدس على تاريخ الكتاب المقدس وأسفار الكتاب المقدس.

+ لقي ما فيش تراتيل في الكنيسة أرثوذكسية. بدأ يألّف تراتيل للكنيسة وكان شاعراً أيضاً وكان يألّف ترانيم ألّف تراتيل على العقائد المسيحية ودى طريقة كانت موجودة زمان أيام الآباء زى القديس افرام السريانى ألّف تراتيل على العقائد. غالبية العقائد وأسرار الكنيسة ألّف عليها تراتيل. وألّف تراتيل على حاجات من الأبصالمودية. وألّف أناشيد من ضمنها نحن جند للمسيح في مدارس الأحد … نشيد مدارس الأحد. ونشيد الكلية الإكليريكية، والترتيلة المشهورة اللى أنتوا تعرفوها بتاعت كلام إلهى غذاء القلوب … هو برضه اللى مألّفها. ليه كتب تراتيل للكبار وكتب تراتيل للصغيرين.

+ لقي مجال التراتيل ما فيش أبتدى يكتب تراتيل. لقي مجال العقائد ما فيش أبتدى يكتب عقائد، لقي مجال الروحيات ما فيش أبتدى يكتب في الروحيات. ليه كتاب سر التقوى كتاب مشهور وكتاب نظرات في الحياة المسيحية. وكتاب سُلّم الفضائل بتاع الدرجى نشره. وأبتدى يشتغل في كل مجال وليه كتاب اسمه عزاء المؤمنين عن الحاجات اللى تقال في الجنّازات.

+ في كل مجال بقي يشتغل لا راجل كان بينتقد ولا راجل كان بيعيّط ولا راجل كان بيصرخ من الحالة الموجودة. إنما راجل كان كل ما يشوف عيب أو كل ما يشوف نقص يشعر بالمسئولية ويبتدى يشتغل في العمل الإيجابي.

+ ما فيش تعليم أبداً أبتدى يكوّن مدارس الأحد. لقي الحكاية عايزة صحافة أبتدى يشتغل بالصحافة ويطلّع الكرمة.

لقي سياسة الكنيسة تحتاج إنه يخش في المجلس الملى دخل في المجلس الملى.

+ أسس كثير من الجمعيات القبطية في أيامه، وشجّع البعض علشان تنشر كلمة ربنا …

+ يعنى إحنا نعتبره أستاذنا جميعاً وأستاذ لهذا الجيل كلّه في التربية الكنسية وفي الكلية الإكليريكية وفي الوعظ وفي التألّيف وفي الصحافة … النقط دى كلها كان هو استاذ الجيل فيها جميعاً.

+ وكان يمثّل التعليم الصحيح. وكان يكتب في العقيدة دون أن يجرّح في أحد على الإطلاق بالطريقة الايجابية البناءة.

+ كان دائماً يبنى مش بس البناء العلمى حتى في المعمار لأن هو اللى بنى الكلية الإكليريكية ومبناها الأصلى في مهمشة.

+ نحن ندين له بالفضل كرجل أسسّنا جميعاً ووضع أساس التعليم في هذا الجيل تدرّيساً وتألّيفاً ووعظاً وإرشاداً.

+ وكما إهتم حبيب جرجس بالكلية الإكليريكية إهتم أيضاً بالعرفاء والمرتلين فأسس أول مدرسة للعرفاء والمرتلين. ولأول مره دخّل طريقة برايل في الكتابة على البارز لكى يعرف بيها الطلبة قراءة الإنجيل وقراءة الألحان والأجبية والحاجات دى. وأتذكر أن المعلّم ميخائيل اللى هو أستاذ الألحان في الكلية الإكليريكية وأيضاً كبير المرتلين في البطريركية ما كانش ينام قبل ما يقرأ الإنجيل وهو رجل ضرير لكن معاه الكتب بتاعته يحط إيديه عليها كدا بالبارز يقرأ ويستفيد وينبسط. برضه دا من فضل حبيب جرجس. وفضلت مدرسة العرفاء والمرتلين موجودة في نفس مبنى الكلية الإكليريكية في مهمشة إلى أن نُقلت إلى معهد ديديموس هنا في البطريركية، ثم نقلت إلى مقر هذا المعهد في شبرا حالياً.

+ لما الكتاب يقول اذكروا مرشديكم الذين كلموكم بكلمة الله وانظروا إلى نـهاية سيرتـهم وتمثّلوا بإيمانـهم، فنحن أول مرشدينا في هذا الجيل بإعتراف الكل هو حبيب جرجس … أول مرشدينا في هذا الجيل هو حبيب جرجس. نذكره بكل حب. وأفتكر في يوم الأربعين بتاعه كنت ألّفت قصيدة عنوانـها: وأبٌ أنت ونحن يا أبى عشنا بالحب على صدرك نحبوا … قصيدة تلاقوها في كتاب انطلاق الروح قلتها بكل عاطفتى وبكل محبتى لهذا الرجل (حبيب جرجس، الوداعة 20/08/1986).

اللى ييجى الكلية الإكليريكية ويبقى كاهن يكون مستواه عالى

س: ما هى الشروط للأشتراك فى الكلية الإكليريكية ـ بيقول للإشتراك ـ وما هى الأوراق المطلوبة ؟ وهل يشترط أن يكون معه ثانوية عامة أو ما يعادلها ؟ وبأى مجموع من الدرجات وأرجو التوضيح ذلك ؟ وأرجو من قداستكم أيضاً أن تصلّى من أجلى لأنى مصاب بمرض التردد ـ أهو من شروط الإكليريكية إنه ما يكونش مصاب بمرض التردد، خلّى بالك. ولا أدرى ماذا أفعل لكى أغيّر من هذا ؟ ونطلب أن تصلّى لأجل الخدمة ويمنع الشيطان …؟

ج: شوف يا إبنى شروط الكلية الإكليريكية القسم النهارى يعنى أن يكون الإنسان حاصلاً على شهادة الثانوية العامة، مش أو ما يعادلها يعنى ما بنقبلش الثانوية الصناعية ولا الزراعية. ويكون جايب مجموع يقدر يخش بيه الجامعة، مش واحد ما يلاقيش أى كلية تقبله يقول البايرة على بيت أبوها وييجى الكلية الإكليريكية … ما تنفعش دى. إحنا عايزين اللى ييجى الكلية ويبقى كاهن يكون مستواه عالى، يكون مستواه عالى ويكون ذكى ويكون جايب مجموع كبير يقدر يدخّله أى كلية محترمة دى نقطة.

تانى نقطة: نحب يجيب لنا مش تزكية من الأسقف بتاعه أو المطران بتاعه، التزكية وحدها ما تكفّيش إنما يجيب جواب من الأسقف بتاعه أو المطران بتاعه يقول إن أنا عايز هذا الشماس أرسمه عندى فى بلدى. فعلّموه لىّ ورجعوه لىّ أرسمه. لكن مجرد يعمل له تزكية ويقول إن دا إنسان شماس وبيخش الكنيسة وبيصلّى وبيعترف طب إفرض أتخرّج نوديه فين ؟ وتكون بلده مش عايزاه … نوديه فين ؟ نبص نلاقى واحد متخرج من الأرياف وقعد معانا فى القاهرة ويقول بقى شوفوا لى شغلانة. الكلام دا ما نقبلوش. إذا كان إنسان بلده عايزاه وترى فيه الخدمة القوية الصادقة، وترى فيه النشاط والإفتقاد والوعظ والتعليم ويتمنوا أمتى يتخرّج علشان يرسموه يبقى هو دا اللى نقبله. غير كدا مش ها تنفع الحكاية. ما بيتخرّج طلبة من الإكليريكية ما بيلاقوش شغل، وفاكر إنه أكمنه أخد شهادة الإكليريكية يبقى أخد صك من صكوك الغفران يدخّله الملكوت … لأ. لازم يكون الواحد عنده نشاط وعنده خدمة ومحبوب ومعروف والبلد منتظره بس ياخد الشهادة علشان يترسم. وبيتعمل له إختبار شخصى … إختبار شخصى قبل دخوله. علشان كدا بنسمح للى بيتقدموا ويكونوا جايبين مجموع إنـهم يدونا صورة من الثانوية العامة ويخلّوا الثانوية العامة يقدموها على أى حته، علشان لو رفضته الكلية ما يقولش ضيعتوا مستقبلى، يكون مقدم فى نفس الوقت على حته تانى. فلو قبل هناك وفضّل الإكليريكية يبقى معناها إنه متمسك بالخدمة (أنت تسأل وقداسة البابا شنوده الثالث يجيب 02، 09/09/1987).

الخلافات مع البروتستانت 30 خلاف … بدون تاريخ … لقداسة البابا شنوده الثالث

منهج الفرقة الثانية. القداس الإلهى (الباسيلى) المعلم زاهر (تعليمى 2005) (أ)

منهج الفرقة الثانية. القداس الإلهى (الباسيلى) المعلم زاهر (تعليمى 2005) (ب)

س: لماذا سمح الله بالمرض وأى حكمة توجد فى المرض ؟

ج: بداءهً أقول إن المرض جاء نتيجة الخطية يعنى آدم وحواء قبل الخطية ماكانش فيه مرض. وبعدين بعد الخطية أتت الأمراض النفسية أولاً ثم الجسدية، دى أول حاجة.

تانى حاجة: جايز يكون المرض جرس إنذار للإنسان بدال ما يفارق العالم فى خطيته يتوب قبل ما يموت. إذا كان المرض يؤدى إلى وفاة يبقى يتوب قبل ما يموت. ولو الإنسان أُخذ فجأة جايز تنتهى حياته ويموت فى خطيته. فبرضه حالة المرض بالنسبة للذين يموتون فى أمراضهم مفيدة إن ربنا لا يفاجئهم إنما بيدى لهم فترة إنذار.

بالنسبة للأشخاص اللى أمراضهم بسيطة ويحيون بعدها ويشفون منها بتبقى فرصة للتوبة، فرصة للخلوة ومحاسبة النفس إذا أستخدم الإنسان المرض لصالحه. وأحياناً بعض أمراض تكون أكتر من مئات العظات وتفيد.

وفيه أمراض بتعطى إتضاع فى القلب … إتضاع فى القلب. يعنى مثلاً بولس الرسول بيقول: ولئلا أرتفع من فرط الإعلانات أُعطيت شوكة فى الجسد ملاك الشيطان ليلطمنى لئلا أرتفع. وتضرع إلى الله 3 مرات ربنا قال له لأ تكفيك نعمتى والمرض دا مفيد ليك. مفيد ليك راجل بتاع رؤى وبتاع مواهب ومعجزات، كانت المناديل اللى على القروح اللى فى جسده بتشفى الأمراض وتخرج الأرواح الشريرة وهو نفسه كان مريض. لأن المرض كان مفيد ليه لئلا يرتفع.

الأمراض أيضاً بتكون فترة تعاطف ومحبة والناس مع بعض بيسألوا عن بعض بيشتركوا فى محبة بعض بيتزاوروا برضه بتفيد من الناحية دى.

والمرض أحياناً يكون أختبار للإنسان زى أيوب الصديق مثلاً. أو أظهار لفضائله. ناخد النواحى المفيدة فى المرض ما ناخدش النواحى المتعبة.

وفيه أمراض الإنسان بيجيبها لنفسه، ما تقوليش ليه سمح الله بيها هو اللى جايبها لنفسه، زى واحد يتنرفز … يتنرفز، ياخد الأمور بعنف، بتعب، فتكون النتيجة إن ييجى له مرض فى أعصابه، ييجى له ضغط دم، ييجى له سكر، ييجى له زى ما ييجى له هو اللى جايب لنفسه. تقول لى ليه سمح ربنا ؟ نقول لك ليه إنت وقعت ووقعت نفسك. زى واحد ما يذاكرشى ويسقط يقول ليه سمح ربنا بسقوطى، نقول له لأ ليه إنت سمحت بإنك ما تذاكرش ؟ (فضائل لكنها لا تكفى 04/12/1991).

لكل شىء زمان ولكل أمر تحت السموات وقت، للعمل وقت وللراحة وقت. فيه إنسان تلاقيه نشيط جداً جداً ويشتغل طول الوقت وما يديش لنفسه راحة ييجى وقت ينهار، الطبيعة هى الطبيعة، ممكن ربنا يغفر لكن الطبيعة لا تغفر، للعمل وقت وللراحة وقت. ولذلك ربنا قال ستة أيام فى الأسبوع تعمل ويوم لا تعمل عملاً. للعمل وقت وللراحة إيه.. وقت، الله الذى خلق هذا الجسد عارف ميزاته. عارف طبيعته، عارف إنه يحتاج لراحة، عارف يحتاج ليوم فى الإسبوع. علشان كدا المسيح قال السبت وجد لأجل الإنسان وليس الإنسان لأجل السبت. دا ربنا مدّى لك السبت، مدّى لك يوم راحة فى الأسبوع من أجلك إنت، مش تقول وصية صعبة مش قادر عليها. دى كويسه ليك، للعمل وقت وللراحة وقت. الإنسان اللى يستريح وقت العمل يبقى غلطان والإنسان اللى يعمل وقت الراحة يبقى غلطان. والإنسان اللى يوزن نفسه بين العمل والراحة يعيش بضمير سليم ويعيش بصحة سليمة.

كل شيء ليه وقت ولذلك أيضاً الإنسان الحكيم بيقدر يوزع وقته توزيع مظبوط. الوقت دا للكنيسة، الوقت دا للروحيات، الوقت دا للشغل، الوقت دا للبيت، الوقت دا للترفيه، الوقت دا للنوم، الوقت دا للأكل، لكل شىء تحت السموات وقت.. يمشى مظبوط. إنسان تلاقى ناجح فى عمله فيقعد يشتغل على طول.. على طول.. على طول لغاية لما ييجى وقت يقول لك فلان دا وقع، وقع إزاى !؟جسم ما أخدش راحة فراح واقع، يقول بينما دا كان مخلص.. دا كان كويس.. الله !!إحنا بنقول حاجة مخلص مخلص وأمين فى عمله.. أمين فى عمله وجاد ومجتهد لكن لازم للعمل وقت وللراحة وقت.

غالبية الناس لا ينظّمون وقتهم علشان كدا بيبقوا ضايعين.. ضايعين فى حاجات كتيرة.. ضايعين لأن مش عارف ينظّم وقته مش عارف يدّى لكل حاجة وقتها، هو كون إنك إنت مخلص لعملك يمنع إنك إنت مخلص لأسرتك. كون إنك إنت تبقى مخلص لعملك يعنى تشتغل طول النهار وترجع لزوجتك بالليل الساعه 12 ولا واحدة تلاقيها نامت وأولادك ما يشوفكش.. مين قال الكلام دا !؟ لكل شئ تحت السموات وقت.. للشغل وقت وللعيلة وقت وللزوجة وقت وللأولاد وقت ولأمورك الاجتماعية وقت لحياتك الشخصية وقت ولراحتك وقت ولعبادتك وقت.. تنظّم وقتك تبقى مظبوط (الصعود 18/05، أنت تسأل وقداسة البابا شنوده الثالث يجيب ج43  11، 17، 18/05/1988).

لما كانت مصر تحتفل بعيد الأم أو عيد الأسرة كل يوم 21 مارس وفى نفس الوقت هو عيد الربيع لأن 21 مارس مبدأ الربيع فأود أن أكلمكم اليوم عن الأسرة المثالية وكيف تكون، فيه بعض قواعد بسيطة..

أولاً: ما هى الأسرة ؟

الأسرة بمعناها الضيق زوج وزوجة وربما أولاد.

والأسرة بمعناها الأوسع العائلة الكبيرة التى تفرعت عنها أسرات صغيرة، العيلة الكبيرة تلاقى داخلها أسرات صغيرة كدا.

والأسرة بمعناها الأكبر الوطن كله أسرة واحدة.

والأسرة بمعناها الكبير جداً البشرية كلها أسرة واحدة، كل البشرية أولاد آدم وحواء وكل البشرية عائلة واحدة إن تألم فيها عضو يتألم باقى الأعضاء.

وعلى قدر الإمكان نحاول نتكلم دلوقتى عن الأسرة الصغيرة.

الأسرة ينبغى أن تتصف أولاً بالحب والأسرة التى تفقد الحب هى أسرة مخلخلة مزعزعة، والحب يبدأ قبل تكوين الأسرة يعنى مفروض الحب يوجد بين الخطيبين قبل أن يتزوجا. مخاطرة إن أتنين يتجوزوا ويقولوا نحب بعض بعد ما نتجوز، مفروض إنـهم يحبوا بعض قبل ما يتجوّزوا. ولا أقصد بالحب الإنفعالات العاطفية أو الجنسية الخاطئة إنما أقصد بالحب الصداقة والمودة والتعاطف وتآلف القلوب بعضها مع بعض.. يعنى دم دا ييجى على دم دا.. يعنى يقدروا يعيشوا مع بعض كأصدقاء.. يحبوا بعض زى أى صديق بيحب صديقه. لذلك أنصح بإستمرار إن فترة الخطوبة تكون فترة صداقة ومودة وليست فترة عبث عاطفى أو عبث جنسى ما يفهموش بعض فيه.. عايزه محبة، تقول والكتاب المقدس يقول كدا..؟ أقول لك يقول.. الكتاب المقدس يحكى لنا كيف أن يعقوب أحب راحيل ومن أجل هذا تزوجها. ما يقدروش أتنين يعيشوا مع بعض فى بيت واحد من غير ما يحبوا بعض ـ الحب شئ والشهوة شئ تانى ـ إحنا بنتكلم عن الحب يعنى الصداقة.. يعنى الود.. المودة.. للأسف ساعات فترة الخطوبة بتكون فترة إتفاق على العفش.. الجهاز.. المواعيد.. الملبّس.. الحفلة.. البيت.. الشقة.. شوية كلام خارج عن الموضوع الأصلى. مفروض يتصادقوا مع بعض، يبقوا أصدقاء ويحبوا بعض.

المحبة إن وجدت بين الزوجين ممكن أن توجد بين الأولاد، لأن عثرة كبيرة إن الأولاد يشوفوا الأب والأم بيتخانقوا مع بعض ويزعقوا لبعض أويشتموا بعض أو يتخاصموا مع بعض أو يضربوا بعض أو ينفصلوا وكل واحد يروح عند بيت أبوه أو بيت أمه.. عثرة كبيرة جداً وخطية بالنسبة لتحطيم نفسية الأولاد. علاقات المحبة وسط الأسرة ينبغى أن تكون فيها الخدمة والتعاون وتعب كل إنسان من أجل الآخر.. يعنى إيه ؟ يعنى المرأة تبذل كل جهدها إنـها تريّح الراجل، والرجل يبذل كل جهده إن يريّح المرأة وكل واحد يتفانى فى إراحة زميله.. دا مبدأ أساسى فى الأسرة. إذا واحد تعب الكل يبقوا حواليه نفسياً وروحياً وجسدياً بكل ناحية.. هنا الأسرة (الأسرة الروحية السعيدة 20/03/1981).

Old Testament Map Explanation

شرح خريطة العهد القديم

Old Testament Map                                                          

خريطة رحلة فى أسفار  العهد القديم

 الشرح التفصيلى لأبونا مرقس فوزى – رحلة فى أسفار العهد القديم

كتاب رموز وأسراره خيمة الاجتماع إعداد الأغنسطس حسام كمال عبد المسيح

الأنبا موسى أسقف الشباب: السيد المسيح وتابوت العهد. بأمريكا

القمص تادرس يعقوب. جوله فى الكتاب المقدس. لاويين ـ تثنية 2 

القمص تادرس يعقوب. جولة فى الكتاب المقدس. يشوع ـ راعوث 3

مزمور 117 أعترفوا للرب فإنه صالح بدون تاريخ البابا شنوده الثالث

أبانا الذى. يتقدس أسمك ج1 02.07.1981 البابا شنوده الثالث

س: واحد بيقول لماذا فى كنيستنا بالذات نحرّم العلاقة الثنائية بين شاب وفتاة فى مرحلة ثانوى؟

ج: علشان كنيستنا مؤدبة وكويسة. شوف يا إبنى لما بيختلطوا وهمّا عيال ما بيعرفوش الغلط، لسه ما وصلوش ليه. ولما بيختلطوا وهمّا كبار عندهم العقل اللى بيضبط. لكن مرحلة المراهقة وهى مرحلة صعبة، يعرف الخطأ وما يقدرش يضبط نفسه فممكن تعمل مشاكل. لكن مع ذلك إحنا لا مانع عندنا من إن  كلهم يختلطوا مع بعض بس ما تبقاش علاقة ثنائية منفردة. يعنى ما فيش ما يمنع يوجد إجتماع فى الكنيسه شبان وشابات.. ما فيش مانع كلهم مع بعض، لكن واحد وبنت متخصصين فى بعض هوّ دا اللى ما بنوافقش عليه.

س: بيقول لى مع نجاح الكثير من تلك العلاقات التى كُلّلت بالزواج بعد حين ؟

ج: إن نجحت مع البعض جايز ما بتنجحش مع البعض التانى. أمّا كُلّلت بالزواج بعد حين فدى أشك فيها. يعنى تلامذة فى ثانوى.. فين لما الواد بتاع ثانوى لما يتخرّج وفين لما يروح الجامعة وفين لما يروح الجيش وفين لما يتخرّج تكون البنت خدت واحد غيره.. يعنى (الأمور المختصة بملكوت الله 21/05/1997).

أعجاب صبيانى

س: واحد بيقول أنا فتى فى السابعة عشر من عمرى وبأحب فتاة عمرها 15 وبتبادلنى.. كيف أعمل لتكون هذه الفتاة شريكة حياتى؟

ج : شريكة حياتك يعنى شريكة فى التلمذة بقى ولا شريكة فى إيه ؟! فى الخدمة العسكرية ؟! ولا لسه فى الكلية ؟! إنت أستنى لما تكبر.. لما تكبر وتتخرّج من الجامعة وتلاقى وظيفة وتخلّص الخدمة العسكرية وتبقى راجل ليك مرتب يصرف على بيت وبعدين تبتدى تفكّر. لكن دلوقتى تقعد تحب وإنت لسه عيّل صغيّر.. يعنى قول لهذا الحب يستنى حبة، لسه لما تتخرّج إن شاء الله. طب دلوقتى ها تقدر تجيب للبنت شبكة ولا تجيب لها ربكة ؟ إيه اللى ها تجيبه ؟ وها تقدر تشوف لها شقة ولا تشوف لها الشقى ؟! دوّر على مصلحتك. ولو تنشغل بالحب دلوقتى مش ها تقدر تذاكر ولا تنجح. عقلك ها يقعد يفكّر فى البنت مش ها يفكّر فى الدروس. قول لنفسك.. قول لسه ما جاش معادها لما أتخرّج أبقى أشوف الحكاية دى (حياه البراءة والطهارة والنقاوة 20/07/1994).

هل الحب خطية ؟

س: واحد بيقول هل الحب خطية ؟

ج: طبعاً لما تحب أبوك وأمك ما يبقاش خطية. ولما تحب أصدقائك ما تبقاش خطيهة ولما تحب ربنا ما تبقاش خطيهة مش كل حب يعنى.. ولما تحب الفضيلة ما تبقاش خطية، ولما تحب قريبك كنفسك ما تبقاش خطية.

لكن لعل صاحب السؤال ـ وبعض الظن إثم ـ بيقصد الحب بين واد وبنت يعنى.. أنا مش عايز أشك فى كلامه لكن أفتكر بيقصد دى.

شوف يا أبنى إذا كنت تحب فتاة مفروض إنك تحافظ عليها يعنى لا تضيّعها فإن ضيّعتها ما تبقاش بتحبها. إن علّمتها الكذب وإنـها تخّبى عن أبوها وأمها وتقول إنـها رايحه عند واحدة صاحبتها وصاحبتها تبقى إنت.. طبعاً يبقى إنت وقعت فى خطية. لما تقول إنك بتحبها وإنت بتضيّع سمعتها تبقى دى خطية. لما تقول إنك بتحبها وتعطّلها عن دروسها وتسقط فى الإمتحان لأنـها بتفكر فيك وإنتَ بتفكّر فيها بقيت خطية. ولذلك أنا فاكر مرة سألونى  ـ على ما أظن سنه 1971 السؤال دا كان بعد البطريركية بحوالى أسبوع أو أسبوعين ـ ما الفرق بين الحب والشهوة ؟ فقلت لهم الحب يريد دائماً أن يُعطى والشهوة تريد دائماً أن تأخذ. يعنى واحد عنده شهوة إمتلاك يبقى عايز ياخد، واحد عنده شهوة انتقام عايز ياخد تاره. واحد عنده شهوة مناصب يبقى عايز ياخد منصب، واحد عنده شهوة فلوس عايز ياخد فلوس. لكن الحب يريد دائماً أن يُعطى. زى الأم لما تحب أبنها تبقى تريد أن تعطيه بأستمرار حناناً وشفقة ومساعدة ومعونة فى كل حاجه. فإنت لازم تفرّق بين الحب والشهوة. الحب الذى ينتهى إلى زواج ممكن يمر، بس مش معناها تحب بنت على أعتبار إنك تتجوزها بعد عشر سنين.. طبعاً هى مش منتظراك.. نقصد الناضجين المستعدين. زى مثلاً ما قيل عن يعقوب أب الآباء إنه أحب راحيل وتزوجها. والمحبة كما يريدها الله لابد تكون محبة طاهرة ونقية وحكيمة. وما تزعلش من الإجابة دى وخليك عاقل فى محبتك (يشوع بن نون 05/02/1997).

 هل ممكن إن أنا أحب بنت محبة بريئة ؟

س: هل ممكن للفتى أو الفتاة إن يحبوا وفى نفس الوقت يكونوا مع ربنا ؟

ج: دى تتوقف على نوع الحب يعنى. الناس أحياناً يخلطون بين الحب والشهوة فالحب الذى ليس بشهوة لا يحرّمة ربنا. لكن مش الحب معناها التعلق ويقعد يفكر ليل ونـهار دا ما سمهوش حب.. دا اسمه هلوسة. الحب الحقيقى زى أى حد بيحب أبوه بيحب أمه بيحب أخواته بيحب اساتذته بيحب معلميه بيحب أب اعترافه بيحب أى حد، حب طاهر مقدس. لكن إذا تحول إلى شهوة يبقى الأمر خاطئ. ويتحول إلى شهوة إذا دخل فيه الجنس فكراً أو أكثر من فكر. فيقدر الإنسان يعرف كمان إن أى حب بيخش فى قلبه أو فى فكره بيعطّله عن ربنا ولا لأ ؟ لأن بيقول ممكن يحب وفى نفس الوقت يكون مع ربنا فإذا هذا الحب شغل العقل عن ربنا يبقى ما كانش مع ربنا. وإذا حدث إن الحب صار أحدى السريقات الروحية التى تسرق محبة الله من القلب، والعاطفة الكاملة تتحول من الله إلى شخص آخر.. دا المسيح بيقول: من أحب أباً أو أماًَ أكثر منّى فلا يستحقنى أو ابن أو إبنة أو حتى المحبة بين الزوج والزوجة إذا كانت أكثر من ربنا فلا يكون له استحقاق. فالواحد يقدر يعرف نوع المحبة دى بريئة حقاً ولا لأ. زى مرة كنت فى اجتماع من الأسرات الجامعية مش عارف من قيمة  17 سنة ولا إيه.. مدة طويلة يعنى، فواحد بيسألنى بيقول لى ممكن إن أنا أحب بنت محبة بريئة ؟ قلت لة طب لو واحد من الشبّان حب أختك محبة بريئة توافق ؟ قال لى دا أنا أموّته. قلت له طب إشمعنى إنت تسمح لنفسك بما لا تسمح به لغيرك ؟! إلا بقى لو كانت كلمة بريئة مش بريئة (من هو الله بالنسبة إلينا ؟ 19/07/1989).

تعمل فى سوبر ماركت

س: أنا بأحب فتاة ولكن هذه الفتاة بتعمل فى سوبر ماركت ولها علاقات بشباب.. إلى آخره، فماذا أعمل ؟

ج: إذا كنت تقدر تتجوزها وهى ترضى تتجوزك وتسيب السوبر ماركت بالإتفاق معاها يبقى الحكاية تمت. كمان مش كل بنت بتشتغل فى السوبر ماركت تبقى وحشه، بنات كتير جداً بيتّصلوا بالناس فى نواحى التجارة والحاجات دى ويكونوا بنات فى منتهى الأخلاق الكويسه. لو فضلت شكّاك بالشكل دا ها تتعب، جرّب وشوف (لوم النفس29/09/1993).

أنا إنسانة عاطفية جداً

س: واحده بتقول أنا إنسانة عاطفية جداً لكن كثيراً ما أصلّى حتى يوجه الله هذه العاطفة الزائدة له، ولكن لا تستجاب هذه الطلبة، وأنا أتعب كثيراً من هذه العاطفة الثائرة التى لا تـهدأ فما الحل ؟ مع العلم إن عندى أشتياق لله وللثبات فيه ؟

ج: العاطفة الكبيرة ميزة وليست ضرراً. ولهذا نجد فى تاريخ الكنيسة إن كثيراً من العاطفيين الذين إنحرفت عاطفتهم إنحرافاً سيئاً جداً لما أُصلح مدار هذه العاطفة ومسار هذه العاطفة تحولوا إلى قديسين جبابرة.

القديس أوغسطينوس كان رجل عاطفى جداً وانحرفت بيه العاطفة فى طريق الخطية، لما وصل لربنا العاطفة ديا حولته إلى أوغسطينوس رجل التأمل ورجل الحب الإلهى ووجهها توجيهاً سليماً.

مريم القبطية كانت إنسانة عاطفية ووقعت فى الخطية إلى أعماقها ولكن لما هذه العاطفة وجهت فى طريق الله تحولت إلى القديسة السائحة المتوحدة مريم التى استحقت أن تبارك القديس الأنبا زوسيما القس. وهكذا نجد أن كثيراً من الزانيات والزناه تحولوا إلى قديسين وقديسات من الجبابرة فى منتهى العمق. لأن العاطفة مصدر للحب فإذا الحب توجه نحو الله يتحول الإنسان إلى شخص مملوء من العاطفهةالإلهية. بعكس الناس  القساة اللى قلبهم شديد دول حتى لما بيتحولوا إلى الله بتبقى قلوبـهم عايزه واحد ينحت فيها زى ما بينحت فى صخر. ولهذا كثير من القديسين قالوا إحنا نحب الناس العاطفيين ولو وقعوا فى الخطية ووقعوا فى الزنا لأنـهم ممكن يتحولوا إلى طريق بار ومقدس بعكس الناس القساة القلب من الصعب يوصلوا لطريق ربنا. فحكاية العاطفية الزايدة دى ميزة بس عايزه حُسن توجيه.. حُسن توجيه.

نصيحتى لكِ هى الآتى لا تتركى عاطفتك تسير حسبما تشاء إنما اشغليها قبل ما تنشغل لوحديها. بإستمرار أملى قلبك بالعاطفة. أعطى حباً للبيت الذى تعيشين فيه، لأبوكى وأمك وأخواتك وقرايبك. أعطى جزءً من العاطفة لصديقاتك وزميلاتك فى العمل أو فى الدراسة. أعطى جزءً من العاطفة للخدمة، سواء فى مدارس الأحد أو الخدمة الاجتماعية أو خدمة الفقراء أو خدمة الملاجئ.. إلى آخره. إعطى عاطفة لله، فى صلواتك وتأملاتك ومحبتك. إشغلى قلبك بإستمرار لو ما شغلتيش قلبك بإستمرار تأتيكى محبة غريبة وتسكن فيكى وتتعبك. يبقى العاطفة الزائدة دى كويسه وميزة. بس إحنا نستغلها استغلال سليم ونوجهها توجيه نحو ربنا. ما نخليهاش تنحرف نحو العالم أو نحو الجسد أو نحو الشهوات والرغبات الخاصة إىّ أن كانت إنما نوجهها نحو الله، دا اللى إحنا عايزينه. وبإمكانك، بإمكانك إنك إنتِ توجهى عاطفتك توجيها روحياً سليماً وزى ما بأقول لك إشغلى نفسك بإستمرار.

كمان فى عملك الروحى ليكن عملاً بعاطفة، يعنى لما تصلّى إعطى قلبك للصلاة، لما تقرى فى الكتاب إعطى قلبك لكلام الله، لما تخدمى إخدمى بكل قلبك بكل عواطفك، لما تدرّسى فى مدارس الأحد حبى الأولاد من أعماقك، يملؤا قلبك. إن لقيتى بعد كل دا زايد عندك شويه حب شوفى بيت حضانة وإشتغلى فيه، شوفى ملجأ وإشتغلى فيه، شوفى أى عمل إلهى وإشتغلى فيه. لو محبتك ديا تحركت نحو خلاص النفس وإشتغلتى فى الخدمة ها تلاقى خدمتك لا تقتصر على فصل مدارس أحد إنما بقيتى تملى كل مكان خدمه. فى كل مكان تحدثى الناس عن ربنا، وكل شويه والتانية تجيبى ناس لربنا.. العاطفة دى كويسه. إحنا ما نزعلش إن عندك عاطفة كبيرة. لكن نزعل إن العاطفة الكبيرة ديا تتوجه توجيهاً خاطئاًً.

أكتر حاجة تتعب بنت إن العاطفة دى بحالها كلها تتحط فى شخص واحد، إنسان من اللى بيمشى على الأرض.. فتدوخ. وبخاصة إذا كانت هذه العاطفة من جانب واحد. زى واحدة تضع كل عاطفتها فى إنسان والإنسان مش حاسس بيها فتبقى تعبانه وها تموت. ما تعمليش كدا لا يوجد إنسان يستحق منك كل هذا. خلّى عاطفتك أولاً وقبل كل شئ فى ربنا نفسه. حبى إيضاً القديسين أديهم جزء من عاطفتك. زى الناس اللى بيحبوا القديسين ويتشفعوا بالقديسين تلاقى عندهم عاطفة كبيرة نحو القديسين. يحب مريم العذراء ويقعد يقول شى رى نى ماريا، ويقول كل تسابيح العدرا وكل إبصاليات العدرا وكل تداكيات العدرا. ويروح فى كنايس العدرا ويعلق قنديل للعدرا، ويحط شمع للعدرا ويبقى العدرا واخده جزء من قلبه. كوّنوا صداقة مع الله وصداقة مع القديسين وصداقة مع السما ومع الأبدية. وكوّنوا صداقة مع الأنبياء والرسل الذين تقرؤن لهم. واحد يقرا سفر أشعيا ويتصاحب مع أشعيا، وواحد يقرا سفر ارميا ويتصاحب مع ارميا، وواحد يقرا سفر الخروج ويتصاحب مع موسى ويبتدى قلبه يتملى. خلّوا علاقتكم مع ربنا علاقة روحية علاقة حب علاقة عاطفة. عاطفة فى الصلاة عاطفة فى القراية عاطفة فى التأمل، عاطفة فى التناول عاطفة فى الاجتماعات، عاطفة فى الترتيل، فيه إنسان يرتل ترتيله عادية وإنسان يرتلها بكل قلبه، لما بيرتلها بكل قلبه جزء من عاطفته بتشتغل فى الترتيل. هو اللى بيتعب الإنسان فى العاطفة إن فيه عاطفة مختزنة مش لاقيه تتصرف فين يعنى قاعد يوزع فى الحب يوزع وفاضلين شويه حب ما أتوزعوش فييجى إبن الحلال وياخدهم. وبعدين يبتدى ياخد.. ياخد.. ياخد لغاية ما يستولى على الكل.. ما تبقوش كدا. أملؤا قلبكم من العواطف النبيلة الروحية القوية وعندئذ تشعرون بقيمة العاطفية إنـها كانت لخيركم. زى ما قلت لكم الشخص العاطفى عنده مجال للسير فى طريق الله أكثر من الشخص القاسى القلب. بس عايزه توجيه سليم وعايزه استغلال وما تتركوش الحب اللى فى قلبكم فاضى، استغلوه قبل ما العالم يستغله (موسى النبى: وردة وسط أشواك ج1 17/09/1976).

إحنا يهمنا جداً سمعة البنات

س: واحد بيقول أعيش فى منزل مع عمى وامرأة عمى وأنا وبنت عمى على أرتباط ببعض، أرتباط شديد، ومن عادات وتقاليد الصعيد ممنوع التحدث معها وممنوع الخروج ولكن من محبتنا لبعض فكّرت أخرج معاها بدون ما حد يعرف وخروجنا يوم الاجتماع فقط، وليس فى أى مكان آخر. وأرجوك أعطينى ـ مش عارف حلاً ولا حِلاً ـ مش مشكّلها.. وهذا مرفق للسؤال الأخير للاجتماع الماضى. فما هو الحل ؟ وهل هذا خطأ منّى ومنها ؟

ج: إن كنت يا إبنى بتحب بنت عمك أطلبها من أيد عمك.. قول له يا عمى أنا عايز أتجوز بنتك، وتبقى الحكاية ماشية بطريقة كويسة. لكن تعلّم بنت عمك إنـها تخرج بدون إذن أبوها وتخرج فى الخفا وتمشى مع واحد وبحجة اجتماع !! بصراحة دى لخبطة. ولو فرض عمك صدفة راح الاجتماع وشافك وأداك قلمين إنت والبنت وطردك من بيته، يبقى حكايتك إيه ؟! ما تمشيش فى حاجة ضميرك بيكّتك عليها. والحاجات اللى فى السر ديا.. كون إنـها فى السر معناها إنك إنت خايف تنكشف، وخايف تنكشف يعنى ضميرك تاعبك، أمّال خايف ليه ؟! الحاجة العلنى الواحد بيعملها فى عين الكل. كمان لما الناس يشفوك ماشى مع بنت عمك يقولوا إيه ؟! أفرض ما حصلش قسمة وما أتجوزتـهاش، يبقى ضيعتها كمان وضيّعت سمعتها. الناس يقولوا ناخدها إزاى ودى كانت ماشية مع واحد تانى ؟! لا يا إبنى.. بتحب بنت عمك ما فيش مانع، روح لعمك وقول له أنا عايز أتجوز بنتك، وأمشوا كدا بصراحة. إذا ما كنتش تقدر على الزواج دلوقتى.. أخطبها. إذا كنت لسه صغيّر يبقى أجّل الحكاية دى لما تكبر.. بكره تكبر وتعقل. لكن إذا كنت كبير وعاقل أخطبها.

+ شوفوا عايز أقول لكوا حاجة إحنا يهمنا جداً سمعة البنات. الولد ساعات يمشى زى ما يمشى ولما ييجى يتجوز يقولوا.. أهو راجل.. شقاوه عيال.. طبعاً ما نوافقش على كدا لكن يعنى سكّته مفتّحه، لكن سمعة البنت سمعة البنت دى زى القزازة إذا أتشرخت ما تقدرش ترجّعها لحالتها الأولى، مهما كان.. طلع عليها كلام يفضل الكلام ماشى وراها حتى لو كان الحاجات دى وهى صغيّرة. سمعة البنت صعبة جداً. فإذا كنت إنت بتحب بنت عمك حافظ على سمعتها. المحبة الحقيقية مش تضيّع سمعتها علشان تُرضى رغبتك.. حافظ على سمعتها دى بنت عمك.. وبنت عمك كأنـها أختك، حافظ على سمعتها وما تعلّمهاش إنـها تخرج فى الخفا، ما تعلّمهاش أنـها تخرج فى الخفا.. وإلا يبقى بتفتح لها طريق الخطية وإنت بتعلّمها الخطية (الخدمة بمناسبة صوم الرسل 28/06/1989).

أتعرّفت عليه فى المصيف

س: واحدة بتقول شخص اتعرفت عليه فى مصيف وفى جلسة قال لى أنا معجب بيكى ومن ساعتها بيتصل بيّا بالتليفون ويحاول يقابلنى ويكلمنى، فهل غرضه التسلية أم الإرتباط السليم ؟ مع العلم إننى لم أخرج معه إلا مرة واحدة. فهل كلمة معجب كثيراً ما يقولها الشباب أم صادق فى كلامه ؟

ج: أول حاجة عايز أقولها لك إزاى بتصطحبى مع ناس فى المصيف ؟! وإزاى فى المصيف تقعدى مع واحد ويكلمك ويصل الكلام إلى الوضع بتاع الإعجاب يعنى.. كدا بسهوله إنت أى واحد يقابلك فى المصيف تقعدى معاه والمكالمة تتطور للإعجاب ؟! وبعدين من ساعتها يتصل بى بالتليفون.. طبعاً التليفون إنت اللى أدتيه تليفونك فواحد تقابليه فى المصيف تاخدى عليه وياخد عليكى وتدّي له نمرة التليفون ويتصل بيكى.. ويحاول يقابلنى ويكلمنى.. وبعدين خرجت معاه مرة واحدة.. وخرجت معاه بأى صفة ؟!

شوفى يا بنتى إنت ارتكبت عدة خطايا مع بعض

وطبعاً ما قلتيش لما خرجتوا مع بعض اتكلمتوا عن إيه يعنى، مش معقول قعدتوا سوا تتكلموا عن.. هل الشاروبيم أعظم أم السارافيم ؟! من رأيى إنك تبطّلى الحكاية دى، ولو قدرتوا تغيروا نمرة التليفون يبقى كويس وطبعاً إتكلمتى فى التليفون من ورا أبوكى وأمك.. وهو بيكلمك فى التليفون تقولى له.. إزيك يافلانة.. مش ممكن ها تنادي له باسم راجل وإلا أبوكى ها يمسكك ..

يا بنتى إنت ماشيه فى سكه خطرة وبتلعبى بالنار

وأوعى تفتكرى واحد ها يتجوز واحدة عن طريق المصيف أو عن طريق التليفونات أو عن طريق الخروج معاها دا مستحيل.. كون إنه بيلعب معاكى.. هو دا اللى حاصل، هو الأول يلعب معاكى وبعدين يلعب عليكى وبعدين ما تلاقيش روحك.. فأعقلى وأتقلى. وكان لىّ نفس أسأل سؤال تانى لما إنت رحتى على المصيف والواد دا قعّد معاكى وكلمك على الإعجاب بيكى كنت رحتى مع عيلتك، ولا رحتى لوحدك، ولا رحتى فى رحلة تبع الكلية، ولا فى رحلة تبع الكنيسة.. ومين اللى كان مشرف على الرحلة دى ؟

خلّى بالكوا من عيالكوا أديكو شفتوا بيجرى إيه للبنات.. (العمل الذى أعطيتنى لأعمل 06/11/1996).

مشكلتى هى الكذب

س: واحد بيقول أنا شاب فى سن الـ 19 ومشكلتى الوحيدة هى الكدب فما هو الحل بعد أن فشلت محاولات كثيرة وهذه هى أكبر كدبة يعنى، إن فشلت محاولات كثيرة، وهى إن كان عندى ملاحق فى الصف الثانى الثانوى وأخفيت على أبى وأمى هذا حتى أمتحنت ونجحت ؟

ج: شوف يا إبنى الكدب بالذات بيخلّى الناس يفقدوا الثقة بالشخص. يعنى إنت لما تكدب بتفقد ثقة الناس فيك، ولما تفقد ثقتهم مش ها يصدقوك حتى لو قلت كلام صح. وتفقد أحترام الناس ليك، وحاول إنك إنت تبطّل الكدب. غير إن أحياناً. مش أحياناً هو غالباً وربما على طول ـ بتكون خطية الكدب هى خطية ثانية تسبقها خطية أولى. يعنى فيه خطية سابقة بتخلّى الواحد يكدب. إما خطية إنك إنت سقط وعايز تدارى السقوط بالكدب.. يبقى خطية بتغطى خطية أخرى. أو جايز واحد يكدب كنوع من إنه يصل إلى غرض من الأغراض ورغبته فى الغرض دى تكون خطية. أو واحد يكدب رغبة فى إنه يضحك على واحد أو يتّريق عليه فيكدب له كدبة ويشوفه يعمل إيه.. برضه خطية سببها الكدب. فشوف إيه الخطية الأولى اللى بتخليك تكدب وبطّل الخطية الأولى تلاقى خطية الكدب أتبطّلت لوحديها. كمان الكدب معناها إنك إنت ما بتتحمّلش مسئولية أعمالك. لو تكون راجل جد من النوع اللى يتحمّل مسئولية أعماله.. يعمل حاجة يقول أيوه عمّلت، يقول كلمة يقول أيوه قلت. فيه جايز واحد يقول أنا بأكدب علشان أغطى على غيرى.. ممكن تـهرب من الإجابة بدال ما تكدب، والإمتناع عن الإجابة ليس كدب. واحد يقول لك فلان عمل كذا ولا كذا قول له أنا ما أحبّش أخش فى تصرفات الناس أسألنى عن نفسى.. بقوة كدا.. مش تكدب وتقول ما أعرفشى وإنت عارف. خلّى عندك شخصية قوية. ومع ذلك فى كتاب الوصايا العشر تلاقى فيه جزء عن الكدب حاول تقراه (أحبوا أعدائكم 11/03/1987).

عدم تحريف الكتاب المقدس

س: الرد على تحريف الكتاب المقدس ؟

ج: إذا تحدث أى إنسان عن تحريف الكتاب المقدس لابد أن نسأل متى ؟ وكيف ؟ وأين ؟ متى وكيف وأين ؟ فهل مثلاً حرّف قبل الإسلام أو بعده ؟ مش ممكن يكون قبليه لأن المسلمين دُعوا أن يقيموا التوراة والإنجيل وما أُنزل إليهم وما أُنزل من قبلهم. فمش ممكن يكون الدعوة ليهم أنـهم يقيموا الإنجيل والإنجيل محرّف، أو التوراة والإنجيل ودول محرّفين. فإن كان قبل هذا فلنسأل متى ؟

+ أول ملاحظة: أقولها هى إن الكتاب المقدس الإنجيل تُرجم إلى كل لغات العالم يعنى لما جه مثلاً القرن السابع ولا السادس ولا الخامس كان مترجم لكل اللغات. مثال لهذا تُرجم إلى اللغة القبطية وهى من أقدم الترجمات ومن أدقّها. تُرجم إلى اللغة اللاتينية، الترجمة اللاتينية القديمة منذ الأجيال الأولى والترجمة اللاتينية التى ترجمها القديس جيروم فى أواخر القرن الرابع وأوائل الخامس وسُميت الفولكاتا أو فولجيت تُرجم الكتاب المقدس. وتُرجم أيضاً إلى اللغة السريانية ترجمة قديمة من أشهرها ترجمة البوشيتوا أى الترجمة البسيطة وهى من أقدم الترجمات أيضاً. ثم تُرجم إلى كل لغات العالم الموجودة إلى جوار الأصل اليونانى. فمن غير المعقول إنه يُحرّف فى كل هذه الترجمات. وهل يحدث إتفاق من جميع المسيحيين فى أقاصى الأرض على تحريفه ؟ وما المصلحة ؟

ثانياً: المسيحية كانت قد أنتشرت فى العالم كله، وأنتشر معها الكتاب المقدس. بدليل إنه لما عُقد مجمع نيقية المقدس فى سنة 325  كان حاضره مندوبين بس عن الكنائس 318 أسقفاً. شوف يبقى دول فى بلاد قد إيه؟! دا قبل مجمع نيقية كان البابا ألكسندروس البطريرك التاسع عشر فى الإسكندرية عقد مجمعاً فى الإسكندرية حضره 100 أسقف من أساقفة الكرسى المرقسى فى مصر وليبيا. دول بقى كانوا ماليين الدنيا. وطبعاً الكتاب المقدس بيقرأ فى الكنيسة، كان موجود فى كل حته. دا فى القرن الرابع كان فى دير الأنبا بيشوى حوالى 400 ناسخ بينسخوا الكتب المقدسة. لكن كانت المسيحية موجودة فى كل حته والكتاب المقدس موجود فى كل حته يبقى موجود فى كل مكان وموجود بكل لغة.

النقطة التانية اللى بعد كدا: المسيحية كانت قد أنقسمت إلى مذاهب وظهرت هرطقات. طبعاً معروف الهرطقات الأولى. دا القديس إيريناوس فى القرن الثانى عمل كتاب اسمه الرد على جميع الهرطقات، كان فيه الرد على 38 هرطقة أيام إيريناوس. القديس يوحنا الرسول فى رسالته الأولى والثانية أتكلّم برضه عن الهرطقات. وقال إن كان أحد يأتيكم ولا يجئ بـهذا التعليم فلا تقبلوه فى البيت ولا تقولوا له سلام. يعنى فيه ناس … هرطقات. سيبنا من كل دول هرطقة آريوس اللى عملت أنقسام مرعب وكانت فى بداية القرن الرابع. وحرمتهم الكنيسة والآريوسيين دوّخوا الكنيسة. طب ما عندهم كتب هل دول ها يتفقوا مع المؤمنين يقولوا يلا نعملها سوا ؟! هرطقة مقدونيوس سنة 381 فى المجمع الثانى. هرطقة نسطور سنة 431 فى المجمع الثالث. هل كل دول ها يتفقوا مع بعض على الرغم من كل العداوة. اليهود اللى كانوا بيضطهدوا المسيحية هل دول برضوا لو لقوا المسيحيين غيّروا فى الكتاب ها يقفوا لهم ساكتين. دا كان الفلاسفة القدامى يقرأون الكتاب المقدس ويحتفظون بيه للرد على الكتاب المقدس من داخله. وكان المسيحيون يدرسون الفلسفة لكى يردوا على الفلاسفة بأسلوبـهم. معروفه ماركيون اللى رد عليه أوريجانوس ما هو داخل فى الكتاب المقدس وبيحاول من جوه. فى أيام أوغسطينوس فى أواخر القرن الرابع وأوائل الخامس. أوغسطينوس قال نشكر الهراطقة الذين لما أستخدموا أسلوب الكتاب المقدس وهاجموه بدأنا نحن نتبحّر ونتعمق فى الكتاب لكى نرد عليهم. إذن كانوا الهراطقة بيردوا من دول. يبقى المسيحية ذهبت إلى كل مكان وأيضاً تُرجم الكتاب إلى كل اللغات والعداوات التى كانت بين المسيحيين والهراطقة كل دول مش ممكن ها يتفقوا مع بعض.

+ أيضاً الكتاب المقدس كله أتفسّر سفر … سفر، وآية … آية. دا لو ضاع الكتاب المقدس ها نلاقيه جوه كتب التفسير. دا خدوا واحد زى يوحنا ذهبى الفم فسّر إنجيل متى وفسّر إنجيل يوحنا وفسّر أعمال الرسل وفسّر رسائل بولس الـ 14 آية … آية. فلو راح الكتاب المقدس ها نلاقيه فى كتب التفسير، كتب التفسير زى كتاب الإنجيل هو … هو ما فيش فرق.

+ أيضاً لم يرد فى كل كتب التاريخ فى أى عصر من العصور، لم يرد فى كتب التاريخ … أى نوع من التاريخ … يعنى لا التاريخ المدنى ولا التاريخ الكنسى ولا أى تاريخ آخر لم يرد فيه حادثة تحريف وإلا يقولوا بواسطة من ؟ وأين ؟ متى وأين ؟ وهل جُمّعت كل نسخ الكتاب المقدس وكل الترجمات فى العالم كله من الأصدقاء والأعداء ومن المؤمنين والهراطقة وأتفقوا كلهم على إنـهم يجمّعوا كل النسخ ويحرّفوها، كلام مش معقول أبداً. لا يدخل تحت عقل.

+ نقطة تانية: أقولها علشان نقول عن أى كتاب إنه محرّف لابد نجيب الأصل ونجيب المحرّف ونقارن ونتيجة المقارنة نقول فيه تحريف. ففين الأصل وفين المحرّف وفين المقارنة ؟ لذلك يبدوا إن الكلام ما يخشش تحت عقل. دا أنا عايز أقول لكم على صلابة الكنيسة … صلابة الكنيسة فى هذا الأمر. يعنى شوفوا الآريوسيون كانوا بيهاجموا لاهوت المسيح وبيستخدموا … من أشهر الآيات اللى بيستخدموها الآية اللى موجودة فى يوحنا 14: 28 أبى أعظم منّى. قم الكنيسة تعمل إيه تجيب الآية ديّا تحطها فى إنجيل صلاة الساعة التالتة بحيث كل يوم نصلّى صلاة الساعة التالتة نلاقيها قصادنا يعنى مش خايفين منها … مش خايفين منها. دا كل يوم بنحطّها مين اللى بيخاف؟ أيضاً الآيات التى أساء الآريوسيين أستخدامها مثل مثلاً: أنا صاعد إلى أبى وأبيكم وإلهى وإلاهكم فى يوحنا 20. مثل: هذه هى الحياة الأبدية أن يعرفوك أنت الإله وحدك ويسوع المسيح الذى أرسلته فى يوحنا 17. مثل: عمود فى هيكل إلهى اللى موجودة فى رؤيا 3. ما كله موجود ما حدش حرّف فيه. ما لو عايزين نحرّف ما كنا ناخد الآيات الصعبة ديّا يلا نشيلها فى الحركة الآريوسية من القرن الرابع … أبداً قاعدة زى ما هىّ. إيه المصلحة إذا كانت الآيات الصعبة والمتعبة موجودة. يبقى ما الداعى لهذا التحريف ؟!

+ من جهة العهد القديم كما هو موجود فى عند المسيحيين وعند اليهود كما هو. فلو حدث تحريف هل يتفق اليهود مع المسيحيين ؟ مش معقول. وموجود فى الترجمة السبعينية كما هو ما جرالهوش حاجة. البعض بيقول إن التوراة الأصلية دى ضاعت وحُرقت ولم يعد لها وجود. المعروف إن اليهود كانوا فى مجامعهم يوزعون التوراة والناموس والأنبياء كله. لذلك السيد المسيح قال: إن موسى له كل سبت اللى بيقراه لأنه فى المجامع، مش بس أسفار موسى الخمسة والناموس والأنبياء. السيد المسيح دخل المجمع فدفعوا له سفر أشعياء. إذن الأنبياء كانوا موجودين. الناموس والأنبياء كانوا موجودين وبيقرأوا فى المجامع ومتوزعه على أيام الأسبوع زى القطمارس عندنا. بيقروه كل أسبوع فى المجامع. أمّال فى المجامع كانوا بيعملوا إيه ؟! وإزاى ما كانش فيه ولا نسخة أمّال إيه اللى كانوا بيقروه فى المجامع ؟ دا كان موجود مش بس عند اليهود فى المجامع، موجود عند الأفراد. بدليل إن الخصى الحبشى كان بيقرا فى سفر إشعياء لما قابله فيلبس وقال له تعالى بتقرا إيه وبدأ يبشره من ما كان معه من سفر إشعياء. وكان كل ملك جديد يدّوا له نسخة من التوراة لكى يحكم بما يطابق كلام الله. إزاى اتحرقت وما فضلش ولا نسخة ؟ والإنجيل راخر أتحرق أيام الإضطهادات ؟! أمّال إيه اللى بيقروه فى الكنايس ومتوزع على الكنايس كل أسبوع. دا عادة المسيحيين وعادة اليهود بيقروا الكتب المقدسة فى مجمع اليهود وفى كنيسة المسيحيين … وموزعه. دا لو أتحرق الإنجيل نجيبه من كتب المفسرين، نطلّعه تانى يطلع لنا … يجرى إيه. دا جيروم فسّر الكتاب المقدس كله، يعنى كل آيات الكتاب المقدس موجودة. القديس كيرلس الكبير فسّر عدد ضخم جداً من الكتب المقدسة. القديس ديديموس الضرير … كله. فموجود زى ما هوّ لا أتحرق فى أيام الإضطهاد ولا حاجة. ولو أتحرق فى أيام الإضطهاد ليه كانوا يطالبون فى القرن السابع بأن يقيموا التوراة والإنجيل إزاى بقى ما دام أتحرقوا ها يقيموا إيه ؟! الحريق. نكتفى بـهذا الجزء عن تحريف الكتاب (سؤال وجواب عن صحة الكتاب ج1 02، 09/03/1993).

شباب من صغره متربّى على الكتاب المقدس

أكتب إليكم أيها الشباب لأنكم أقوياء وكلمة الله ثابتة فيكم وقد غلبتم الشرير. إحنا عايزين شباب متربي من صغره على الكتاب المقدس يطلع كدا وهو صغيّر وحافظ … حافظ.

عارفين ساعات انتوا كشباب ما بتحفظوش في الكتاب المقدس ليه ؟ لأن المدرسين بتوع مدارس الأحد بتوعكوا أستصغروكم وأنتوا عيال … بصراحة … يعنى إيه أستصغروكم ؟ يعنى ولد صغيّر في إبتدائي عمره 6، 7، 8 يقولوا حرام يا عينى الواد دا يعرف يحفظ آيات … دا يحفظ قوى. دا إحنا ساعات بنشوف عيل عمره 8 سنين وحافظ نص أغانى البلد … بيلقط … بيلقط … يعنى ذاكرته لسه ذاكرة بكر لم يغرس فيها شئ، لم تمتلئ بالمعلومات بتاعت الدراسة وبتاعت الأخبار وبتاعت الحكايات ويستطيع أن يحفظ.

دا إحنا لازم العيل الصغيّر نحفّظة آيات ونشبعة آيات. مش ضرورى يفهمها يحفظها وها يفهمها بعدين. ندّى له آيات على قدّه آيات صغيرة صغيرة صغيرة لغاية لما يحفظ. آية زى الله محبة، آية زى أنا هو نور العالم. أنا هو الراعى الصالح … آيات صغيرة كدا: أنتم نور العالم. أنتم ملح الأرض … فيه آيات صغيرة ويقعد يحفظ. حتى الآية الكبيرة ندى له نصها في إبتدائي وربعها في إعدادى وكمالتها في ثانوى … ممكن بالتدريج ما يحفظش ليه ؟!

نحفّظه آيات في كل الفضائل الروحية، كلها. نحفّظه آيات عن الصوم. وآيات عن الصلاة. وآيات عن الكنيسة وحاجات كتيرة.

ياريت نحفّظ العيال قم لما يكبر يطلع مليان. مش عارفين يقول لك الواد دا قوى لأنه شبعان من لبن أمه، لازم يكون شبعان من لبن أمه الروحية اللى هى الكنيسة. شبعان منها من صغره متربي كدا على الآيات وعلى المزامير وعلى التسبحة وواد طالع متودّك من صغره، قم لما يكبر يبقي تمام. أوعوا تستصغروا العيال دا لو العيال أستصغروا أنفسهم قولوا لهم لأ دا الكتاب بيقول: لا يستهين أحد بحداثتك.

ياريت في مرة من المرات نعمل لكم مسابقة في حفظ الكتاب. أنا في حياتى الخاصة أول مسابقة دخلت فيها كنت في إبتدائي وعملوا لنا مسابقة في حفظ المزامير وحفظت المزمور 19 بتاع السموات تحدث بمجد الله والفلك يخبر بعمل يديه، هو مزمور مش صغيّر وأخدت عليه إنجيل صغير كدا وأنا كنت تلميذ في رابعة إبتدائي. دى أول حاجة أفتكر إن أنا حفظتها في حياتى من الكتاب المقدس (فإذا فسد الملح، الكتاب المقدس والشباب 17/12/1986).

علاقتك بالكتاب المقدس

س: هل لابد من دراسة الكتاب المقدس يومياً بأنتظام ؟ بمعنى يوجد كتب روحيه كثيرة مكدّسة فى مكتبتى شارحة للكتاب المقدس ومفسرة للأسفار والوقت …؟

ج: لازم تقرا الكتاب المقدس يوم بيوم. وعلاقتك بالكتاب ارجو أن تشمل الأشياء الآتية أقولها لك واحد اتنين تلاتة أربعة خمسة ستة لما … نخلّص:

1. أقتناء الكتاب المقدس: فلابد أن تقتنى كتاباً وياريت يكون فيه كتاب صغيّر موجود فى جيبك، وإن لم يوجد فى جيبك يبقى على الأقل كتاب فى مكتبك فى البيت … لازم أقتناء الكتاب المقدس.
2. قراءة الكتاب المقدس بإنتظام عهد قديم وعهد جديد: ولا أقصد بأنتظام أنتظام التتابع فى الكتاب إنما أقصد بأنتظام يعنى لا يمر يوم بدون قراءة … لا يمر يوم بدون قراءة. فأقتناء الكتاب وقراءة الكتاب.
3. فهم الكتاب والتأمل فيه … فهم الكتاب والتأمل فيه: دى نمرة تلاتة.
4. تداريب روحية لحياتك لتنفيذ ما قرأته فى الكتاب. يبقى أقتناء الكتاب، قراءه الكتاب، الفهم والتأمل وبعدين التداريب الروحية.
5. حفظ آيات من الكتاب: وياريت الآيات اللى تحفظها تكون مجال للتأمل وتتابعك فى طريقك فى حياتك.
6. معالجة بعض أخطاءك ببعض آيات من الكتاب: بحيث كل خطأ تضع أمامه آية أو عدة آيات لمعالجة هذا الخطأ. عندك غضب تجيب آيات على الغضب. عندك كثرة كلام تجيب آيات على كثرة الكلام. أى خطية عندك تكون حافظ لها شويه آيات.
7. دراسة الكتاب: سواء كانت مقدمات الكتاب أو كتب التفاسير، أو النواحى العقائدية واللاهوتية من الكتاب، أو الرد على البدع والهرطقات من الكتاب … إلى آخره. دول النقط اللى عايز أقولها لك بالنسبة للكتاب (أسرار الكنيسة، الطفل المشاكس 14/08/1990).

لماذا وكيف ندرس الكتاب المقدس ؟

س: واحد بيقول  لماذا ندرس الكتاب المقدس وكيف ندرس الكتاب المقدس ؟

ج: ندرس الكتاب المقدس لأنه كلام الله. ولأنه هوّ الذى يقودنا فى الحياة الروحية. ولأن المزمور بيقول سراج لرجلى كلامك ونور لسبيلى. ولأن الإرشاد الروحى بتاعنا مصدره الأول هو الكتاب المقدس. وندرس الكتاب المقدس أيضاً لكى نعرف منه قصة الله مع البشر، سواء مع القديسين أو مع الأشرار. وندرس الكتاب لأن فيه العقيدة، وفيه قواعد الإيمان، وفيه الحياة الكاملة، وفيه التأمل الروحى، وفيه قصص الأنبياء. عجيب إنك تقول لماذا ندرس الكتاب المقدس !! لكن كيف ندرس الكتاب المقدس … دراسة الكتاب المقدس على نوعين:

دراسة روحية لكى تأخذ التأمل الروحى اللازم ليك.

ودراسة أيضاً من ناحية العقيدة ومن ناحية التاريخ … إلى لآخره. فممكن إنت تحتاج للاتنين تحتاج للدراسة الروحية التأملية وتحتاج أيضاً للدراسة للعلم الدينى اللى تعرف بيه العقيدة والمبادئ والروحيات وقصص الأنبياء والتاريخ المقدس … إلى آخره.

س: كيف تدرسه ؟

ج: تدرسه من ناحيتين، وكويس ليك إنك إنت تاخد ناحية التأمل وتاخد درس روحى وتبتدى قراءة الكتاب المقدس بالصلاة وتقول أكشف يا رب عن عينىّ لأرى عجائب من ناموسك وتطلب إن ربنا إن يُعطيك درس روحى وتاخد لك آية أو أكتر من اللى إنت بتقراه وتحفظها وتخليها سبب بركة ليك يعنى (شاول الملك 28/11/2001).

 كيفيه دراسة الكتاب المقدس

س: كيف يمكن دراسة الكتاب المقدس ؟

ج: أنا يعنى أحب أقول لكم فيه ناحيتين:

فيه دراسة الكتاب المقدس بطريقة علمية لفهمه بالإستعانة بكتب التفسير ومعرفة معانى الكلمات والدراسة التاريخية والجغرافية والآثار للكتاب والأحداث وترتيبها ودراسة الرموز والأمثال … إلى آخره.

وفيه دراسة تضاف إلى كدا ولكن أفضل منها كثيراً إن الواحد يقرأ الكتاب المقدس وياخذ منه درس روحى لحياته ويطبق هذا الدرس على نفسه ويخرج بتداريب عملية تفيده في حياتة الروحية. دا الوضع السليم. ماذا يستفيد الإنسان لو تحول إلى عالم من علماء الكتاب دون أن يؤثر الكتاب في حياته، في سلوكه، في روحياته، في طباعه، في معاملاته … إلى آخره … فحاولوا تقروا وتاخدوا درس روحى وياريت أيضاً تحفظوا آية تتأملوا فيها وتطبقوا على نفسكم (من نظر إلى امرأة وأشتهاها 25/02/1987).

قراءة العهد القديم

س: واحد بيقول انه بيقرا العهد الجديد ولا يمل من القراءة ولكن ما بيعرفش يقرا العهد القديم ؟

ج: ياريت تقرا فى الأول القصص اللطيفة اللى فى العهد القديم زى سفر التكوين وما فيه من قصة نوح وابراهيم واسحق ويعقوب ويوسف، وتقرا أيضاً قصة الخروج الأولى صراع موسى مع فرعون. لكن إذا أبتديت فى العهد القديم ولقيت بعض قراءات مش فاهمها زى وصف خيمة الاجتماع والأشياء اللى فيها، زى الاسماء بتاعت الأنساب ومش عارف تفهمها فأجّل هذا الموضوع شوية ودوّر على حاجة تانى. ها تلاقى بعدين قصة داود النبى فى صموئيل الأول كويس أقراها وفى صموئيل التانى. قصة ايليا النبى فى ملوك الأول أقراها كويسة. وأجل شوية الحاجات اللى أنت مش فاهمها وخليك تحت ارشاد روحى من أب روحى يقول لك إيه اللى تقراه فى العهد القديم وربنا يكون معاك (مفهوم الطموح 19/05/1993).

عدم القدرة على قراءة الإنجيل

س: أنا أعانى من عدم القدرة على قراءة الإنجيل والكتب الدينية لفترة طويلة فكلما أجلس لقراءة الإنجيل أشعر بالحاجة للنوم أو أتذكر أى شئ لأفعلة ولم أستطع التغلب على هذه المشكلة فبماذا تنصحنى ؟

ج: أنصحك بعدة أمور:

أول حاجة: إنك تقرأ من أسفار الكتاب التى ليست فيها صعوبة. فية بعض أسفار كدا تلاقيها ما فيهاش صعوبة فى الفهم وسهل إنك إنت تقراها.

تانى حاجة: اقرأ على قدّك. يعنى مش ضرورى جزء كبير تتعب منه وتمل وتحتاج تنام قليل قليل لغاية ما توصل. يبقى تقرأ الحاجة اللى تفهمها وتنبسط منها، تانى حاجة تقرأ على قدّك.

تالت حاجة: مش ضرورى تقرا الإنجيل بالترتيب لأن جايز لو مشيت بالترتيب ها تلاقى حاجات صعبة وحاجات مش فاهمها. إختار قراءات. وليس المهم فى كثرة الذى تقرأة إنما فى الإستفادة وفى التداريب الروحية. قول أنا أقرا ولو  3، 4 آيات وأقف على كدا. وبعدين جايز الـ 3، 4 يبقوا 5، 6  وجايز يبقى فقرة وجايز يبقى إصحاح … على قدّك وربنا يساعدك (علينا أن نعمل 05/09/2001).

ترتيب أسفار الكتاب المقدس

س: هل كان أيوب قبل ابراهيم وقبل الناموس أو بعده ؟ هل ترتيب سفر أيوب فى الكتاب المقدس حسب وجوده زمنياً ؟

ج: لأ طبعاً. الكتاب المقدس لما جم يرتبوه خلوا فى الأول أسفار الشريعة. اللى هى أسفار موسى الخمسة التكوين والخروج واللاويين والعدد والتثنية. وبعدين الأسفار التاريخية … التاريخ زى يشوع والقضاة وراعوث وصموئيل الأول والتانى وملوك الأول والتانى … إلى آخره. وآخر الأسفار التاريخية المكابيين. بعد كدا جابوا الأسفار الشعرية أو الحكمية يعنى اللى مكتوبة بالشعر أو أسفار الحكمة اللى من ضمنها أيوب والمزامير والأمثال والجامعة والنشيد … إلى آخره. وبعدين أسفار النبوات الأنبياء الكبار وبعدين الأنبياء الصغار آدى الحكاية جات بالترتيب دا. وفى العهد الجديد برضة بنفس الوضع أسفار الشريعة فى الأول اللى همّا الأناجيل وبعدين الأسفار التاريخية اللى هى أعمال الرسل بعدين الأسفار الحكمية أو الشعرية اللى هى رسائل الرسل وبعدين الأسفار النبوية اللى هى سفر الرؤيا. ولو إن الكلام دا ما نقدرش نقولة يعنى 100 % سليم يعنى لية بقى؟ لأن أسفار موسى الخمسة برضة فيها نبوات. وبرضة الأسفار الشعرية والحكمية فيها نبوات زى المزامير وأيوب وغيره. والأسفار التاريخية برضة فيها شريعة. لكن بيتكلموا على الجو الغالب فحطّوا سفر أيوب أول الأسفار اللى بالشعر ولكن أيوب بالظبط تاريخه يعنى ما بين نوح  وابراهيم. يعنى أقدم من ابراهيم وبعد نوح طبعاً لأسباب كثيرة.

من ضمن هذه الأسباب أو من ضمن هذه الدلائل يعنى مسألة العمر … طول العمر. أيوب عمره أكبر بكتير من ابراهيم واسحق ويعقوب. فى أيوب 42 يقولوا إيه وعاش أيوب بعد هذا يعنى بعد التجربة 140 سنة ورأى بنية وبنى بنية إلى أربعة أجيال. عاش بعد التجربة 140 سنة وأثناء التجربة كان رجلاً شيخاً متقدماً فى الأيام. ولذلك فى أيوب إصحاح 32 بعد ما التلات أصحاب الأولنيين أتكلّموا اللى همّا صوفر النعمانى وبلدد الشوحى وأليفاز التيمانى أتكلم أليهو ابن برخائيل البوزى من عشيرة رام فقال لهم أنا فتى وأنتم شيوخ لذلك خفت وخشيت أن أفتح فمى قلت كثرة الأيام تتكلم فبيقول لهم أنا فتى وأنتم شيوخ فكان راجل شيخ. يعنى مات وعمره أزيد من 200 أزيد من ابراهيم ومن اسحق ومن يعقوب.

الحاجة التانية: سفر أيوب جاب أمثلة كتيرة من أمثلة الخليقة فى المناقشات وما جابش أى حاجة من الأسفار اللى كانت موجودة. يعنى ما جابش أى حاجة عن موسى، ما جابش أى حاجة عن الشريعة، ما جابش أى آيات من اللى موجودة … ما جابش حاجة أبداً. مما يدل على إنه كان قبل الناس دول كلهم وما فيش حاجة يعرفها منهم يعنى. هو رجل قديم (تأثير البيئة 30/11/1988).

ترتيب إنجيل متى

س: واحد بيقول من المعروف أن إنجيل معلمنا مرقس الرسول هو أول إنجيل كتب فلماذا وضع إنجيل معلمنا متى فى بداية العهد الجديد ؟

ج: وضع إنجيل متى فى بداية العهد الجديد علشان أنه صلة بين العهد الجديد والعهد القديم كل شوية والتانية يقول كما هو مكتوب، كما قال النبى القائل. فأصبح إنجيل متى لما يتوضع فى أول العهد الجديد يبقى الصلة بين العهد الجديد والعهد القديم، دى حاجة.

وتانى حاجة لا تظنوا أن أسفار العهد الجديد أو أسفار العهد القديم وضعت فى الكتاب المقدس على حسب الترتيب التاريخى … لأ. يعنى مثلاً فى العهد القديم أتوضع أسفار الشريعة فى الأول أسفار موسى الخمسة وبعدين الأسفار التاريخية بدأً من يشوع وبعدين الأسفار الشعرية والحكمية أبتداء من أيوب لغاية باقى بقى المزامير وأسفار سليمان … إلى آخره وبعدين أسفار النبوات. فما نقدرش نقول دى قبل دى ولا دى بعد دى. دا حطوهم كدا. فمثلاً مزامير داود كتبت أيام داود لكنها أتوضعت بعد الأسفار التاريخية، أتوضعت بعد أسفار نحميا وعزرا اللى رجعوا من السبى، لكن هى أتوضعت ضمن الأسفار الشعرية الحكمية بغض النظر عن وقت كتابتها وكذلك باقى الأسفار. العهد الجديد أسفار الشريعة فى الأول الأناجيل وبعدين الأسفار التاريخية اللى هى أعمال الرسل وبعدين الأسفار الحكمية اللى هى الرسائل وبعدين النبوية اللى هى الرؤيا. يعنى أتربتبت بترتيب خاص مش حسب التاريخ (الغلطة الكبرى فى الحياة 12/05/1993).

 أحفظ على قدّك

س: واحد بيقول كيف يمكننى أن أحفظ القداس الإلهى والكتاب المقدس ؟

ج: كل الكتاب المقدس ! أحفظ على قدّك. يعنى إيه تحفظ على قدّك يعنى كل فضيلة من الفضائل إحفظ لها شوية آيات. كل عقيدة من العقائد إحفظ لها شوية آيات، كل حرب من الحروب الروحية التى تحارب بيـها إحفظ لها شوية آيات. إحفظ آيات تبدأ بالحروف الأبجدية مثلاً. إحفظ آيات من فصول مشهورة فى الكتاب المقدس. يعنى فصل المحبة فى كورنثوس الأولى 13. فصل عن فضائل متعددة فى رومية 12. وفى تسالونيكى الأولى 5. إحفظ مثلاً أجزاء من العظة على الجبل. إحفظ فصول الإنجيل الموجودة فى الأجبية. إحفظ مجموعة من المزامير. إحفظ كل آية تترك فى نفسك تأثير روحى كويس. ولما تخلّص دول إبقى قول لى أقول لك برنامج تانى. لكن تحفظ القداس الإلهى وإنت يعنى لسة شاب ومش قسيس ؟! إحفظ ألحان، إحفظ قطع الأجبية والتحاليل بتاعتها (آباؤنا الرسل 05/06/1996).

 طريقة لحفظ الآيات

س: واحد بيسأل عن طريقة لحفظ الآيات ؟

ج: ها أقول لكم تدريب معين تحفظوا بيه وممكن كل مرة أدى لكم تدريب تانى، يعنى خدوا لما يكون الاصحاح زى العدد يعنى نمرة الاصحاح زى نمرة العدد.

+ يعنى تاخدوا يوحنا 1: 1 في البدء كان الكلمة والكلمة كان عند الله وكان الله الكلمة.

+ أو تكوين 1: 1 في البدء خلق الله السموات والأرض، طبعاً كلكم حافظين الآيتين دول.

+ خدوا نمرة 2 تيموثاوس التانية إصحاح 2 آية 2 بولس يقول لتلميذه تيموثاوس وما تسلمته منّى بشهود كثيرين أودعه أُناسا أُمناء يكونون أكفاء إنـهم يعلموا آخرين أيضاً.

+ تيجي مثلاً لـ 3: 3 تقول متي 3: 3 صوت صارخٍ في البرية أعدوا طريق الرب.

+ تيجي مثلاً فيلبى 4: 4 أفرحوا في الرب كل حين وأقول أيضاً افرحوا.

+ تاخد غلاطية 4: 4 في ملء الزمان أرسل الله إبنه مولوداً من إمرأة تحت الناموس.

+ تاخد مثلاً 5: 5 تقول متي 5: 5 طوبي للودعاء لأنـهم يرثون الأرض.

+ تأخذ متى مثلاً 6: 6 أما أنت فإن أردت أن تصلّي فلا تفعل مثل المرائين … إلي آخره بل أدخل إلي مخدعك وأغلق بابك .. إلي آخره.

+ تاخـد مثلاً متى 7: 7 أسألوا تعطوا أطلبوا تجدوا اقرعوا يُفتح لكم.

+ عايز 8: 8 تاخد مثلاً رومية 8: 8 لأن الذين هم في الجسد لا يستطيعون أن يرضوا الله.

خدها واحدة واحدة كدا لغاية لما توصل. أكمل لكم حتى لحد 20: 20، 30:30 زي ما تطلع (مقاييس الفضيلة 03/02/1993).

 طريقة سهلة لحفظ الآيات بشواهدها

س: أرجو أن تعلّمنا الطريقة المبسّطة لحفظ شواهد الكتاب المقدس، فإنى أتعجب جداً حينما تذكر قداستكم … طب ما عليش .؟

ج: شوف ها أقول لك على حاجة إنت فى الأول تبتدى تحفظ آيات معينة بشواهدها زى ما هىّ كدا وتاخدها فى موضوعات معينة … فى موضوعات إيه ؟ معينة. أعتبر إن الشاهد كأنه جزء من الآية. مش جايز الآية تكون 5 كلمات أفتكر إنـهم 7 ما جراش حاجة.

+ يعنى مثلاً تاخد آية عن لاهوت المسيح أنا والآب واحد. بدال ما تقول أنا والآب واحد. قول أنا والآب واحد يوحنا 10: 30 وتاخدها كدا على بعضيها. أنا والآب واحد يوحنا 10: 30. أنا والآب واحد وأحفظها بحالها كدا … كويس.

+ زى ما إنت بتقول فى البدء كان الكلمة والكلمة كان عند الله وكان الله الكلمة قول يوحنا 1: 1. ومشيها ما جراش حاجة.

+ تلاقى نفسك مغموم ومهموم وحالتك تعبانة تقول مثلاً أفرحوا فى الرب كل حين وأقول أيضاً أفرحوا. تقول أفرحوا فى الرب كل حين وأقول أيضاً أفرحوا فيلبى 4: 4. وتروح ممشيها كدا على طول تلضم الآية فى الشاهد كأن الشاهد جزء من الآية. صعبة دى ولا سهلة ..؟

+ تقول مثلاً أنا ها أحفظ الوصايا العشر. الوصايا العشر ديا موجودة فى خروج 20، وفى تثنية 5. فتكون حاططها فى مخّك وتحفظها على كدا. واحدة واحدة ها تلاقى نفسك إية ؟ وصلت. خد الآيات بتاعت العقيدة وأحفظها بشواهدها. وخد الآيات الروحية وأحفظها إيه ؟ بشواهدها. وها تجد إنك إنت تجد لذة فى حفظ الآيات بشواهد. صدقونى أنا شفت عيال صغيرين بيحفظوا الآيات بشواهدها. إحنا ممكن نعمل لكم مسابقة إن شاء الله مش فى نص السنة … السنة دى ما لهاش … (الثمر 04/11/1992).

 آيات لحروف صعبة

س: واحد بيقول تطلب منّا تدريب أن نحفظ آيات على بداية حروف معينة كأسماءنا أو غيره، وفيه بعض حروف صعبة مثل الشين، والصاد، والضاد، والطه ما فيهاش آيات كتيرة، فعايز آيات تبتدى بكدا ؟

ج: خدوا مثلاً حرف الضاد، آية لطيفة خالص:

ضللت مثل الخروف الضال فأطلب عبدك، فإنى لوصاياك لم أنسى. ودى موجودة فى التسبحة وموجودة فى صلاة نصف الليل … الضاد. ضللت مثل الخروف الضال فأطلب عبدك فإنى لوصاياك لم أنسى.

+ الشين: ها تلاقوا فيه آيات كتيرة تبتدى بشهاداتك أو شفتاه … إلى آخره زى مثلاً لما نقول:

شفتا الصديق ينبوع حياة.

شهادة الرب صادقة تعلّم الأطفال.

شفتايا تسبحانك لذلك أباركك فى حياتى.

حاجات زى كدا كتير ها تلاقوها.

+ الظاء: أنا عارف الظه صعبة عليكم، تقول مثلاً:

ظُلم أما هو فتذلل ولم يفتح فاه … ظُلم أما هو فتذلل ولم يفتح فاه. يعنى واحد اسمه ظريف وعايز أولها ظه يقول ظُلمت بأننى أنا أبتديت بحرف مش عارفه.

+ الطاء كتير: طوبى للمساكين بالروح … كل التطويبات.

طوبى لكل السكان فى بيتك يباركونك إلى الأبد.

طوبى للرجل الذى غُفرت خطاياه.

طوبى لمن لا يحسب له الرب خطية.

فيه طه غير طوبى زى مثلاً:

طلبت وجهك ولوجهك يا رب ألتمس لا تحجب وجهك عنّى. طه كويسه دى..

+ الصاد: زى صلّوا كل حين ولا تملّوا. أهى آية صُغيرة وتحفظوها بدون ما تتعبوا.

أو الآيات اللى تبتدى بصاد:

صوت صارخٍ فى البرية.

صوت الرب يحطّم الأرز.

صوت سُمع فى الرامة.

صادقة هى الكلمة ومستحقة كل قبول. يعنى دى سهلة

ياريت تحفظوا الآيات دى، كل مرة لو نجيب لكم شويه آيات من الآيات الصعبة تبقى كويسه علشان ما يصعبش عليكم (حياة التدقيق 12/08/1987).

المزمور 119

س: لاحظنا عند قراءة مزمور 119 وجود أبجد هوّز حطّى كلمن فأرجو تفسير ذلك ؟

ج: هو مزمور 119 كان بطريق الشعر، وكان بيبتدى بالحروف الأبجدية فعلاً، يعنى كل قطعة 8 آيات و 22 قطعة على الحروف الأبجدية العبرانية. 22 x 8 يبقى 176 آية. كل مجموعة كل 8 آيات يبتدوا بحرف واحد. فعلاً كدا فى العبرانى لكن لما أترجم أتغير طبعاً. الترجمة ما بتحتفظشى بنفس الحروف (مستويات فى الفضيلة 09/02/1994).

الكتاب المقدس والعلم الحديث

س: هل الآراء الحديثة والنظريات فى تفسير نشأة الأرض والكون والكائنات الحية والتغييرات المختلفة تخالف الرأى الأبدى أم ماذا ؟

ج: ما فيش أى رأى حديث إطلاقاً يخالف ما جاء فى الكتاب المقدس، إطلاقاً. ها أقول لكم رد على كلمة بسيطة علشان إذا جا لكم شك فى الموضوع دا تلاقوا الرد عليه. جايز مثلاً البعض فيكوا يقول إن الكتاب المقدس بيقول ربنا خلق العالم فى ستة أيام وآراء العلم الحديثة ونشأة الكون بتقول إن فيه عصور جيولوجية بمئات الآلاف من السنين فكيف يتفق هذان الرأيان، هى دى الوحيدة يعنى. الحل الوحيد لهذا الإشكال هو إن أيام الخليقة لم تكن أياماً شمسية. اليوم الشمسى هو يوم يبدأ من شروق الشمس إلى شروقها مرة أخرى بعد الغروب، أو من غروب الشمس إلى غروبـها مرة أخرى بعد الشروق اللى هو اليوم اللى أنتوا بتقيسوه بـ 24 ساعة. وطبعاً أيام الخليقة لم تكن أياماً شمسية. بدليل إن الكتاب ذكر أن الله خلق الشمس فى اليوم الرابع. فما دام خلق الشمس فى اليوم الرابع إذن الأربعة الأيام الأولى لم تكن أياماً شمسية لأن الشمس لم تكن قد وجدت بعد. وبالتالى يمكن إن باقى الأيام تكون غير أيام شمسية.

ثانياً: قيل عن اليوم السابع إنه بدأ ولم يقل الكتاب إنه إنتهى. فبدأ اليوم السابع ومازلنا نعيش فيه ومرت على الأرض آلاف السنوات ومازلنا فى اليوم السابع، ولم يقل الله وكان مساء وكان صباح يوماً سابعاً مش موجودة فى الكتاب خالص العبارة دى. فإحنا مازلنا نعيش فى اليوم السابع وماخلصش لحد دلوقتى. كذلك ورد فى الكتاب المقدس: يوم عند الله كألف سنة وألف سنة كيوم. كذلك أجمل الكتاب فى الإصحاح الثانى من سفر التكوين كل عمل الخليقة فى عبارة يوم خلق الله السموات والأرض كأنه أعتبرها كلها كأنـها يوم واحد. وعبارة يوم فى الكتاب بتطلق على عهود أو عصور. زى مثلاً لما تقول أيام أحشويرش الملك، أيام يعنى همّا 3، 4 أيام بالساعة … طبعاً لأ !! يعنى فى عهده. ولغاية دلوقتى ممكن نستخدم هذا التعبير أيام فلان، حتى لغاية دلوقتى الناس يقولوا أيام الملك فاروق، يعنى الملك فاروق كانت أيام.. ما كانت سنين طويلة. أو يقولوا أيام الفراعنة كانت الحالة كذا، هو الفراعنة كانت أيام ما كانت مئات السنين وآلاف. فكلمة يوم ممكن تستخدم لأى حاجة. أيام الخليقة إذن لم تكن أياماً شمسية وإنما كانت حقباً من الزمان. كل حقبة من الزمن يمكن أن تكون لحظة من الزمان ويمكن أن تكون ملايين من السنين. حقبة غير محدد طولها الزمنى. أطلق على بدايتها ونـهايتها عبارة كان مساء وكان صباح لكنها فترة غير محددة الزمن كلمة يوم دى. فإذا كان الأمر هكذا فنحن إذن لا نختلف إطلاقاً مع علماء الجيولوجيا وكل ما يقولون.

+ تيجى نقطة تانية جايز ناس يقولوها زى مسألة التطور، نظرية التطور أو النظرية النسبية، نظرية التطور بتاعت داروين. الكتاب المقدس لم يتعرض إطلاقاً لهذا الكلام لا بنفى ولا بإيجاب. وأنا عايزكوا باستمرار تخلّوا الكتاب المقدس فوق مستوى العلم العالمى. يعنى صحّت النظرية أو لم تصح هذا لا يؤثر على الكتاب فى قليل أو كثير. ومع هذا ما تزال نظرية داروين نظرية وليست حقيقة علمية وهناك علماء حاربوا هذه النظرية هناك علماء حاربوا هذه النظرية. وإذا كان التطور يبتدى مثلاً من دودة لسمكة لقرد لإنسان. فيعنى لم يحكى لنا العلم إن أى قرد آخر تحول إلى حواء أو إلى آدم. يعنى ما فيش غير قردين بس همّا اللى جالهم التطور لغاية لما قرد بقى آدم وقرد بقى حواء وبقية القرود اللى فى الدنيا ما تزال قروداً … كلام مش معقول يعنى. لو كان التطور ماشى على طول كانت كل القرود بقت بشر … الكلام دا مش مظبوط. ولغاية دلوقتى فى نظرية داروين بيقولوا فيه حلقة مفقودة لتكميل النظرية وما وصلوش للحلقة المفقودة دى. وما فيش حد يعنى بيطبق نظرية التطور على الإنسان بالذات من المفكّرين اللى ليهم سلامة فى التفكير يعنى. لكن العلم ما بيتعارضش مع الدين. عبارة أقولها لك ياريت تحفظها: العلم السليم لا يختلف مع الفهم السليم للدين. العلم السليم لا يختلف مع الفهم السليم للدين. فإذا وجد أختلاف يبقى معناها إن إما العلم غير سليم لإما إن الفهم للدين غير سليم. ما نقولش الدين غير سليم نقول الفهم للدين غير سليم، إذا وجد خلاف. يبقى فيه ناس مش فاهمين الدين مظبوط أو مش فاهمين العلم مظبوط، لكن لا يوجد خلاف بين هؤلاء وأولائك (الذبائح وخروف الفصح 26/07/1979).

الأسفار القانونية

س: فى المحاضرة السابقة قدمت لقداستكم كتاب الأسفار القانونية الثانية فلماذا لم تمضى عليه ـ ما وقعتش عليه يعنى ـ وشطبت كلمة الثانية. أرجوك ارشدنى أقراه أم لا اقرأه ؟

ج: لأ اقراه. بس غلط إنـهم يقولوا أسفار قانونية ثانية. هى إما قانونية لإما غير قانونية. لكن ما فيش أسفار من الدرجة التانية يبقى كأننا بنفرّق كلام ربنا إلى كلام مهم وكلام مش مهم وكلام درجة أولى وكلام درجة تانية. فأنا شطبت على كلمة الثانية. يعنى اللى طبعوا الكتاب أخطأوا فى هذا الأمر، لكن الكلام الموجود اقراه وأستفيد منّه (سنوات مع أسئلة الناس ج3 12/02 ـ 25/03/1992).

ندان على رفض المعرفة

اقرأ وحاول أن تطبّق ولذلك تكون القراءة مجالاً للتداريب الروحية وما أقوله عن القراءة أقوله عن السماع أيضاً يعنى ما تسمعه خذه مجال للتدريب الروحى للتطبيق العملى. لأن فيه آية تديننا جداً وهى الآية التى تقول: الذى يعرف أكثر يطالب بأكثر. هنا والقديس أوغسطينوس واجهه هذه المسألة وفحصها. قال طب إذا كان الواحد لما يعرف أكتر يُطالب بأكتر، فهل من الخير لي إنى لا أعرف أكثر لكى لا أُطالب بأكثر؟ هل من الخير لى أن أنا لا أعرف أكثر لكى لا أُطالب بأكثر؟ وأجاب القديس عليها وقال هناك فرقَ بين عدم المعرفة ورفض المعرفة. كون إنك ما تعرفش شئ وكون إنك ترفض المعرفة أو ترفض أن تعرف … الله سيطالبك برفضك للمعرفة. زى واحد يقول لو أقرا الكتاب ها تيجينى آيات ووصايا أحسن ما أقراهوش. فلو ما قريتهوش ربنا ها يطالبك برفضك … يحاسبك على رفضك للمعرفة (القراءة والسماع 09/12/1987).

موقف المسيحية من العهد القديم

س: يتسائل البعض عن موقف المسيحية من العهد القديم من الكتاب المقدس قائلين ألم يحررنا المسيح من شرائع التوراه وقيودها. فإذا كان المسيح حررنا بواسطة نعمة الله وأصبحنا أولاداً لله وأبناء للعهد الجديد. فما هى علاقتنا بالعهد القديم الذى يختص بعلاقه الله ببنى اسرائيل قديماً ؟

ج: الكلام دا فى منتهى الخطورة لما يقول العهد القديم هو علاقة الله ببنى اسرائيل … بس ؟! إذا كان كدا يبقى يتحذف العهد القديم من الكتاب المقدس وكفايه علينا الإنجيل. العهد القديم هو علاقة الله بالإنسان منذ نشأته وقبل نشأته. يعنى من قبل الخليقة من  قبل ما يتخلق الإنسان إلى آخر الدهور. وإلا لو كان أشخاص من البروتوستانت يقولوا الكلام دا يبقى معناها لا يعظون إطلاقاً من العهد القديم يوعظوا ليه من العهد القديم ما دام ما لناش علاقة بيه. ويبقى لا يطبع الكتاب المقدس بالعهدين مع بعض عهد قديم وعهد جديد مع بعض ككتاب واحد. كمان المسيح قال ما جئت لأنقض بل لأكمّل. وقال إن السماء والأرض تزولان ولكن كلمة من الناموس لا تزول. يعنى الناموس مازال موجود. لما إنت تقول إن ربنا حررنا من العهد القديم يبقى من ضمن العهد القديم الوصايا العشر. يبقى حررنا من الوصايا العشر ؟! أكرم أباك وأمك ولا تقتل ولا تزنى ولا تسرق ولا تشهد بالزور وتقديس يوم الرب. بل أول آية فى الوصايا العشر أنا الرب إلهك الذى أخرجك من أرض مصر … لا تكن لك آله أخرى أمامى. فإيه اللى حررنا من العهد القديم دا ؟! مين قال الكلام دا ؟! حررنا من العهد القديم يعنى نشطبه ؟ يعنى نلغيه ؟ يعنى مش هو من الكتاب المقدس ؟ الكلام دا مش معقول أبداً … الكلام دا مش معقول أبداً. وهل وصايا العهد القديم كلها نحن غير مطالبين بـها ؟! لكن الأشياء التى كانت رموزاً فى العهد القديم العهد الجديد أرانا ما ترمز إليه وتبقى كما هى شرائع العهد القديم ما ضاعتشى بس من ناحية الرمز. إذا كانت ذبائح العهد القديم ترمز إلى ذبيحة المسيح فى العهد الجديد يبقى لا داعى لهذه الذبائح التى كانت فى العهد القديم ما دام ذبيحة المسيح جات بدالها، لكن الأشياء التى لم تكن رموزاً زى الوصايا ما نقولش ربنا حررنا منها … لأ طبعاً الوصايا هىّ هىّ، الشريعة الأدبية هىّ هىّ. ونعمة الله مش معناها حررتنا من الوصية نعمة الله معناها إنـها تساعدنا على  تنفيذ الوصية. مش إن نعمة الله فى العهد الجديد تحررنا من الوصية لأ دى تساعدنا على تنفيذ الوصية مع وجود الوصية. الوصية موجودة بس النعمة تساعدنا على تنفيذها. لكن النعمة تحررنا من الوصايا يعنى الواحد  يعمل زى ما هوّ عايز ؟! دا كلام مش مظبوط أبداً وعيب إنه يتقال. ولما إحنا نكون أولاد لله معناها إن إحنا غير مطالبين بالوصايا ؟! لأ إحنا مطالبين بالوصايا. والعهد الجديد بيقول كل الكتاب موحى به من الله ونافع للتعليم والتأديب والتقويم كل الكتاب. وبيقول لم تأت نبوة قط من جهة إنسان بل تكلم بـها أناس الله القديسون مسوقين من الروح القدس. فكل نبوات العهد القديم تكلم بـها أُناس الله القديسون مسوقين من الروح القدس.

كمان لا ننسى إن السيد المسيح أثناء كلامة أستشهد بآيات من العهد القديم. لما الشيطان قال له قل أن تصير الحجارة خبزاً. قال له لأ. دا مكتوب ليس بالخبز وحده يحيا الإنسان بل بكل كلمة تخرج من فم الله. ودى آية موجودة فى سفر التثنية إصحاح 8. وقال له مكتوب أيضاً. ولما جم يكلموه الكتبة والفريسيون قال لهم مرة إن داود قال فى المزمور قال الرب لربى أجلس عن يمينى يعنى أستشهد بالمزامير.

والعذراء فى التسبحة بتاعتها قالت مزامير. فهل المزامير برضوا نلغيها من العهد القديم ونقول حررنا منها الله بالنعمة ؟! وما نقولش المزامير ؟! دا كلام دا ؟! يا إبنى اللى بيقول لك الكلام دا إما بيخدعك لإما جاهل بما يقول.

دا المسيح قال للتلاميذ بدأ يفسر لهم النبوات الموجودة فى الناموس والأنبياء والمزامير عنه، ودى موجودة فى لوقا 24. بدأ يفسر لهم النبوات الموجودة عنه فهل النبوات والرموز الموجودة عنه دى حررنا منها الله ؟! وهل بعد كدا ما نستخدمش المزامير ونقول حررنا من المزامير كمان ؟! دا المسيح وبّخ الكتبة والفريسيين فى متى 22 وقال لهم تضلون إذ لا تعرفون الكتب … تضلون إذا لا تعرفون الكتب. فلو كنا أُعفينا من هذه الكتب وحررنا الله منها يبقى إزاى نضل إذا لم نستخدمها … يقول لهم تضلون إذ لا تعرفون الكتب. وبولس الرسول قال لتلميذه تيموثاوس وأنت منذ الطفولية بتحفظ الكتب المقدسة. والسيد المسيح سُر من الشاب الغنى لأنه كان يحفظ الوصايا. طبعاً كل دا عن العهد القديم. ياريت تعرفوا تردوا على الناس اللى بيضللوكوا بـهذا الأسلوب (الفرح بالرب 21/08/1996).

سلسلة الأنساب للسيد المسيح

س: واحد بيقول نرجو الإجابة على السؤال الآتى عن سلسلة الأنساب الواردة فى إنجيل متى يقول الكتاب المقدس جميع الأجيال من ابراهيم إلى داود أربعة عشر جيلاً، ومن داود إلى سبى بابل أربعة عشر جيلاً، ومن سبى بابل إلى المسيح أربعة عشر جيلاً. ولكن كما يبدو أن الحقبة الثالثة ثلاثة عشر جيلاً … إلى آخره. نرجو ألقاء الضوء على ذلك ؟

ج: الملاحظة ديا لاحظها القديس أوغسطينوس حينما عالج مشكلة سلسلة الأنساب فقال أن كل واحدة منّهم 14، 14 × 3 بـ 42 لما نعدّهم نلاقيهم 41. فإيه السبب ؟ وبعدين لقى إن السبب هو ياكونيا آخر واحد فى السلسلة التانية وأول واحد فى التالتة. وقال دا يمثل حجر الزاوية. لأن بعديها يعنى نزلوا همّا لحد السبى ومن يكونيا أبتدى يرجع الحكاية تانى إلى المسيح إلى الخلاص. فكان الخروج من السبى إلى مرحلة الخلاص خلّت  ياكونيا ديا زى حجر الزاوية، زى ما تجيب حاجة زاوية كدا، زاوية قايمة فتلاقى اللى فى الزاوية دا هو آخر واحد فى الخط الرأسى وأول واحد فى الخط الأفقى فأعتبر من ضمن الحقبة الثانية ومن ضمن الحقبة الثالثة مع بعضيهم. يعنى أتعد مرتين لأن من عنده أتغيرت من السبى إلى الخلاص بالمسيح (مقاومة خطية الغضب 22/01/1986).